ខេត្តសៀមរាប ៖ រថយន្តដឹកទំនិញខ្នាតយក្សមួយគ្រឿងត្រូវបានគយខេត្ត និងគយចល័តនាំគ្នាដេញប្រភិតប្រភីងពីផ្លូវជាតិជាតិលេខ៦រហូតដល់ក្នុងបុរី សៀង ណាំ ដើម្បីពិនិត្យទំនិញម្តងម្នាក់បន្ទាប់ពីមានការសង្ស័យថា មិនបានបង់ពន្ធគ្រប់ចំនួនតាមលិខិតដឹកជញ្ជូន ប៉ុន្តែនាំគ្នាប្រទាញប្រទង់ជាច្រើនម៉ោងហាក់មានអាថ៌កំបាំងនៅពីក្រោយខ្នង ។ ហេតុការឃាត់រថយន្តផ្ទុកទំនិញគេចពន្ធនេះធ្វើឡើងនាថ្ងៃទី៨ ខែមីនា ឆ្នាំ២០១៨ ត្រង់ចំណុចក្នុងផ្សារបុរីសៀងណាំ ស្ថិតក្នុងភូមិខ្នារថ្មី សង្កាត់ជ្រាវ ក្រុងសៀមរាប ។
បើតាមការរៀបរាប់ពីព្រូឡានបានអះអាងថា រថយន្តនេះបានដឹកសម្ភារអេឡិចទ្រូនិច ម៉ាកសាំសុង ពាក់ផ្លាកលេខ ព្រះសីហនុ ៣A-២៨១៦ ចេញមកពីស្រុកសំពៅលូន ជាប់ព្រំប្រទល់កម្ពុជា-ថៃ កាត់តាមខេត្តបាត់ដំបងឆ្លងកាត់ខេត្តបន្ទាយមានជ័យចូលមកទម្លាក់ឃ្លាំងស្តុកនៅក្នុងបុរី សៀង ណាំ ក្នុងខេត្តសៀមរាបដើម្បីទុកបោះដុំឱ្យម៉ួយ ។
តាមប្រភពពីអ្នកឃើញហេតុការណ៍បានប្រាប់ថា មុនពេលកើតហេតុពួកគេបានឃើញសមត្ថកិច្ច និងគយទាំងពីរស្ថាប័នកំពុងដេញរថយន្តដឹកទំនិញខាងលើរហូតធ្វើការឃាត់បាននៅក្នុងផ្សារ បុរី សៀង ណាំ ប្រហែលសង្ស័យ ថា ទំនិញទាំងនេះអាចមិនទាន់បានបង់ពន្ធគ្រប់ចំនួនក៏ថាបាន ហើយការដេញហាក់បីដូចជាដេញចាប់ចោរ ។ ក្រោយឃាត់បានរថយន្តនោះភ្លាមគយខេត្តក៏នាំយកទៅកាន់សាខាគយខេត្តនៅស្វាយធំ ចំណែកគយចល័តក៏គេចខ្លួនបាត់ ។
ជុំវិញករណីចាប់រថយន្តដឹកទំនិញខាងលើនោះដែរ លោក កែវ រិទ្ធី អនុប្រធានគយ និងរដ្ឋាករសាខាខេត្តសៀមរាបបានប្រាប់តាមទូរស័ព្ទនៅថ្ងៃទី៩ ខែមីនា ឆ្នាំ២០១៨ នេះថារឿងទំនិញដែលដឹកតាមរថយន្តចូលមកក្នុងក្រុងសៀមរាបនោះយើងបានឃាត់យកមកទុកនៅសាខាគយ និងរដ្ឋាករខេត្តសៀមរាបហើយ ។ លោកបានបន្តថា ចំពោះករណីរឿងទំនិញនោះលោកបានកសាងកំណត់ហេតុបញ្ជូនទៅភ្នំពេញតាំងពីម្សិលមិញដើម្បីសុំសេចក្តីសម្រេចពីអគ្គនាយកដ្ឋានគយរួចរាល់អស់ហើយចាំតែខាងលើទំលាក់មកវិញទើបដឹងរឿងពិត ៕
ចែករំលែកព័តមាននេះ