ខេត្តស្វាយរៀង ៖ ប្រជាពលរដ្ឋក្នុងខេត្តស្វាយរៀងបានធ្វើការរិះគន់ដល់មន្ត្រីជំនាញកាំកុងត្រូលខេត្ត ស្វាយរៀងយ៉ាងខ្លាំងដោយបានបណ្តោយឲ្យឈ្មួញនាំទំនិញគ្រប់ប្រភេទ ដូចជាបន្លែផ្លែឈើ ត្រីសាច់ ពោះគោ ពោះជ្រូក គ្រឿងក្នុងសត្វ ស៊ុត គ្រឿងកំប៉ុងជិតហួសថ្ងៃកំណត់ តាមច្រករបៀងមួយចំនួនក្នុងខេត្ត មិនដែលឃើញមានមន្ត្រីកាំកុងត្រូលជំនាញចុះមកពិនិត្យអ្វីនោះឡើយ។ បើតាមសេចក្ដីរាយការណ៍ ពីប្រជាពលរដ្ឋបានឲ្យដឹងថា នៅថ្ងៃទី១៥ ខែមីនា ឆ្នាំ២០១៨នេះ នៅតាមច្រករបៀងមួយចំនួននៅ ក្រុងបាវិត និងច្រករបៀងមួយចំនួនទៀតមាននៅច្រករបៀងសំយោង ឃុំសំយោង ស្រុកកំពង់រោទិ៍ និងច្រកតំបន់បាត្រាស់ ឃុំដូង ស្រុករមាសហែក ច្រកទ្វេរភាគីបុសមន ស្រុករំដួលជាដើម មានឈ្មួញកំពុងមមាញឹកយ៉ាងខ្លាំងក្នុងការដឹកជញ្ជូនទំនិញជាគ្រឿងកំប៉ុង បន្លែផ្លែឈើ ត្រីសាច់ ស៊ុត គ្រឿងក្នុងសត្វដោយរលូនដោយសង្ស័យថាមានការបើកភ្លើងខៀវពី លោក ផឹង និល មេកាំកុងត្រូលខេត្តស្វាយរៀង និងកូនចៅចាំប្រមូលសំណែនពីឈ្មួញដឹកទំនិញទាំងនោះ យ៉ាងត្រជាក់សាច់ពុំមានការរំខានពីមន្ត្រីកាំកុងត្រូលនោះឡើយ។ សេចក្តីរាយការណ៍បានឲ្យដឹងទៀតថា មានច្រករបៀងខ្លះមិនដែលឃើញមានវត្តមានមន្ត្រីកាំកុងត្រូលប្រចាំការនៅទីនោះទេឃើញមានតែកម្មករឈរចាំរាប់ក្បាលម៉ូតូ និងក្បាលរថយន្តដឹកទំនិញយ៉ាងរំភើយទៅវិញ មិនដែលពិនិត្យអ្វីសោះឲ្យតែមាន លុយបង់គ្រប់ចំនួនទៅគឺរួចស្រេចទៅហើយ។
ប្រជាពលរដ្ឋបានបង្ហើបឲ្យដឹងទៀតថា ជារៀងរាល់ថ្ងៃនៅ តាមច្រករបៀងមួយចំនួនក្នុងខត្តស្វាយរៀង ក៏មានឈ្មួញជន ជាតិវៀតណាមជាច្រើននាក់ បាននឹងកំពុងដឹកជញ្ជូនទំនិញដូចស្រមោចជញ្ជូនស្ករជាច្រើនប្រភេទ នាំចូលមកលក់នៅតាម បណ្តាទីផ្សារមួយចំនួនក្នុងភូមិសាស្ត្រ នៃទឹកដីខេត្តស្វាយរៀង។ ហើយគេសង្ស័យថា រាល់មុខទំនិញ ទាំងអស់នោះពុំដែលត្រូវបានមន្ត្រីជំនាញចុះទៅធ្វើការត្រួតពិនិត្យរកសារធាតុ ដែលច្បាប់ហាមឃាត់ នោះទេ គឺនិយាយជារួមចូលម៉ាសេរីគ្មានការរំខានពីសំណាក់មន្ត្រីជំនាញនោះឡើយ។ ប្រភពបន្តថា បញ្ហាទំនិញ ដែលត្រូវបានឈ្មួញធ្វើការនាំចូល គឺកើតមានច្រើននៅវេលាទៀបភ្លឺ (ចន្លោះពីម៉ោង៥ទៅម៉ោង៦ព្រឹក) ដោយដឹកជាលក្ខណៈម៉ូតូ ឬម៉ូតូរ៉ឺម៉ក ដោយមានទ្រុងដាក់ទំនិញ យ៉ាងងាយស្រួលពុំចាំបាច់មានរថយន្តដឹកជញ្ជូនបន្តនោះទេ គឺដឹកយកទៅដាក់ឱ្យម៉ូយនៅតាមស្តង់ ឬតាមទីផ្សារនានា ជាពិសេសនៅក្រុងបាវិត។ ហើយបន្តយកមកដល់ផ្សារមួយចំនួននៅក្នុង ក្រុងស្វាយរៀងផងដែរ ហើយក៏មានពួកឈ្មួញខ្លះបានបន្តដឹកម្ហូបចំណី..ទំនិញផ្លែឈើទាំងនោះ ទៅដាក់នៅតាមបណ្តាអាហាដ្ឋាន ភោជនីយដ្ឋាន និងកាស៊ីណូផងដែរ។
