ខេត្តរតនគិរី ៖ កម្លាំងអធិការនគរបាលស្រុកវើនសៃ បានធ្វើការបង្ក្រាប និងឃាត់ខ្លួនក្រុមក្មេងទំនើងចំនួន ១០នាក់ បន្ទាប់ពីពួកគេបង្កការអុកឡុកក្នុងកម្មវិធីប្រគុំតន្ត្រីផ្សព្វផ្សាយលក់ស្រាបៀរ នៅភូមិហ្វាំង ឃុំប៉ុង ស្រុកវើនសៃ ហើយណាត់គ្នាមកវាយកាប់ចាក់គ្នានៅពាក់កណ្តាលផ្លូវ។ ហេតុការណ៍កាប់ចាក់គ្នា នេះបង្កឡើងនៅវេលាម៉ោង១១ និង៥០នាទីយប់ ថ្ងៃព្រហស្បតិ៍ ៧រោច ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៨ ខែមីនា ឆ្នាំ២០១៨ នៅ ចំណុចផ្លូវបំបែកភូមិផាក់ណាម ឃុំកោះពាក្យ ស្រុកវើនសៃ។ តាមប្រភពពីនគរបាលអធិការដ្ឋានស្រុកវើនសៃបានឱ្យដឹងថា ក្រុមក្មេងទំនើងមាន២ក្រុម សរុបមានគ្នាចំនួន១១នាក់ បាន នាំគ្នាទៅមើលការប្រគុំតន្ត្រីកម្មវិធីផ្សព្វផ្សាយស្រាបៀរ នៅភូមិហ្វាំង ឃុំប៉ុង ស្រុកវើនសៃ ហើយបានបង្កការអុកឡុកនៅទីនោះរួចពួកគេណាត់គ្នា ត្រលប់មកផ្ទះវិញដល់ចំណុច ផ្លូវបំបែកភូមិផាក់ណាម ឃុំកោះពាក្យ ក៏បាន នាំគ្នាឈប់ម៉ូតូដេញវាយតបកាប់ចាក់គ្នាបណ្តាលឲ្យ ភាគីម្ខាងត្រូវរបួសបែកក្បាលបន្តិចបន្តួច រីឯភាគីម្ខាងទៀតបានខូចខាតម៉ូតូបែកបាក់ស្តុបខាងក្រោយ។
ខណៈដែលក្រុមក្មេងទំនើងកំពុងធ្វើសកម្មភាពវាយតប់នោះក៏មានក្រុមប្រចាំបញ្ជារបស់អធិការដ្ឋានចុះធ្វើអន្តរាគមន៍ភ្លាមៗ ហើយធ្វើការឃាត់ខ្លួនបានក្រុមក្មេងទំនើងទាំង២ក្រុមខាងលើនោះ ចំនួន១០នាក់ផងដែរ។ ក្រុមក្មេងទំនើងទាំង១០នាក់ដែលឃាត់ខ្លួនបានរួមមាន ទី១-ឈ្មោះ បារ៉ាក់ ខែ ភេទប្រុស អាយុ១៦ឆ្នាំ ជនជាតិក្រឹង ទី២-ឈ្មោះ សាណយ ចាងវែង ភេទប្រុស អាយុ១៦ឆ្នាំ ជនជាតិគ្រឹង ទី៣-ឈ្មោះ ប្រាក យ៉ែ ភេទប្រុស អាយុ១៦ឆ្នាំ ជនជាតិក្រឹង ទី៤-ឈ្មោះ សាបូ ជិង ភេទប្រុស អាយុ១៨ឆ្នាំ ជនជាតិក្រឹង ទី៥-ឈ្មោះ ថងកាំ ភឿន ភេទប្រុស អាយុ១៧ឆ្នាំ ជនជាតិក្រឹង ទី៦-ឈ្មោះ ងើក សំងាត់ ភេទប្រុស អាយុ១៤ឆ្នាំ ជនជាតិក្រឹង ទី៧-ឈ្មោះ ណាស់ ឡាហើយ ភេទប្រុស អាយុ១៨ឆ្នាំ ជនជាតិក្រឹង ទី៨-ឈ្មោះ កាតុង ច្រឹង ភេទប្រុស អាយុ១៣ឆ្នាំ ជនជាតិក្រឹង ទី៩-ឈ្មោះ ក្លេវ មុក ភេទប្រុស អាយុ១៥ឆ្នាំ ជនជាតិគ្រឹង។ ទាំង៩នាក់ខាងលើមានទីលំនៅភូមិផាក់ណាម ឃុំកោះពាក់ ស្រុកវើនសៃ ខេត្តរនគិរី។ ទី១០-ឈ្មោះ ឡិប សះ ភេទប្រុស អាយុ១៧ឆ្នាំ ជនជាតិកាចក់ មានទីលំនៅភូមិកោះពាក់ ឃុំកោះពាក់ ស្រុកវើនសៃ ខេត្តរតនគិរី។ បច្ចុប្បន្នបានឃាត់ខ្លួននៅអធិការដ្ឋាន នគរបាលបណ្តេះអាសន្ន ដើម្បីធ្វើការអប់រំណែនាំ និងប្រគល់ជូនឪពុកម្តាយយកទៅអប់រំបន្ត៕
ចែករំលែកព័តមាននេះ