រាជធានីភ្នំពេញ ៖ ផ្ទាំងប៉ាណូផ្សាយពាណិជ្ជកម្ម មួយផ្ទាំងធំ បានបង្កឱ្យមានការរិះគន់ពីសំណាក់អ្នកធ្វើដំណើរឆ្លងកាត់ តំបន់នោះស្ទើរគ្រប់ៗគ្នា ដោយសារតែមានភាពសិចស៊ីជ្រុល ធ្វើឱ្យខូចសីលធម៌សង្គម ដែលសាលារាជធានីភ្នំពេញគួរពិនិត្យ និងមានការកែសំរួលឡើងវិញ ។ ផ្ទាំងប៉ាណូផ្សាយពាណិជ្ជកម្មនោះត្រូវបានគេចាប់ ឬបិទភ្ជាប់ជាមួយជញ្ជាំងផ្ទះប្រជាពលរដ្ឋនៅចំណុចផ្លូវបំបែកមហាវិថីព្រះមុនីវង្ស និងផ្លូវលេខ២៧១ ឬច្រមុះជ្រូកស្ថានីយលក់សាំងសូគីម៉ិច ខាងលិចស្ពានអាកាសក្បាលថ្នល់ ដែលទើបនឹងដាក់តាំងក្នុងពេលថ្មីៗនេះ ។
ផ្ទាំងប៉ាណូនោះ មានរូបភាពបុរសស្លៀកតែខោទ្រនាប់កំប៉ិតៗឈរផ្សាយពាណិជ្ជកម្មខោទ្រនាប់ម៉ាក ROSSO ធ្វើឱ្យមតិជាច្រើនមានការរិះគន់ ជាពិសេសស្ត្រី ពួកគេយល់ថា រូបភាពនេះបានធ្វើឱ្យតំលៃសីលធម៌នៅក្នុងសង្គមខ្មែរ មានការធ្លាក់ចុះ ។ មានអ្នកដំណើរជាច្រើននៅពេលធ្វើដំណើរពីចំណុចស្ពានអាកាសមក តែងបានពិនិត្យមើលស្ទើរគ្រប់ៗគ្នានៅពេលមកដល់ចំណុចភ្លើងស្តុបច្រមុះជ្រូកដែលមើលឃើញកាន់តែច្បាស់ ។ ចំពោះសុភាពស្ត្រីខ្លះ គ្រាន់តែក្រឡេកមើលមួយភ្លែតក៏ដាក់ភ្នែកចុះ ប្រកបដោយភាពអៀនខ្មាស់ ចំណែកឯស្ត្រីមួយចំនួននៅពេលដល់ចំណុចនេះ បានងើយមើលមិនដាក់ភ្នែកភ្លេចទាំងមើលផ្លូវដែលខ្លួនកំពុងបើកបរយានយន្តទៀតផង ។
ប្រជាពលរដ្ឋជាអ្នកដំណើរបានសំណូមពរដល់សាលារាជធានីភ្នំពេញគួរណែនាំឱ្យក្រុមហ៊ុនផ្សាយពាណិជ្ជកម្មខាងលើនេះមានការកែសំរួលធ្វើយ៉ាងណាឱ្យកាត់បន្ថយភាពសិចស៊ីនេះឡើងវិញ ។ ជាការពិត បើតាមការពិនិត្យក្នុងរូបភាពជាក់ស្តែង បុរសសង្ហានោះហាក់ដូចជាស្រាតននលគកតែម្តង មើលទៅគួរឱ្យព្រឺខ្លួន សូម្បីតែបុរសដូចគ្នាមើលក៏មានការអៀនខ្មាសផងដែរ ។ សាលារាជធានីភ្នំពេញ ជាពិសេសការិយាល័យផ្សព្វផ្សាយពាណិជ្ជកម្មគួរពិនិត្យរាល់ការសុំដំឡើង ឬតាំងប៉ាណូផ្សាយពាណិជ្ជកម្មឱ្យបានល្អិតល្អន់មិនគួរបណ្តោយឱ្យមានការតាំងផ្សាយរូបភាព អាសអាភាសបែបនេះតទៅទៀតនោះទេ ។ ចំពោះការផ្សាយពាណិជ្ជកម្ម គេមិនមានការជំទាស់នោះទេ តែការផ្សាយនោះត្រូវមានការពិនិត្យពិចារណាឱ្យបានល្អិតល្អន់ ព្រោះនេះជាសីលធម៌សង្គម និងជាមុខមាត់របស់ប្រទេសជាតិយើងដែលប្រកាន់នូវប្រពៃណីតាំងពី បុរាណកាលមក ៕
ចែករំលែកព័តមាននេះ