ខេត្តព្រៃវែង ៖ ដើមរាំងដ៏ធំមួយដើម ត្រូវកម្លាំងនគរបាលស្រុកពារាំងស្ទាក់ចាប់ បានកាលពីយប់ថ្ងៃទី៦ មីនា នៅតាមបណ្តោយផ្លូវជាតិលេខ៨ ត្រង់ចំណុចខាងលិចគល់ស្ពានស្នាយពល ស្ថិតក្នុងភូមិពារាំង ឃុំរាប ស្រុកពារាំង ខណៈដែលក្រុមឈ្មួញបានដឹកតាមរ៉ឺម៉កម៉៉ូតូ ប្រុងលោតឆត្រយកទៅលក់នៅប្រទេសវៀត
ណាម ។
បើតាមលោក ស៊ឹម កុសល អធិការនគរបាលស្រុកពារាំងបានឲ្យដឹងថា ដើមរាំងដែលសមត្ថកិច្ចស្ទាក់ចាប់នោះ ត្រូវបានក្រុមឈ្មួញដឹកតាមរ៉ឺម៉កម៉ូតូ ចេញពីស្រុកខ្សាច់កណ្ដាល ខេត្តកណ្តាល ហើយដឹកតាមបណ្តោយផ្លូវជាតិលេខ៨ ក្នុងគោលបំណងយកទៅលក់នៅប្រទេសវៀតណាម ។ ប៉ុន្តែត្រូវបានកម្លាំងរបស់លោកស្ទាក់ចាប់បានទាន់ពេលវេលាទាំងយប់នៅចំណុចខាងលើ ហើយយកមករក្សាទុកនៅអធិការដ្ឋាននគរបាលស្រុក ។
ដោយឡែក អ្នកបើករ៉ឺម៉កពេលដែលឃើញកម្លាំងសមត្ថកិច្ចនៅពីមុខ ក៏បានឈប់រ៉ឺម៉ក រួចលោតចុះរត់ចូលព្រៃគេចខ្លួនបាត់ស្រមោលទាំងយប់ ។ លោកអធិការបញ្ជាក់ថា លុះដល់ថ្ងៃទី៧ មីនា ទើបសមត្ថកិច្ចបានធ្វើកំណត់ហេតុប្រគល់ឲ្យមន្ត្រីជំនាញជលផលចាត់ការបន្តតាមនីតិវិធី ។ លោក មុត ខេមរា នាយសង្កាត់រដ្ឋបាលជលផលស្រុកពារាំងបានប្រាប់ថា ចំពោះដើមរាំងមួយគល់ដ៏ធំដែលមន្ត្រីនគរបាលស្រុកពារាំងចាប់ឃាត់ពីបទដឹកជញ្ជូនឈើប្រភេទឈើព្រៃលិចទឹកជាលក្ខណៈពាណិជ្ជកម្មគ្មានលិខិតអនុញ្ញាតនោះ សមត្ថកិច្ចបានប្រគល់ឲ្យមកសង្កាត់រដ្ឋបាល រួចលោកបានជួលរថយន្តទៅស្ទូចយកមកដាក់ដាំនៅក្នុងមន្ទីរកសិកម្មរុក្ខាប្រមាញ់ និងនេសាទខេត្តព្រៃវែងនៅល្ងាចថ្ងៃទី៧ ខែមីនា ឆ្នាំ២០១៨ះហើយ ៕
ចែករំលែកព័តមាននេះ