ខេត្តកំពង់ឆ្នាំង ៖ ក្មេងប្រុសជំទង់ម្នាក់បានលង់ទឹកស្លាប់ ខណៈទៅបង់សំណាញ់ជាមួយក្រុមគ្រួសារ ។ ហេតុការណ៍នេះបានកើតឡើងនៅវេលាម៉ោង១១និង ៣០នាទីថ្ងៃត្រង់ថ្ងៃទី២១ ខែមីនា ឆ្នាំ ២០១៨ នៅចំណុចស្ទឹងជ្រៃបាក់ ស្ថិតនៅក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ។
សមត្ថកិច្ចនគរបាលនៅកន្លែងកើតហេតុបានឲ្យដឹងថា ក្មេងប្រុសជំទង់រូបនោះមានឈ្មោះ ហៃ ហុង អាយុ១៥ ឆ្នាំ នៅភូមិទឹកចេញឃុំជើងគ្រាវ ស្រុករលាប្អៀរ ។ មុនពេលកើតហេតុក្មេងប្រុសរូបនោះបានមកបង់ សំណាញ់ជាមួយក្រុមគ្រួសារដែលមានគ្នាប្រមាណបួនប្រាំនាក់ ។
តាមសំដីក្រុមគ្រួសារក្មេងប្រុសរងគ្រោះបានដឹងថា ក្រោយពីបង់ស្រលាញ់រួចរាល់ហើយ នាំគ្នាត្រឡប់ទៅផ្ទះវិញដោយចាស់ៗដើរផ្នែកខាងក្រោមទឹក ចំណែកក្មេងប្រុសរងគ្រោះដើរផ្នែកខាងលើទឹកធ្លាក់ ហើយបានធ្លាក់អន្លង់ទឹកជ្រៅ ដោយពុំមានអ្នកណាដឹងឡើយ ។ ពេលរៀបឡើងទៅផ្ទះវិញ ក្រុមគ្រួសារក៏បាត់ឈ្មោះ ហៃ ហុង ទើបនាំផ្អើលឆោឡោឡើង ហើយចុះរាវរកទើបឃើញជនរងគ្រោះស្លាប់នៅក្នុងទឹកស្ទឹងបាត់ទៅហើយ ។
ក្រោយពេលកើតហេតុសមត្ថកិច្ចបានទៅក៏បានធ្វើកោសល្យវិច្ច័យបានសន្និដ្ឋានថា ក្មេងប្រុសរងគ្រោះពិតជាបានលង់ទឹកស្លាប់ពិតប្រាកដមែន រួចបានប្រគល់សពទៅជាន់លើ ទៅក្រុមគ្រួសារធ្វើបុណ្យតាមប្រពៃណី៕
ចែករំលែកព័តមាននេះ