ខេត្តកំពត ៖ បុរសពិការភ្នែកម្នាក់ឈ្មោះ សុខ សាវុធ បានតាំងខ្លួនជាអ្នកសច្ចំនៅអាស្រមភ្នំឈ្ងោករយៈពេលជាង២០ឆាំ្នមកហើយ ប៉ុន្តែទោះបីថាជាអ្នកសច្ចំមានមន្តអាគមពូកែ និងតែងមានអ្នកទៅរកឱ្យជួយ តែគាត់តែងនិយាយថា អ្នកមាននិស្ស័យទើបអាចជួយជីវិតបាន ។
https://www.facebook.com/kohsantepheap/videos/1649501065170069/
លោក សុខ សាវុធ បច្ចុប្បន្នមានអាយុ៥២ឆាំ្ន រស់នៅក្នុងអាស្រមតូចមួយជាប់ជើងភ្នំរមណីយដ្ឋានភ្នំឈ្ងោក ស្ថិតក្នុងភូមិបុសត្របែក ឃុំត្រពាំងព្រីង ស្រុកទឹកឈូ ។ គាត់មានប្រពន្ធ តែមិនមានកូនចៅទេ ។
លោក សុខ សាវុធ ត្រូវបានគេអះអាងថា ជាអ្នកសច្ចំស្មោះត្រង់ ចេះទស្សន៍ទាយមើលជំងឺដោយមិនបង្គាប់ឱ្យអ្នកជំងឺបង់លុយជូនឡើយ។ គាត់ពិការភ្នែកតាំងពីអាយុជាង២០ឆ្នាំ ដោយសារជំងឺ។
លោក សុខ សាវុធ និយាយថា មុនពេលពិការភ្នែកគាត់យល់សប្តិអាក្រក់ណាស់ យប់ណាក៏យល់សប្តិដើរមកព្រៃភ្នំដែរ ។ លុះពេលពិការភ្នែក មានអារម្មណ៍ស្ងប់ស្ងាត់ក៏សម្រេចមករស់នៅផ្លូូវចូលមាត់រូងភ្នំឈ្ងោកនេះជាង២០ឆ្នាំហើយ ។ គាត់ចេះមើលជំងឺនេះដោយប្រើសិល្ប៍បាលី និងថ្នាំបុរាណ តែមិនមែនអ្នកឈឺទាំងអស់សុទ្ធមើលជាទាំងអស់គ្នានោះទេ គឺទាល់តែអ្នកមាននិស្ស័យ ជួនកាលគ្រាន់តែស្រោចទឹកជាក៏មានដែរ ។
អ្នកជំងឺម្នាក់ឈ្មោះ ជន នីវ័ន ភេទប្រុស អាយុ៣៣ឆ្នាំ នៅភូមិអូរក្រសារ សង្កាត់អូរក្រសារ ក្រុងកែប និយាយថា គាត់មកឱ្យតាសច្ចំនៅភ្នំឈ្ងោកមើលជំងឺហើមជើងម្ខាងដោយអត់មានមូលហេតុ ហើយឥឡូវបានធូរស្បើយជាងមុនហើយ ។
មន្ត្រីអាជ្ញាធរឃុំត្រពាំងព្រីងនិយាយថា បច្ចុប្បន្ននៅរមណីយដ្ឋានភ្នំឈ្ងោក មានអ្នកតាំងខ្លួនជាអ្នកចេះមើលជំងឺច្រើននាក់ដែរ តែមិនច្រើនដូចពេលមុនៗទេ ព្រោះថា អ្នកតាំងខ្លួនជាអ្នកសច្ចំនេះមើលជំងឺឬទស្សន៍ទាយល្បីតែដំបូងៗ លុះយូរបន្តិចទៅក៏សាបរលាបទៅវិញ ៕
ចែករំលែកព័តមាននេះ