ខេត្តកំពត ៖ សេចក្តីរាយការណ៍បឋមឱ្យដឹងថា នៅមុននេះបន្តិច បុគ្គលម្នាក់ដែលស្លៀកពាក់ជាសង្ឃ និងមានឈ្មោះគណនីហ្វេសប៊ុកថា «សង្ឃម៉ារី» ត្រូវបានដោះលែងវិញហើយ ក្រោយពីសមត្ថកិច្ចខេត្តបានឃាត់ខ្លួន នាំមកសាកសួរអស់រយៈពេលជាច្រើនម៉ោង កាលពីព្រឹកថ្ងៃទី២១ មីនា នេះ ។ ការសម្រេចដោះលែងរបស់ព្រះរាជអាជ្ញាក៏បានតម្រូវឱ្យគាត់ ត្រូវធ្វើកិច្ចសន្យាបញ្ឈប់រាល់សកម្មភាពដែលគាត់ធ្លាប់ធ្វើ កាលពីកន្លងមក ។
គួររំលឹកថា កម្លាំងនគរបាលខេត្តកំពត បានឃាត់ខ្លួនបុគ្គលម្នាក់ដែលស្លៀកពាក់ជាសង្ឃ និងមានឈ្មោះគណនីហ្វេសប៊ុកថា «សង្ឃម៉ារី» ស្ថិតក្នុងភូមិព្រែកគ្រឹះ ឃុំព្រែកគ្រឹះ ស្រុកកំពង់ត្រាច ខេត្តកំពត នៅព្រឹកថ្ងៃទី២១ មីនា ក្រោយពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដាក់បញ្ជាផ្ទាល់មាត់ទៅអភិបាលខេត្តកែប ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃដដែលនេះ បានបញ្ជាផ្ទាល់មាត់ទៅអភិបាលខេត្តកែប លោក កែន សត្ថា ឲ្យស្វែងរកបុគ្គលម្នាក់ដែលស្លៀកពាក់ជាសង្ឃ និងមានឈ្មោះគណនីហ្វេសប៊ុកថា «សង្ឃម៉ារី» ដែលតែងតែបង្ហោះសារភូតកុហករឿងប្រទេសជាតិ ។ សម្តេចនាយករដ្ឋមន្ត្រីបានចេញបញ្ជាផ្ទាល់មាត់ នាឱកាសអញ្ជើញជួបសំណេះសំណាលជាមួយកម្មករ-កម្មការិនី ប្រមាណជាង១ម៉ឺននាក់ មកពីតំបន់រោងចក្រជ្រៃកោង រាជធានីភ្នំ ពេញថ្ងៃទី២១ ខែមីនា ឆ្នាំ២០១៨ នេះថា បុគ្គលនេះពូកែខាងភូត ហើយបុគ្គលនេះមិនច្បាស់ថា ទើបចូលបួស ឬក៏បួសជាសង្ឃយូរហើយ ឬក៏គ្រាន់តែកោសក់ ហើយគ្រងស្បង់បោកបញ្ឆោតគេ ។
សម្តេចតេជោ ហ៊ុន សែនមានប្រសាសន៍ថា៖ «អាម្សៀរនេះ អានេះមេភូត ឪភូត អត់មានវត្តពិតប្រាកដ […] ខ្ញុំបញ្ជារឲ្យរកអាម្នាក់នេះ» ។ ថ្លែងបណ្តើរបង្ហាញរូបភាពបុគ្គលនេះបណ្តើរសម្តេចបានបញ្ជាក់ថា បុគ្គលរូបនេះ គឺតែងតែចល័តពីកែប ចូលកំពត ជួនទៅចល័តពីកំពតចូលតាកែវ ។ សម្តេចបានដាក់បញ្ជាថា៖ «តាមមើលអាមួយនឹង កែន សត្ថា អភិបាលខេត្តកែប តាមរកអាមួយហ្នឹងថ្ងៃហ្នឹង» ។ ប្រមុខដឹកនាំបានបន្តថា លោកសង្ឃពិតប្រាកដឬអត់ ? សង្ស័យកោសក់ ហើយដាក់ស្បង់ តែ «បើមិនមែនលោកសង្ឃពិតប្រាកដ ក៏ស្រួលតែម្តងទៅ» សម្តេចបន្តថា បុគ្គលឈ្មោះ «សង្ឃម៉ារី» មិនត្រឹមតែភូតកុហករឿងធម្មតាទេ តែបានភូតកុហកថា សម្តេចត្រូវអូស្ត្រាលីចាប់ខ្លួន ជាដើម «ប៉ុន្តែអានេះភូត មហាភូត ភូតសុទ្ធតែរឿងប្រទេសជាតិ» ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