ខេត្តកណ្ដាល ៖ លំនៅឋាន២ខ្នង ដែលត្រូវបានអគ្គិភ័យឆាបឆេះអស់ទាំងស្រុង រួមជាមួយទ្រព្យសម្បត្តិព្រមទាំងរថយន្តម៉ាកឡិចស៊ីចRX-300មួយគ្រឿងនៅក្នុងផ្ទះនោះផងដែរ កំពុងសង្ស័យបណ្តាលមកពី
ទុស្សេចរន្តអគ្គិសនី ឬក៏ផ្ទុះកំប៉ុងហ្គាស ដែលហេតុការណ៍នេះកើតឡើង កាលពីវេលាម៉ោង៤រសៀលថ្ងៃទី១៩ មីនា នេះ ស្ថិតនៅក្នុងភូមិអណ្ដូង ឃុំបែកចាន ស្រុកអង្គស្នួល ខេត្កណ្ដាល ។
ប្រជាពលរដ្ឋបានឱ្យដឹងថា ផ្ទះដែលត្រូវភ្លើងឆេះនេះមាន២ខ្នង ជាប្រភេទផ្ទះល្វែងសាងសង់ពីថ្មប្រក់ស័ង្កសី១ខ្នង និងផ្ទះឈើលើរៀបបន្ទប់ថ្មក្រោម១ខ្នង ហើយពួកគាត់ក៏មិនបានដឹងថា ការឆេះនេះបណ្ដាលមកពីអ្វីពិតប្រាកដនោះឡើយ ។ ដោយឡែក នៅមុនពេលកើតហេតុ ពួកគាត់មិនបានចាប់អារម្មណ៍ថា មានភ្លើងឆេះបែបនេះទេ ព្រោះជាប់រវល់ធ្វើការងារ ប៉ុន្តែបានធុំក្លិនឈ្ងៀមយ៉ាងចម្លែក លុះពេលក្រឡេកមើលទៅផ្ទះកើតហេតុស្រាប់តែឃើញភ្លើងឆាបឆេះយ៉ាងសន្ធោរសន្ធៅបាត់ទៅហើយ។
ប្រភពដដែលបានបន្តទៀតថា ខណៈនោះបានបង្កឲ្យមានការភ្ញាក់ផ្អើលយ៉ាងខ្លាំង ហើយពួកគាត់នាំគ្នាដងទឹកជះពន្លត់ដែរ ប៉ុន្តែពន្លត់មិនឈ្នះឡើយ ។ ភ្លើងបានឆេះលឿនបំផុតតែមួយភ្លែតរាលដាលពាសពេញទាំង២ខ្នងតែម្ដង ។ចំណែកម្ចាស់ផ្ទះមិនអាចយកអ្វីចេញទាន់ឡើយ សូម្បីតែរថយន្តម៉ាកឡិចស៊ីRX-300 ពណ៌ខ្មៅ១គ្រឿង ដែលម្ចាស់ចតទុកនៅក្រោមសំយ៉ាបខាងមុខក៏យកចេញមិនទាន់ដែរ និងត្រូវបានភ្លើងឆេះខូចខាតទាំងផងដែរ។
ចែករំលែកព័តមាននេះ