ខេត្តព្រៃវែង ៖ ក្មេងទំនើងមួយក្រុម បានព្រួតគ្នាកាប់ទៅលើយុវជនម្នាក់បណ្តាលឲ្យរបួសស្ទើរដាច់ក នៅខណៈដែលយុវជនរងគ្រោះកំពុងជិះម៉ូតូចេញពីចាក់ធុងបាស់នៅក្នុងរោងការ ហើយត្រលប់ទៅផ្ទះវិញ។ ករណីនេះបានកើតឡើងកាលពីវេលាម៉ោង៨ និង១៥នាទីយប់ ថ្ងៃទី១៤ ខែមីនា នៅលើផ្លូវលំក្នុងភូមិ អញ្ចាញ ឃុំក្របៅ ស្រុកកំចាយមារ ខេត្តព្រៃវែង។ ជនរងគ្រោះមានឈ្មោះ ចេន ភា ភេទប្រុស អាយុ២៣ឆ្នាំ មានមុខរបរដើរចាក់ធុងបាស់តាមរោងបុណ្យ និងរោងការ ហើយមានទីលំនៅក្នុងភូមិ កើតហេតុ។ យុវជនរងគ្រោះត្រូវក្រុមក្មេងទំនើង កាប់ត្រូវ១ដាវចំកផ្នែកខាងក្រោយ បណ្តាលឲ្យរយះស្ទើរ ដាច់ក ហើយត្រូវបានគេបញ្ជូនទៅសង្គ្រោះភ្លាមៗ នៅមន្ទីរពេទ្យបង្អែកស្រុកកំចាយមារ ក្រោយមកដោយ របួសធ្ងន់ធ្ងរពេក គ្រូពេទ្យក៏បញ្ជូនបន្តទៅសង្គ្រោះនៅមន្ទីរពេទ្យឯរាជធានីភ្នំពេញតែម្តង។
លោកវរៈសេនីត្រី ផាត់ សុជោត ប្រធានមន្ទីរយុត្តិធម៌កងរាជអាវុធហត្ថខេត្តព្រៃវែង បានឲ្យដឹងថា នៅយប់កើតហេតុនោះ គឺជាថ្ងៃចូលរោងការរបស់ឈ្មោះ ជួន ជាម ចំណែកជនរងគ្រោះជាមិត្តភក្តិរបស់កូនកំលោះ ក៏បានយកធុងបាសទៅចាក់ឲ្យរាំកម្សាន្តកំដររោងចំនួន២ម៉ោង ដោយមិនយកលុយនោះទេ ហើយពេលចាក់ធុងបាស់រាំនោះ ទាំងភ្ញៀវខាងកូនស្រី និងភ្ញៀវខាងកូនប្រុស ដែលផឹកស៊ីកំដររោងនោះ បាននាំគ្នាចូលរាំលេងសប្បាយទាំងអស់គ្នាផងដែរ។ រហូតដល់ម៉ោងកំណត់ គឺម៉ោង៨យប់ម្ចាស់ធុងបាស់ ក៏បិទធុងបាស់រៀបចំទុកដាក់ រួចក៏ជិះម៉ូតូត្រលប់ទៅផ្ទះវិញតែម្នាក់ឯង លុះពេលចេញផុតពីរោងការបានតែ មួយគីឡូម៉ែត្រ ក៏ស្រាប់តែមានក្រុមក្មេងទំនើង២ទៅ៣នាក់ ជិះម៉ូតូតាមទៅពីក្រោយ ហើយកាប់ជន រងគ្រោះត្រូវមួយដាវ បណ្តាលឲ្យរងរបួសយ៉ាងធ្ងន់ធ្ងរ ឯក្រុមក្មេងទំនើងក្រោយធ្វើសកម្មភាពរួច ក៏នាំគ្នារត់គេចខ្លួនបាត់អស់។
លោក ផាត់ សុជោត បានបន្តទៀតថា ក្រោយពីទទួលបានពត៌មាន ពាក់ពន្ធ័នឹងហេតុការណ៍នេះភ្លាម លោកឧត្តមសេនីយត្រី ឈួន គឹមសាន មេបញ្ជាការកងរាជអាវុធហត្ថ ខេត្តព្រៃវែង បានបញ្ជាឲ្យរូបលោក ដឹកនាំកម្លាំងសហការជាមួយអាវុធហត្ថស្រុកកំចាយមារ ចុះស្រាវជ្រាវភ្លាម ហើយរហូតដល់ម៉ោង១០ និង៣០នាទី ថ្ងៃទី១៥ មីនា កម្លាំងអាវុធហត្ថក៏ធ្វើការ ឃាត់ខ្លួនជនសង្ស័យបានម្នាក់ ឈ្មោះ តឿ ខី អាយុ២៣ឆ្នាំ មានទីលំនៅក្នុងភូមិតាអី ឃុំក្របៅ ស្រុកកំចាយមារ ដែលបម្រុងរត់គេចខ្លួនទៅខេត្តក្រចេះ។ ក្រោយពីត្រូវចាប់ខ្លួន ជនសង្ស័យរូបនេះ បានឆ្លើយសារភាពថា រូបគេពិតជាបានចូលរួមក្នុងសកម្មភាពកាប់ជនរងគ្រោះមែន ប៉ុន្តែរូបគេមិនបានកាប់ជនរងគ្រោះទេ គ្រាន់តែជាអ្នកបើកម៉ូតូប៉ុណ្ណោះ។
ចំណែកអ្នកកាប់គឺបក្ខពួករបស់គេម្នាក់ទៀតឈ្មោះ ស្លេះ ភេទប្រុស អាយុ២០ឆ្នាំ មានទីលំនៅក្នុងភូមិបូសឫស្សី ឃុំដូនតី ស្រុកពញាក្រែក ខេត្តត្បូងឃ្មុំ ដែលជិះពីក្រោយជាអ្នកកាប់ជនរងគ្រោះ។ ហើយក្រោយពីធ្វើសកម្មភាពរួច ពួកគេក៏បែកផ្លូវគ្នារៀងខ្លួន ពេលនេះឈ្មោះ ស្លេះ មិនដឹងទៅដល់ទីណាទេ។ បច្ចុប្បន្ននេះជនសង្ស័យ តឿ ខី ត្រូវបានឃាត់ខ្លួនបញ្ជូនទៅកាន់បញ្ជាការដ្ឋានកងរាជអាវុធហត្ថខេត្តព្រៃវែង ដើម្បីកសាងសំណុំរឿងបញ្ជូនទៅតុលាការ ចំណែកបក្ខពួកម្នាក់ទៀតដែលរត់គេចខ្លួន កម្លាំងសមត្ថកិច្ចកំពុងស្រាវជ្រាវតាមរកចាប់ខ្លួនផងដែរ៕
ចែករំលែកព័តមាននេះ