តើការបើករថយន្តថយក្រោយមានវិធីសាស្ត្រ អ្វីខ្លះ ? ការបើករថយន្តថយក្រោយ គឺជារឿងស្ទើរតែឈឺក្បាលសម្រាប់អ្នកដែលទើបហាត់បើកបរថ្មីៗ ពេលខ្លះអាចមិនធ្លាប់ រហូតធ្វើឲ្យកើតគ្រោះថ្នាក់ក៏មាន ។ ដូច្នេះ ថ្ងៃនេះ យើងមកឈ្វេងយល់ពីវិធីសាស្ត្របើករថយន្តថយក្រោយ ដែលអ្នកបើកថ្មីគួរជ្រាប និងអាចអនុវត្តតាមដោយងាយៗដូចជា ៖
១-បើកយឺតៗ ៖
ការបើករថយន្តថយក្រោយគួរតែបន្ថយល្បឿន ព្រោះវានឹងធ្វើឲ្យអ្នកអាចគ្រប់គ្រងដៃចង្កូតបានល្អជាងការបើកក្នុងល្បឿនលឿនខ្លាំង ។
២-បម្លាស់ទីតិចៗនៅពេលបង្វិលចង្កូត ៖
នៅពេលយើងកំពុងបត់ដៃចង្កូត ក្នុងខណៈពេលបើកថយក្រោយ គួរតែមានការបម្លាស់ទីរថយន្តតិចៗ ព្រោះវានឹងអាចជួយថែទាំកង់រថយន្តកុំឲ្យកកិតខ្លាំងជាមួយផ្លូវផងដែរ ។
៣-ចង់ឲ្យរថយន្តបែរទៅខាងណា គឺកាច់ចង្កូតទៅខាងនោះ ៖
តាមក្បួនខ្នាតនៃការបើករថយន្តថយក្រោយ ប្រសិនបើយើងចង់ឲ្យរថយន្តងាកទៅខាងណា គឺត្រូវកាច់ចង្កូចទៅខាងនោះ ដូចជា យើងចង់ឲ្យរថយន្តងាកទៅខាងឆ្វេង គឺត្រូវកាច់ចង្កូតទៅខាងឆ្វេង ។
៤-បើកថយក្រោយក្នុងផ្លូវចង្អៀត ៖
បើមានភាពចាំបាច់ត្រូវបើករថយន្តថយ ក្រោយក្នុងពេលដែលមានចរាចរណ៍ណែនណាន់ ចូរបើកភ្លើងសញ្ញា ហើយមើលផងថា រថយន្តឆ្លងកាត់ទៅមកហួសពីរង្វង់នៃការបត់របស់យើងឬទេ ទាំងផ្នែកមុខ-ក្រោយ និងឆ្វេង-ស្តាំ ។
៥-មើលចម្ងាយផ្នែកខាងក្រោយឲ្យល្អ ៖
ការបើកថយក្រោយ ដែលផ្នែកខាងក្រោយមានជញ្ជាំង ហើយយើងខ្លាចថា រថយន្តនឹងទៅបុកជញ្ជាំងនោះ គឺត្រូវជាន់ហ្វ្រាំង វានឹងជួយដល់ការបើកថយក្រោយ ។
យើងក៏អាចមើលភ្លើងសញ្ញាបានដូចគ្នា បើសិនជាភ្លើងសញ្ញាកាន់តែតូចទៅ បង្ហាញថា អ្នកបើកបរជិតដល់ជញ្ជាំងហើយ ប៉ុន្តែបើពន្លឺភ្លើងនោះធំនៅឡើយបង្ហាញថា អ្នកអាចបើករថយន្តថយក្រោយបានទៀត ។
៦-មើលរថយន្តចតនៅក្បែរខាង ៖
ការមើលបែបនេះ ក៏ជាវិធីមួយទៀតដែលអាចធ្វើបានដូចគ្នាដែរ ។ នៅពេលយើងបើករថយន្តថយក្រោយ ចូរសង្កេតមើលទ្វាររបស់រថយន្តចតនៅសងខាង ហើយព្យាយាមធ្វើម៉េច ឲ្យទ្វាររថយន្តរបស់យើងស្មើជាមួយទ្វាររថយន្តទាំងនោះ ។
លោកអ្នកដែលទើបតែហាត់បើកបររថយន្តថ្មីៗ ឬសម្រាប់អ្នកមិនស្ទាត់ក្នុងការបើករថយន្តថយក្រោយ គឺអាចយកតិចនិកនេះទៅអនុវត្តបាន ៕
ចែករំលែកព័តមាននេះ