រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីកម្ពុជា បានមានប្រតិកម្មខ្លាំងៗ ទៅនឹងការគំរាមកំហែងរបស់លោកនាយករដ្ឋមន្ត្រីថៃអាប់ភីស៊ី ដែលប្រកាសថា នឹងប្រើទាំងមធ្យោបាយការទូត និងយោធាដោះស្រាយបញ្ហាព្រំដែនជាមួយកម្ពុជា ហើយការគំរាមកំហែងរបស់លោកអាប់ភីស៊ីត នេះ សម្តេចតេជោបានស្នើកាលពីថ្ងៃទី៨ សីហា ២០១០ ដល់លោក Ali Abdussalam Treki ប្រធានមហាសន្និបាតអង្គការសហប្រជាជាតិ និងលោក Vitaly Churkin ប្រធានក្រុមប្រឹក្សាសន្តិសុខអង្គការសហប្រជាជាតិក្រុងញ៉ូវយកជ្រាបជាព័ត៌មាន ។
នៅក្នុងលិខិតផ្លូវការរបស់សម្តេចតេជោហ៊ុនសែន បានលើកឡើងថា លោកប្រធាន! ខ្ញុំមានកិត្តិយសសូមជំរាបឯកឧត្តមជ្រាបថា នៅថ្ងៃទី៧ សីហា ឆ្នាំ២០១០ ក្នុងកិច្ចប្រជុំជាសាធារណៈជាមួយបក្សសម្ព័ន្ធភាពប្រជាជនដើម្បីប្រជាធិបតេយ្យ លោកនាយករដ្ឋមន្ត្រីថៃបានប្រកាសយ៉ាងចំហថា “…អំពីការរំលោភដែនដី យើងនឹងលុបចោលនូវអនុស្សរណៈនៃការយោគយល់គ្នា ប្រសិនបើមិនអាចដោះស្រាយបញ្ហានេះបាន យើងនឹងប្រើទាំងមធ្យោបាយការទូត ទាំងមធ្យោបាយយោធា” ។
ពាក្យសំដីរបស់លោកនាយករដ្ឋមន្ត្រីថៃគឺមានន័យម៉្យាងជាការគំរាមកំហែងយ៉ាងជាក់ច្បាស់ថាថៃនឹងលុបចោលជាឯកតោភាគីនូវឯកសារច្បាប់ទ្វេភាគី ពោលគឺអនុរស្សរណៈនៃការយោគយល់គ្នា ចុះហត្ថលេខានៅថ្ងៃទី១៤ មិថុនា ឆ្នាំ២០០០ រវាងរដ្ឋាភិបាលកម្ពុជា និងរដ្ឋាភិបាលថៃ ដើម្បីខណ្ឌសីមាព្រំដែន និងម៉្យាងទៀតជាការគំរាមយ៉ាងជាក់ច្បាស់ថានឹងប្រើកំលាំងយោធារំលោភបំពានមកលើកម្ពុជា ដើម្បី “ដោះស្រាយ” បញ្ហាខណ្ឌសីមាព្រំដែនដែលមានខណ្ឌសីមាច្បាស់រួចហើយតាមអនុសញ្ញាឆ្នាំ១៩០៤ សន្ធិសញ្ញាឆ្នាំ១៩០៧ ក៏ដូចជាតាមផែនទីដែលផលិតដោយគណៈកម្មការបារាំង-សៀម ដែលត្រូវបានបង្កើតឡើងដោយអនុសញ្ញាខាងលើនេះ ។
ការគំរាមប្រើកំលាំងយោធារំលោភបំពានមកលើកម្ពុជាដើម្បីដោះស្រាយបញ្ហាព្រំដែននោះ នាយករដ្ឋមន្ត្រីថៃរំលោភលើមាត្រាទី២.៣ និង២.៤ នៃធម្មនុញ្ញអង្គការសហប្រជាជាតិ ។ ចំពោះប្រទេសកម្ពុជាវិញ សូមបញ្ជាក់ជាថ្មីនូវនយោបាយខ្ជាប់ខ្ជួនថានឹងមិនប្រើកំលាំងអាវុធដើម្បីដោះស្រាយបញ្ហាណាមួយជាមួយប្រទេសជិតខាងឡើយ ។ ក៏ប៉ុន្តែកម្ពុជារក្សាសិទ្ធិស្រប ច្បាប់របស់ខ្លួន ក្នុងការការពារអធិបតេយ្យភាព និងបូរណភាពទឹកដីរបស់ខ្លួន ក្នុងករណីមានអំពើឈ្លានពានដោយចេតនា៕
ចែករំលែកព័តមាននេះ