ខេត្តបន្ទាយមានជ័យ ៖ ក្នុងសភាពដូចអស់សង្ឃឹម បុរសម្នាក់អង្គុយម្នាក់ឯង រហូតដល់យប់ក្នុងបរិវេណវត្តបាលិលេយ្យ ក្នុងភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត ។ លុះនៅពេលសួរនាំទើបដឹងការពិតនិងសែនអាណិតជាពន់ពេក គឺគាត់ជាពលករ ដែលគេទើបបញ្ជូនមកពីថៃ ហើយពេលនេះគ្មានប្រាក់សូម្បីតែ១រៀលដើម្បីធ្វើសាហ៊ុយទៅស្រុកកំណើតទេ ។ ពលកររូបនេះឈ្មោះ វន រដ្ឋា អាយុ៣០ឆ្នាំ ជាកម្មករសំណង់នៅក្រុងបាងកក ប្រទេសថៃ និងមានទីលំនៅក្នុងភូមិក្រាំងស្បូវ ឃុំព្រះពុទ្ធ ស្រុកកណ្តាលស្ទឹង ខេត្តកណ្តាល។ ក្នុងភាពអស់សង្ឃឹមពលកររូបនេះអង្គុយនៅក្នុងបរិវេណវត្តខាងលើរហូតដល់យប់ ។
នៅពេលភ្នាក់ងារកោះសន្តិភាព សាកសួរត្រូវបានប្រាប់ថា រូបគាត់ទើបត្រូវបានគេបញ្ជូនតាមរថយន្តទ្រុងរបស់ថៃតាមច្រកទ្វារអន្តរជាតិប៉ោយប៉ែត កាលពីយប់ថ្ងៃទី១៨ ខែមីនា បន្ទាប់ពីជាប់គុកធំ(ស៊ូនប្លូ)របស់ថៃអស់រយៈពេលជាង១០ថ្ងៃ ។ គាត់បានឆ្លងព្រំដែនក្នុងខេត្តបន្ទាយមានជ័យ តាមរយៈមេខ្យល់អស់ប្រាក់២.៧០០បាត ដោយគេនាំទៅធ្វើការជាកម្មករសំណង់នៅក្រុងបាងកកបានប្រហែល១ខែ។ ប៉ុន្តែដោយសារការងារសំណង់នោះខ្លួនមិនសូវចេះក៏ត្រូវថៅកែថៃបញ្ឈប់ ប៉ុន្តែមិនបានប្រាក់សូម្បី១បាតឡើយ ។ ពលកររូបនេះនិយាយទៀតថា ខណៈកំពុងដើរទៅរករថយន្តជិះត្រឡប់មកស្រុកនៅចំណតរថយន្ត«ម៉ឈីត» ស្រាប់តែតម្រួតថៃចាប់ដាក់គុកស៊ូនប្លូអស់ជាង១០ថ្ងៃ និងទើបតែបញ្ជូនត្រឡប់ មកវិញនាពេលនេះ ។
អ្វីដែលគួរឲ្យអាណិតបំផុតនោះ គឺពលកររូបនេះអះអាងថា នាយប់ថ្ងៃ១៨ ខែមីនា នៅពេលសមត្ថកិច្ចថៃបញ្ជូនដល់ទីតាំងទទួលពលករក្នុងក្រុងប៉ោយប៉ែត ខណៈដើរចេញពីទីនោះ គាត់បានទៅអង្គុយនៅចំណុចរង្វង់មូលច្រកទ្វារអន្តរជាតិប៉ោយប៉ែតមួយយប់ទល់ភ្លឺ ព្រោះតែគ្មានប្រាក់ធ្វើដំណើរត្រឡប់ទៅស្រុកវិញ ពិសេសថ្លៃផ្ទះសំណាក់ ។ បន្ទាប់មក ក៏បន្តមកសម្រាកនៅវត្តបាលិលេយ្យមួយថ្ងៃទល់យប់ទៀតនៅថ្ងៃទី១៩ ខែមីនា ។
យ៉ាងណាក៏ដោយ តាមរយៈអ្នកយកព័ត៌មានកោះសន្តិភាព ពលកររូបនេះត្រូវបានសាខាលក់សំបុត្ររថយន្តក្រុងយីហោ«អាជីហេង»ជួយសំបុត្ររថយន្តក្រុង១សន្លឹក ដើម្បីបានបន្តដំណើរទៅជួបប្រពន្ធកូននៅឯស្រុកកំណើត ។ ក្រៅពីនេះ ដោយមើលឃើញពីការខ្វះខាតនេះ ព្រះសង្ឃគង់នៅវត្តបាលិលេយ្យនាម ម៉ាឡៃ និងអ្នកយកព័ត៌មានយើង ក៏បានជួយឧបត្ថម្ភជាប្រាក់កាសមួយចំនួនដល់ពលកររូបនេះដែរ ដើម្បីបានទិញនំចំណីហូបតាមផ្លូវ ៕
ចែករំលែកព័តមាននេះ