ប្រទេសកូរ៉េខាងជើង-សហរដ្ឋអាមេរិក ៖ ប្រទេសកូរ៉េខាងជើង បើតាមសារព័ត៌មានទាំងឡាយថា កំពុងតែចរចាជាមួយសហរដ្ឋអាមេរិក និងស៊ុយអែត ដើម្បីឱ្យមានការដោះលែងអ្នកទោសអាមេរិក៣នាក់ ដែលឃុំទុកដោយក្រុងព្យុងយ៉ាង ។ នេះជាសញ្ញាចុងក្រោយនៃការរីកចម្រើនខាងការទូតមកពីទស្សនវិស័យនៃការជួបគ្នាកំពូលគ្រោងធ្វើជាមួយក្រុងសេអ៊ូល និងក្រុងវ៉ាស៊ីនតោន ។
ជនជាតិអាមេរិកទាំង៣នាក់នោះមានដើមកំណើតកូរ៉េ លោក KIM HAK SONG លោក KIM SANG DUK និងលោក KIM DONG CHUL ជាប់ឃុំឃាំងនៅកូរ៉េខាងជើងក្រោយជាប់ចោទដាច់ដោយឡែកពីគ្នា ។ វាសនារបស់ពួកគេត្រូវបានពិភាក្សាតាមរយៈច្រកជាច្រើនជិត២សប្តាហ៍ ក្រោយពីប្រធានាធិបតីអាេមរិក លោកដូណាល់ ត្រាំ យល់ព្រមទទួលយកការអញ្ជើញសម្រាប់ការជួបគ្នាកំពូលមួយជាមួយមេដឹកនាំកូរ៉េខាងជើង លោកគីម ជុងអ៊ុន ដែលការអញ្ជើញនោះធ្វើឡើងតាមរយៈក្រុងសេអ៊ូល ។
ទូរទស្សន៍កូរ៉េខាងត្បូង MBC រាយការណ៍នាថ្ងៃទី១៨ មីនា ថា ក្រុងព្យុងយ៉ាង និងក្រុង
វ៉ាស៊ីនតោនកំពុងតែឈានទៅចុះហត្ថលេខាលើកិច្ចព្រមព្រៀងចុងក្រោយមួយស្តីពីការដោះលែងជនជាតិអាមេរិកទាំងនេះ ។ ពួកគេកំពុងតែរៀបចំភាពលម្អិតលើកាលបរិច្ឆេទនៃការដោះលែង ។ តាមទូរទស្សន៍នេះថា ការចរចាប្រព្រឹត្តទៅតាមរយៈបេសកកម្មកូរ៉េខាងជើងប្រចាំ អ.ស.ប នៅក្រុងញូវយ៉ក និងក្រសួងការបរទេសអាមេរិកជាផ្លូវទាក់ទងគ្នាហៅកាណាល់ក្រុងញូវយ៉ក ។
តាមទូរទស្សន៍អាមេរិក CNN ថា បញ្ហានេះក៏លើកឡើងដែរនាឱកាសនៃការពិភាក្សាគ្នា៣ថ្ងៃនៅទីក្រុងស្តុកខូល រវាងប្រមុខការទូតកូរ៉េខាងជើង លោក RI YONG HO និងសមភាគីស៊ុយអែត លោក MARGOT WALLSTROM ។
លោក KIM DONG CHUL ជាគ្រូប្រដៅសាសនាអាមេរិក-កូរ៉េត្រូវចាប់ខ្លួនកាលពី ឆ្នាំ២០១៥ ពីបទចារកម្ម ហើយទទួលការកាត់ទោសកាលពីឆ្នាំ២០១៦ ដាក់គុក១០ឆ្នាំ ។
លោក KIM HAK SONG និងលោក KIM SANG DUK អ្នកទាំង២ធ្វើការឱ្យសាកលវិទ្យាល័យវិទ្យាសាស្ត្រ និងបច្ចេកវិទ្យាក្រុងព្យុងយ៉ាង USTP ។ ពួកគេត្រូវចាប់ខ្លួនកាលពីឆ្នាំទៅមិញ ពីបទបញ្ចេញកាយវិការប្រទូស្តរ៉ាយ ៕
ចែករំលែកព័តមាននេះ