តើគណបក្សកែម ឡី នឹងត្រូវប្តូរឈ្មោះជាអ្វី ? ដើម្បីចូលរួមការបោះឆ្នោតខាងមុខនេះ
- ភ្នំពេញ
រាជធានីភ្នំពេញ ៖ លោកគុជ លី តំណាងស្ថាបនិកនៃគណបក្សកែម ឡី នៅរសៀលថ្ងៃទី១២ ខែមីនា ឆ្នាំ២០១៨ បានថ្លែងថា…
រាជធានីភ្នំពេញ ៖ លោកគុជ លី តំណាងស្ថាបនិកនៃគណបក្សកែម ឡី នៅរសៀលថ្ងៃទី១២ ខែមីនា ឆ្នាំ២០១៨ បានថ្លែងថា…
រាជធានីភ្នំពេញ ៖ លោកគុជ លី តំណាងស្ថាបនិកនៃគណបក្សកែម ឡី នៅរសៀលថ្ងៃទី១២ ខែមីនា ឆ្នាំ២០១៨ បានថ្លែងថា បន្ទាប់ពីក្រសួងមហាផ្ទៃបានតម្រូវឲ្យលោកបំពេញបែបបទតាមមាត្រា១១ថ្មី មាត្រា១៩ និងមាត្រា២០ ដែលហ៊ានមិនឱ្យប្រើឈ្មោះបុគ្គលជានាមគណបក្ស ពេលនេះមេធាវីរបស់គណបក្សមួយនេះ កំពុងសិក្សាមុនការឆ្លើយតបនឹងក្រសួងមហាផ្ទៃ ។
ការគ្រោងបង្កើតគណបក្ស «កែម ឡី» នេះត្រូវបានភរិយាសពលោកកែម ឡី គឺអ្នកស្រីប៊ូ រចនា បានប្រកាសបដិសេធដោយមិនឲ្យយកឈ្មោះប្តីរបស់អ្នកស្រីទៅប្រើទេ ។ យ៉ាងណាមិញ លោកគុជ លី បានថ្លែងប្រាប់កោះសន្តិភាពតាមទូរស័ព្ទថា ៖ «មេធាវីយើងកំពុងសិក្សាលើផ្នែកច្បាប់ បន្ទាប់ពីបានទទួលការជូនដំណឹងរបស់ក្រសួងមហាផ្ទៃ ។ ក្រសួងមហាផ្ទៃបានស្នើឲ្យយើងគោរពលើមាត្រា១១ថ្មី មាត្រា១៩ និងមាត្រា២០» នៃច្បាប់ស្តីពីគណបក្សនយោបាយ ។
លោកថា ពេលនេះលោកមិនមានព័ត៌មានណាមួយជូនលម្អិតដល់អ្នកសារព័ត៌មាននៅឡើយទេ ។ លោកថា នៅពេលមានព័ត៌មានថ្មីវិវត្តន៍លោកនឹងផ្តល់ជូនអ្នកសារព័ត៌មាន ។ កាលពីថ្ងៃទី១ ខែមីនា ឆ្នាំ២០១៨ លោក គុជ លី បានដាក់លិខិតចូលទៅក្រសួងមហាផ្ទៃជាផ្លូវការសុំបង្កើតគណបក្សកែម ឡី ស្របច្បាប់ ដើម្បីចូលរួមការបោះឆ្នោតជាតិ (ជ្រើសតាំងសមាជិកសភា) អាណិតទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ។ ក្នុងលិខិតផ្លួវការរបស់ក្រសួងមហាផ្ទៃដែលចុះហត្ថលេខាដោយសម្តេចស ខេង ចុះថ្ងៃទី៥ ខែមីនា ឆ្នាំ២០១៨ តបទៅលោកគុជ លី តំណាងស្ថាបនិកគណបក្សកែមឡីបានបញ្ជាក់យ៉ាងច្បាស់ថា ក្រសួងមហាផ្ទៃបានទទួលរួចហើយ នូវលិខិតដែលសុំបង្កើតគណបក្សកែម ឡី ប៉ុន្តែ «ដើម្បីទទួលបានភាពត្រឹមត្រូវ និងសុពលភាពព្រមទាំងអាចធ្វើសកម្មភាពស្របច្បាប់» ក្រសួងមហាផ្ទៃស្នើឲ្យតំណាងស្ថាបនិកគណបក្សបំពេញលក្ខខណ្ឌនានា ដែលបានកំណត់ក្នុងបទបញ្ញត្តិមាត្រា១១ថ្មី មាត្រា១៩ថ្មីនិងមាត្រា២០ នៃច្បាប់ស្តីពីគណបក្សនយោបាយ ។
លោកកែម រិទ្ធិសិត ដែលគេស្គាល់ថា ជាប្អូនប្រុសរបស់សពលោក កែម ឡី ធ្លាប់បានប្រកាសជាសាធារណៈពីការបង្កើតគណបក្សនេះឡើង ដើម្បីក្នុងការចូលប្រកួតក្នុងការបោះឆ្នោតនាខែកក្កដា ២០១៨ខាងមុខនេះ ជាពិសេសគណបក្សនេះ មានគោលបំណងទស្សនទានល្អៗរបស់លោកកែម ឡី ទៅបន្តចូលរួមចំណែកអភិវឌ្ឍប្រទេសជាតិមានតុភូមិកម្ពុជា ។ តែអ្នកស្រី ប៊ូ រចនា ភរិយាសព លោកកែម ឡី ដែលកំពុងរស់នៅប្រទេសអូស្ត្រាលីកាលពីថ្ងៃទី៥ ខែមីនា បាន បដិសេធចំពោះការយកឈ្មោះប្តីរបស់អ្នកស្រីទៅបង្កើតបក្សនយោបាយ ។
អ្នកស្រីបានសរសេរក្នុងបណ្តាញសង្គមហ្វេសប៊ុកមានឈ្មោះលោកកែមឡី ពីប្រទេសអូស្ត្រាលី ទីដែលអ្នកស្រី និងកូនៗបានទៅរស់នៅថា៖ «នាងខ្ញុំ ប៊ូរចនា ជាភរិយាលោកបណ្ឌិត កែម ឡី សូមប្រកាសជាសាធារណៈថា នាងខ្ញុំសូមបដិសេធមិនគាំទ្រការបង្កើតគណបក្សថ្មី ដែលមានឈ្មោះថា គណបក្សកែម ឡីនោះទេ ពីព្រោះតាំងពីដើមរហូតមក ស្វាមីនាងខ្ញុំមិនដែលមានបំណងបង្កើគណបក្សម្តងណាឡើយ » ។
អ្នកស្រីថា៖ «បំណងរបស់គាត់ គឺត្រឹមតែជួយផ្តល់យោបល់គ្រប់គណបក្សនយោបាយ ក្នុងបុព្វហេតុជាតិមាតុភូមិ និងដើម្បីផលប្រយោជន៍ប្រជាពលរដ្ឋខ្មែរទូទៅ និងដើម្បីលទ្ធិប្រជាធិបតេយ្យពិតប្រាកដនៅកម្ពុជាតែប៉ុណ្ណោះ ។ អាស្រ័យហេតុនេះសូមបងប្អូនជនរួមឈាមខ្មែរនៅក្នុងប្រទេសកម្ពុជា និងនៅឯនាយសមុទ្រទាំងអស់មេត្តាយល់ពីបំណងរបស់ស្វាម៉ីនាងខ្ញុំ ដោយក្តីអនុគ្រោះផង» ៕
ចែករំលែកព័តមាននេះ