ខេត្តព្រៃវែង ៖ ទំនិញខូចគុណភាពចំនួន១០មុខ ស្មើនឹងទម្ងន់១១៩ គីឡូក្រាម ត្រូវបានមន្ត្រីជំនាញកាំកុងត្រូលសាខាខេត្តព្រៃវែង រកឃើញ និងដកហូតទុកយកទៅបំផ្លាញចោល ក្នុងពេលចុះទៅត្រួតពិនិត្យនៅតាមស្តង់លក់ដូរជាច្រើន ក្នុងផ្សារច្រេស ដែលស្ថិតក្នុងភូមិចន្ទ័គ្រឹះស្នា ឃុំច្រេស ស្រុកមេសាង ខេត្តព្រៃវែង កាលពីព្រឹកថ្ងៃទី២១ មិនា ម្សិលម៉ិញនេះ ។
សកម្មភាពចុះពិនិត្យគុណភាពទំនិញនេះ ធ្វើឡើងក្នុងគោលបំណង ដើម្បីការពារសុខមាលភាពជូនប្រជាពលរដ្ឋ និងរួមចំណែកលើកស្ទួយសេដ្ឋកិច្ចជាតិផងដែរ ។ ជាមួយគ្នានេះមន្ត្រីកាំកុងត្រូលបានធ្វើការពន្យល់ណែនាំ និងបង្ហាញដល់ក្រុមអាជីវករអំពីវិធីសាស្ត្រថែទាំ ការដាក់តាំងលក់ និងការរក្សាទុកមុខទំនិញឲ្យស្របទៅតាមលក្ខណ និងផ្តោតទៅលើអនាម័យផងដែរ ព្រមទាំងបានបង្រៀនក្រុមអាជីវករ និងប្រជាពលរដ្ឋអំពីរបៀបមើលកាលបរិច្ឆេទនៃទំនិញ សម្រាប់ជាគុណប្រយោជន៍ដល់សុខភាពរបស់អ្នកប្រើប្រាស់ទៀតផង ។
ដោយឡែកសម្រាប់ទំនិញខូចគុណភាពដែលត្រូវបានមន្ត្រីជំនាញកាំកុងត្រូវរកឃើញ និងដកហូតបាននោះរួមមាន ទឹកក្រូច ទឹកសណ្តែក ស្រាបៀរ ទឹកដោះគោខាប់ ពោតកំប៉ុង កាពិ ទឹកផ្លែឈើ សាំម៉ូរ៉ៃ ចាហួយដូង និងឡេល្ពៅដែលគ្មានស្លាកសញ្ញាត្រឹមត្រូវផងដែរ ។ ទំនិញខូចគុណភាពទាំងអស់នេះត្រូវបានមន្ត្រីកាំកុងត្រូលដកហូតយកទៅរក្សាទុកនៅស្នាក់ការសាខាកាំកុងត្រូលខេត្ត ដើម្បីប្រមូលផ្តុំធ្វើការដុតបំផ្លាញចោល ។
ប៉ុន្តែអ្វីដែលគួរឲ្យចាប់អារម្មណ៍នោះ គឺមន្ត្រីជំនាញកាំកុងត្រូលបានបញ្ជាក់ថា ក្នុងពេលដែលចុះទៅធ្វើការត្រួតពិនិត្យទំនិញនៅផ្សារច្រេសនេះ អាជីវករភាគច្រើន បានចូលរួមសហការជាមួយមន្ត្រីកាំកុងត្រូលបានល្អ ប៉ុន្តែមានអាជីវករមួយចំនួនតូច បាននាំគ្នាបិទស្តង់បិទតូប និងខ្លះទៀតរត់ពួនបាត់អស់ ក្នុងចេតនាមិនចង់ឲ្យមន្ត្រីជំនាញចូលពិនិត្យទំនិញដែលពួកគាត់ដាក់លក់នោះទេ ។
ដូច្នេះមន្ត្រីជំនាញកាំកុងត្រូល សូមសំណូមពរដល់បងប្អូនអាជីវករទាំងអស់ មិនថា តែអាជីវករនៅផ្សារច្រេសនេះទេ គឺអាជីវករនៅគ្រប់ផ្សារទាំងអស់ក្នុងខេត្តព្រៃវែង មេត្តាចូលរួមសហការជាមួយមន្ត្រីជំនាញកាំកុងត្រូលផង ក្នុងន័យ ដើម្បីការពារសុខភាពប្រជាពលរដ្ឋអ្នកប្រើប្រាស់ផង និងការពារផលប្រយោជន៍របស់ខ្លួនឯងផងដែរ ជាពិសេសសូមកុំដាក់តាំងលក់នូវរាល់ទំនិញទាំងឡាយណាដែលខូចគុណភាព ឬទំនិញដែលច្បាប់ហាមឃាត់ ៕
ចែករំលែកព័តមាននេះ