រាជធានីភ្នំពេញ៖ ចោរមួយក្រុមបានបើករថយន្តហ៊ីយ៉ាន់ដាយចំណុះ២តោន១គ្រឿង ចូលទៅលួចដឹកយកឥដ្ឋ និងស៊ីម៉ង់ត៍ចេញពីការដ្ឋានសំណង់ចេតិយ៍មួយកន្លែង ស្ថិតនៅក្នងវត្តភ្នៀតសម្ពលី ។ តែដោយសារទៅមុខលែង ទើបក្រុមចោរបានរត់គេចចោលរថយន្តបាត់អស់ ។ ក្រោយមករថយន្តនោះត្រូវបានប្រជាពលរដ្ឋប្រទះឃើញ…
រាជធានីភ្នំពេញ៖ ចោរមួយក្រុមបានបើករថយន្តហ៊ីយ៉ាន់ដាយចំណុះ២តោន១គ្រឿង ចូលទៅលួចដឹកយកឥដ្ឋ និងស៊ីម៉ង់ត៍ចេញពីការដ្ឋានសំណង់ចេតិយ៍មួយកន្លែង ស្ថិតនៅក្នងវត្តភ្នៀតសម្ពលី ។ តែដោយសារទៅមុខលែង ទើបក្រុមចោរបានរត់គេចចោលរថយន្តបាត់អស់ ។
ក្រោយមករថយន្តនោះត្រូវបានប្រជាពលរដ្ឋប្រទះឃើញ និងបង្កឲ្យមានការភ្ញាក់ផ្អើលឡើងកាលពីវេលាម៉ោង៧និង១០នាទីព្រឹកថ្ងៃទី២៣ ខែមីនា ឆ្នាំ២០១៨ នៅក្នុងវត្តភ្នៀតសម្ពលី ស្ថិតនៅក្នុងភូមិស្រែអំពិល សង្កាត់ស្នោរ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលត្រូវចាប់ខ្លួននោះឈ្មោះ ជួប ផល្លា អាយុ២៨ឆ្នាំ ស្នាក់នៅមិនពិតប្រាកដ និងមានស្រុកកំណើតនៅក្នុងភូមិប្រយុទ្ធ ឃុំប៉ាលហាល ស្រុកជាំក្សាន្ត ខេត្តព្រះវិហារ ។
ព័ត៌មានបានឲ្យដឹងថា រថយន្តដែលពួកចោរបើកយកទៅធ្វើសកម្មភាពនោះ ម៉ាកហ៊ីយ៉ាន់ដាយពណ៌ស ចំណុះ២តោន ពាក់ស្លាកលេខទ – 0231ភព3 ហើយរថយន្តនេះ គឺជារថយន្តដឹកឥដ្ឋរបស់ក្រុមហ៊ុនឡឥដ្ឋណាមួយទៀតផង និងមានដាក់លេខទូរស័ព្ទ០២៣៦៥០៦៧៦៧នៅលើស្លាក តើការបើកបររបស់ខ្ញុំដូច ម្ដេចដែរ ? ទៀតផង ។ ចំណែកឥដ្ឋដែលត្រូវចោរលួចនោះមានចំនួនប្រមាណ៧ពាន់ដុំ និងស៊ីម៉ង់ត៍ជិត២តោន ដែលមានទាំងសម្ភារដែលព្រះសង្ឃទើបទិញយកទៅដាក់ នៅការដ្ឋានសំណង់ចេតិយ៍នៅក្នុងវត្តខាងលើ កាលពី២ថ្ងៃមុន ។
ដោយខណៈនោះមានឥដ្ឋចំនួន១ម៉ឺនដុំ និងស៊ីម៉ង់ត៍ចំនួន៣តោន ប៉ុន្តែជាងបានយកប្រើប្រាស់នៅក្នុងការធ្វើគ្រឹះអស់មួយចំនួនហើយ នៅសល់មួយចំនួននេះ ត្រូវបានចោរលើកដាក់រថយន្តទាំងអស់ ។ ប្រភពដដែលបានបន្តទៀតថា មិនមានរណាម្នាក់បានដឹងថា ក្រុមចោរមានគ្នាប៉ុន្មាននាក់នោះឡើយ ប៉ុន្តែប្រហែលជាមានគ្នាច្រើន ។ ចំណែកការចូលទៅធ្វើសកម្មភាពនោះអាចធ្វើឡើងនៅវេលាទៀបភ្លឺឈានចូលថ្ងៃទី២៣ ខែមីនា ហើយចូលទៅមុនពេលមេឃធ្លាក់ភ្លៀងទៀតផង ។ លុះពេលដែលពួចោរលើកសម្ភារដាក់ក្នុងរថយន្តហើយ បើកចេញគេចខ្លួន ស្រាប់តែមេឃភ្លៀងបណ្ដាលឲ្យដីដែលទើបចាក់លុបប្រឡាយថ្មីៗ ទន់ជ្រាយ ទើបបណ្ដាលឲ្យរថយន្តជាប់ផុងតែម្ដង ។
បន្ទាប់មកក្រុមចោរបានរើឥដ្ឋចេញពីក្នុងរថយន្តវិញ បានខ្លះហើយ ដើម្បីបើករថយន្តគេចខ្លួន ប៉ុន្តែសង្ស័យថា រើមិនទាន់ ក៏ភ្លឺទៅហើយ ទើបទុករថយន្តចោល និងរត់គេចខ្លួនបាត់អស់ ។
នគរបាលបានឲ្យដឹងថា ពេលកម្លាំងទៅដល់កន្លែងកើតហេតុបានធ្វើការឃាត់ខ្លួនបុរសម្នាក់ ដែលមានការជនសង្ស័យថា ជាបក្សពួកចោរ ហើយធ្វើការឆែកឆេរបានរកឃើញមានថ្នាំញៀន១កញ្ចប់នៅជាប់ខ្លួនជននោះទើបនាំទៅសួរនាំនៅប៉ុស្តិ៍ ប៉ុន្តែក្រោយសាកសួរជននេះបានបដិសេធន៍ថា ខ្លួនមិនមានការពាក់ព័ន្ធទៅ នឹងរថយន្តដឹកឥដ្ឋនេះឡើយ រូបគេបានមកពីខេត្តព្រះវិហារ មកលេងមីងនៅផ្សារដើមអម្ពិល ហើយស្របពេលមានរឿងនេះកើតឡើងក៏ត្រូវនគរបាលឃាត់ខ្លួនតែម្ដង ។ បន្ទាប់មកនគរបាលប៉ុស្តិ៍បានកសាងសំណុំរឿងបញ្ជូនជននេះទៅសួរនាំបន្តនៅផ្នែកនគរបាលព្រហ្មទណ្ឌខណ្ឌពោធិ៍សែនជ័យ ព្រោះបុរសនេះបើគ្មានការពាក់ព័ន្ធ និងចោរកម្មខាងលើក៏ជាប់រឿងមានថ្នាំញៀនជាប់ខ្លួនដែរ ៕
ចែករំលែកព័តមាននេះ