ប្រភពដដែលបានបន្ថែមទៀតថា នាពេលកន្លងមកនៅតាមច្រករបៀងដែលត្រូវបានឈ្មួញនាំចូលនូវផ្លែឈើ បន្លែ ត្រីសាច់គ្រឿងក្នុងសត្វផ្សេងៗនោះតែងតែមានមន្ត្រីជំនាញចុះទៅត្រួតពិនិត្យរកសារធាតុគីមីដែលច្បាប់បានហាមឃាត់មិនឱ្យប្រើលើមុខម្ហូបចំណីអាហារ ឬប្រើមានចំនួនកម្រិតកំណត់លើបន្លែ ផ្លែឈើ ឬសាច់សត្វហើយជាលទ្ធផលគឺបានរកឃើញនូវសារធាតុថ្នាំបាញ់សត្វល្អិតនៅលើស្លឹកគូឆាយ និងមើមខ្ទឹមហើយមន្ត្រីជំនាញទាំងនោះក៏ធ្លាប់បានធ្វើការណែនាំដល់ពួកឈ្មួញឱ្យដឹងអំពីផលប៉ះពាល់ នៃសារធាតុគីមីដែលច្បាប់ហាមឃាត់ចំពោះសុខភាពរបស់អ្នកបរិភោគ។ ក៏ប៉ុន្តែមហាជននៅតែដាក់ការ សង្ស័យថា ពេលខ្លះគេឃើញមន្ត្រីកាំកុងត្រូលដាក់ត្រួតពិនិត្យហើយមានថតចុះផ្សាយពីសកម្មភាព ចុះត្រួតពិនិត្យ ក៏ប៉ុន្តែមួយថ្ងៃក្រោយមកគេឃើញមន្ត្រីកាំកុងត្រូលដដែលទៅដាក់កុងត្រូលជជុះឈ យកលុយពីឈ្មួញយ៉ាងរំភើយមិនដឹងថា លោកមេកាំកុងត្រូលដឹង ឬយ៉ាងណាទេ។
ហើយនេះក៏ជាការផ្គើននឹងប្រសាសន៍សម្តេចក្រឡាហោម ស ខេង ដែលបានចេញទាំងសារាចរណ៍ ណែនាំឈប់ឲ្យមនុស្សសត្វចេញចូល និងដឹកទំនិញគ្រប់ប្រភេទតាមច្រករបៀង ក៏ប៉ុន្តែមន្ត្រីកាំកុងត្រូលបានឃុបឃិតជាមួយសមត្ថកិច្ចឈរជើងតាមច្រករបៀងផ្គើនប្រសាសន៍សម្តេចក្រឡាហោមមិនខ្ចីអើពើរឡើយ។ ទោះបីជាយ៉ាងណាប្រជាពលរដ្ឋក៏សំណូមពរមន្ត្រីជំនាញកាំកុងត្រូល ខេត្តស្វាយរៀង ពិសេសលោក ផឹង និល ជាប្រធានសាខាកាំកុងត្រូលដ៏មានអំណាចមេត្តាចុះត្រួតពិនិត្យ បន្លែផ្លែឈើ គ្រឿងក្នុងសត្វគោ បេះដូងគោ ជ្រូក គ្រឿងក្នុងមាន់ទា ដែលធ្វើឲ្យប៉ះពាល់ដល់សុខភាព អ្នកបរិភោគដោយពួកគាត់ក៏ដូចជាប្រជាពលរដ្ឋក្នុងខេត្តសង្ឃឹម និងទុកចិត្តលើមន្ត្រីជំនាញកាំកុងត្រូល ខេត្តស្វាយរៀងនេះ។ ពាក់ព័ន្ធនឹងករណីខាងលើនេះអ្នកសារព័ត៌មានយើងមិនអាចទំនាក់ទំនងទៅលោក ផឹង និល ដែលជា ប្រធានសាខាកាំកុងត្រូលខេត្តស្វាយរៀង នៅរសៀលថ្ងៃទី១៥ ខែមីនា ឆ្នាំ២០១៨នេះ បានទេដោយគ្មានលេខទូរស័ព្ទ៕
https://youtu.be/ntLy1p8LtG8
ចែករំលែកព័តមាននេះ