រាជធានីភ្នំពេញ ៖ បុគ្គលិកក្រុមហ៊ុនម្នាក់ត្រូវជនជាតិចិនស្រវឹងស្រាធ្លាក់ភ្នែកបើករថយន្តឡិចស៊ីស ស៊េរី៤៣០ ពណ៌ខ្មៅពាក់ស្លាកលេខភ្នំពេញ២L.៣០១០ បើកបុកម៉ូតូខ្ទាតមនុស្សទៅម្ខាងផ្លូវ ហើយរថយន្តជ្រុលទៅបុករបងការដ្ឋានសាងសង់អគារការិយាល័យថ្មីរបស់ក្រសួងសេដ្ឋកិច្ចនិងហិរញ្ញវត្ថុដែលមានទីតាំងកែងផ្លូវលេខ៩០និងផ្លូវលេខ៦១ ស្ថិតក្នុងសង្កាត់វត្តភ្នំ ខណ្ឌដូនពេញ កាលពីវេលាម៉ោង១២និង៥នាទីយប់ឈានចូលថ្ងៃទី៧ មករា ឆ្នាំ២០១៣ ។
ប្រជាពលរដ្ឋដែលឃើញហេតុការណ៍បានប្រាប់សមត្ថកិច្ចថា មុនពេលកើតហេតុឃើញបុរសម្នាក់ជិះម៉ូតូម៉ាកគុបជ្រុងពណ៌ទឹកប៊ិចតាមបណ្តោយផ្លូវលេខ៦១ឆ្ពោះទៅទិសខាងត្បូងលុះមកដល់កែងផ្លូវលេខ៩០ខាងកើតសាលាខណ្ឌដូនពេញ ស្ថិតក្នុងសង្កាត់វត្តភ្នំ ស្រាប់តែមានរថយន្តម៉ាកឡិចស៊ីស ពណ៌ខ្មៅដែលបើកក្នុងល្បឿនលឿនលើកំណាត់ផ្លូវលេខ៩០ពីលិចទៅកើតក៏បានបុកម៉ូតូចំពីមុខបណ្តាលឱ្យអ្នកបើកម៉ូតូបើុងទៅបុកកញ្ចក់រថយន្ត ហើយក៏ធ្លាក់មកកណ្តាលថ្នល់សន្លប់ស្តូកស្តឹងនិងមានឈាមហូរពេញផ្ទៃមុខ ។ រថយន្តមិនបានឈប់ទេ បែរជាព្យាយាមបើករត់ហើយក៏ជ្រលចង្កូតទៅបុករបងស័ង្កសីការដ្ឋានសាងសង់អគារការិយាល័យថ្មីរបស់ក្រសួងសេដ្ឋកិច្ច និងហិរញ្ញវត្ថុដែលមានកម្មករស្នាក់នៅក្នុងទីនោះរត់ចែកផ្លូវគ្នាយកប្រះអាយុរៀងខ្លួន ។ ចំណែករថយន្តខណៈពេលបុករបងការដ្ឋានក៏ទៅមុនលែងរួចពេលនោះគេឃើញបុរសម្នាក់និងស្ត្រីម្នាក់ជាជនជាតិចិនបើកទ្វាររថយន្តចេញមកខាងក្រៅ ហើយគេចខ្លួនបាត់បន្សល់ជនរងគ្រោះជាម្ចាស់ម៉ូតូត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យកាល់ម៉ែត ។
មន្ត្រីសមត្ថកិច្ចបាននិយាយថា អ្នកបើករថយន្តឡិចស៊ីសមិនបានស្គាល់អត្តសញ្ញាណទេគ្រាន់តែដឹងថាជាជនជាតិចិន ឯម្ចាស់ម៉ូតូឈ្មោះស សុភាព ភេទប្រុស អាយុ២៥ឆ្នាំ ជាបុគ្គលិកក្រុមហ៊ុនមួយស្នាក់នៅក្នុងសង្កាត់ទន្លេបាសាក់ ខណ្ឌចំការមន ។ នៅក្នុងហេតុការណ៍នេះរថយន្តបានបែកកញ្ចក់ខាងមុខនិងខូចខាតរបងស័ង្កសីរបស់ក្រសួងសេដ្ឋកិច្ចនិងហិរញ្ញវត្ថុ ឯម៉ូតូរងការខូចខាត ហើយអ្នកបើកម៉ូតូរបួសធ្ងន់ សម្រាកព្យាបាលនៅមន្ទីរពេទ្យកាល់ម៉ែត ។ រថយន្តនិងម៉ូតូត្រូវបានបញ្ជូនទៅរក្សានៅការិយាល័យនគរបាលចរាចរផ្លូវគោក ចាត់ការតាមផ្លូវច្បាប់ ៕
ចែករំលែកព័តមាននេះ