ខេត្តរតនគិរី ៖ បុរសវ័យចំណាស់ម្នាក់ ត្រូវជ្រូកព្រៃមួយក្បាលដាច់ហ្វូងមកខាំ បណ្តាលឱ្យរងរបួសយ៉ាងធ្ងន់ធ្ងរ ខណៈកំពុងបណ្តើរឆ្កែមួយក្បាលចូលទៅប្រមាញ់សត្វ កើតឡើងកាលពីវេលាម៉ោង០១ និង៣៥នាទីរសៀលថ្ងៃទី០៨ មីនា ស្ថិតត្រង់ចំណុចភូមិក្រៀង ឃុំកិចុង ស្រុកបកែវ ។
បើតាមមន្ត្រីនគរបាលប៉ុស្តិ៍កិចុងបានឱ្យដឹងថា ជនរងគ្រោះឈ្មោះ រម៉ាម ព្យើន ភេទប្រុស អាយុ៤៥ឆ្នាំជាជនជាតិទំពួន មានមុខរបរកសិករ រស់នៅភូមិឃុំកើតហេតុ ។
នៅមុនពេលកើតេហតុ គាត់បានបណ្តើរឆ្កែ១ក្បាលចូលព្រៃ ស្រាប់តែប្រទះឃើញជ្រូកព្រៃ១ក្បាលដាច់ហ្វូងដើរហក់មកខាំឆ្កឹះគាត់ បណ្តាលឱ្យរងរបួសតែម្តង ។ ចំណែកឆ្កែគាត់ ត្រូវជ្រូកព្រៃនោះខាំងាប់បាត់ហើយ ។ បច្ចុប្បន្ន ជនរងគ្រោះ ត្រូវបានសាច់ញាតិដឹកបញ្ចូនមកព្យាបាលនៅមណ្ឌលសុខភាពស្រុកបកែវ។
ចែករំលែកព័តមាននេះ