អ្នកជំនាញ ៖ រថយន្តគ្មានអ្នកបើកបរនៅមិនទាន់មានសុវត្ថិភាព
លោកស្រី Mary Cummings សាស្ត្រាចារ្យនៅមហាវិទ្យាល័យ Duke University Pratt School of Engineering…
លោកស្រី Mary Cummings សាស្ត្រាចារ្យនៅមហាវិទ្យាល័យ Duke University Pratt School of Engineering និងជានាយកមន្ទីរពិសោធន៍មនុស្សនិងភាពស្វយ័ត និយាយថា រថយន្តប្រើបច្ចេកវិទ្យាគ្មានអ្នកបើកបរ ត្រូវតែឆ្លងកាត់ការធ្វើតេស្តស្តង់ដាអាចទទួលយកបានសិន មុននឹងអនុញ្ញាតឲ្យបើកបរនៅលើផ្លូវ ។
លោកស្រី Cummings បានប្រាប់ CNBC នៅថ្ងៃអាទិត្យថា ៖« អ្នកមិនអាចទៅអាកាសយានដ្ឋាន និងហោះហើរក្នុងយន្តហោះ មានប្រព័ន្ធចុះចតស្វ័យប្រវត្តិថ្មី ដែលមិនបានសាកល្បងជាមុនទេ » ។
លោកស្រីបន្តថា ការធ្វើតេស្តតែម្យ៉ាងដូចៗគ្នាទៅលើរថយន្តគ្មានអ្នកបើកបរ គឺជាការអនុវត្តមួយដែលគ្មានសុវត្ថិភាព និងមានចន្លោះប្រហោងច្រើន ។ លោកស្រីថា ៖« ខ្ញុំបានលើកឡើងជាច្រើនលើកហើយថា រថយន្តប្រើបច្ចេកវិទ្យាគ្មានមនុស្ស គួរតែធ្វើតេស្តលើកាមេរ៉ារថយន្តជាមុន ។ តែអ្វីដែលខ្ញុំមិនគាំទ្រ គឺការធ្វើតេស្តនៅលើផ្លូវពិតៗ ហើយយកមនុស្សមកធ្វើតេស្ត » ។
កាលពីថ្ងៃចន្ទ រថយន្តគ្មានអ្នកបើកបររបស់ Uber បានបុកស្ត្រីម្នាក់អាយុ៤៩ឆ្នាំ ស្លាប់នៅផ្លូវក្នុងទីក្រុង Tempe រដ្ឋអារីហ្សូណា ។ ហេតុនេះ Uber បានសម្រេចចិត្តផ្អាកការធ្វើតេស្តរបស់ខ្លួននៅគ្រប់ទីកន្លែង ។
ប៉ុន្តែលោក Jim Scheinman ដៃគូគ្រប់គ្រងបង្កើតក្រុមហ៊ុនវិនិយោគលើទូរស័ព្ទចល័ត និងអ៊ីនធើរណេត Maven Ventures និយាយថា ការប្រើប្រាស់បច្ចេកវិទ្យានេះ នឹងជួយឲ្យសង្គមយើងកាត់បន្ថយគ្រោះថ្នាក់ចរាចរណ៍ ។ លោកថា ៖« មនុស្សមួយចំនួនដែលមិនអាចបើកបររថយន្តបាន ដូចជា ជនពិការភ្នែក និងមនុស្សចាស់ នឹងអាចទទួលបានផលប្រយោជន៍ពីការប្រើប្រាស់បច្ចេកវិទ្យានេះ » ។
លោក Bob Lutz អតីតអនុប្រធានក្រុមហ៊ុនផលិតរថយន្តអាមេរិក General Motors បានឯកភាពលើចំណុចដែលថា រថយន្តប្រើប្រាស់បច្ចេកវិទ្យាគ្មានអ្នកបើកបរ គឺមិនទាន់មានសុវត្ថិភាពលើផ្លូវថ្នល់នៅឡើយ ។ ប្រសិនបើបច្ចេកវិទ្យានេះវិវត្តន៍ទៅមុខកាន់តែប្រសើរ វានឹងអាចជួយការពារមិនឲ្យមានការបុកស្លាប់ដោយការធ្វេសប្រហែសរបស់អ្នកបើកបរជាមនុស្ស ។ លោកថា ៖« តៃកុងជាមនុស្សងាយនឹងបែកអារម្មណ៍ តែសម្រាប់បច្ចេកវិទ្យាស្វ័យប្រវត្តិរបស់រថយន្តវិញ វាមិនចេះបែកអារម្មណ៍ឡើយ » ។
លោកនៅតែជឿជាក់ថា ទោះបីជាបច្ចេកវិទ្យានេះមានចន្លោះប្រហោងធ្វើឲ្យមនុស្សស្លាប់ក្តី ប៉ុន្តែចំនួននេះនៅតិចជាងការស្លាប់ដែលបង្កឡើងដោយសារអ្នកបើកបរជាមនុស្សដែរ ។
តើអ្នកគិតយ៉ាងណាចំពោះបច្ចេកវិទ្យាថ្មីនេះ? តើអ្នកហ៊ានជិះនៅក្នុងរថយន្តប្រភេទនេះឬទេ ?
ចែករំលែកព័តមាននេះ