ខេត្តរតនគីរី ៖ បើកបរគោយន្តកែច្នៃចុះចំណោតក្នុងល្បឿនលឿនមិនប្រយ័ត្នក្រឡាប់ ដោយខ្លួនឯង បណ្តាលឱ្យមនុសម្នាក់បានស្លាប់ភ្លាមៗ នៅនឹងកន្លែងកើតហេតុ ។ ចំណែកមនុស្ស៥នាក់ទៀត រងរបួសធ្ងន់ និងស្រាល…
ខេត្តរតនគីរី ៖ បើកបរគោយន្តកែច្នៃចុះចំណោតក្នុងល្បឿនលឿនមិនប្រយ័ត្នក្រឡាប់ ដោយខ្លួនឯង បណ្តាលឱ្យមនុសម្នាក់បានស្លាប់ភ្លាមៗ នៅនឹងកន្លែងកើតហេតុ ។ ចំណែកមនុស្ស៥នាក់ទៀត រងរបួសធ្ងន់ និងស្រាល ហេតុការនេះបានកើតឡើងនៅវេលាម៉ោង១៦និង០០នាទីថ្ងៃទី៨ ខែមីនានេះ នៅចំណុចទួលទឹកធ្លាក់អូរស៊ិនលែរ៍ ផ្លូវលំក្រាលគ្រួសក្រហម ស្ថិតក្នុងភូមិកាឡែង ឃុំកាឡែង ស្រុកលំផាត់ ខេត្តរតនគីរី ។
លោកអធិការនគបាលស្រុកលំផាត់បានឱ្យដឹងថា ករណីគ្រោះថ្នាក់ចរាចរណ៍នេះ គឺគោយន្តកែឆ្នៃបើកបរក្រឡាប់ដោយខ្លួនឯង ក្នុងទិសដៅពីជើងទៅត្បូង បណ្តាលឲ្យមនុស្ស (ប្រុស)ម្នាក់ស្លាប់នៅនឹងកន្លែង និងមនុស្ស៥នាក់ទៀតរងរបួសធ្ងន់ស្រាល ។
ប្រភពបន្តទៀតថា ជនរងគ្រោះទី១- ឈ្មោះស្រ៊ាន់ គីមស្រៀង ភេទប្រុស អាយុ១៨ឆ្នាំ ជនជាតិខ្មែរ មុខរបរកម្មករ(បានស្លាប់នៅកន្លែងកើតហេតុ)ជាអ្នករួមដំណើរ ។ ទី២-ឈ្មោះ ក្រឹក វិចិត្ត ភេទប្រុស អាយុ១៨ឆ្នាំ ជនជាតិខ្មែរ មុខរបរស៊ីឈ្នួលបើកបរគោយន្តឲ្យគេ(រងរបួសធ្ងន់សន្លប់)ជាអ្នកបើកបរ ។ ទី៣-ឈ្មោះ នឿន សល់ ភេទប្រុស អាយុ២៣ឆ្នាំ ជនជាតិខ្មែរ មុខរបរកម្មករ(រងរបួសធ្ងន់)ជាអ្នករួមដំណើរ ។ ទី៤- ឈ្មោះ ជុំ ជាតិ ភេទប្រុស អាយុ៣៥ឆ្នាំ ជនជាតិខ្មែរ មុខរបរកម្មករ(របួសស្រាល) ជាអ្នករួមដំណើរ ។ ទី៥- ឈ្មោះ ជុំ ធី ភេទប្រុស អាយុ២៣ឆ្នាំ ជនជាតិខ្មែរ មុខរបរកម្មករ(របួសស្រាល) ជាអ្នករួមដំណើរ ។ ទី៦- ឈ្មោះ ប៉ូយ ភេទប្រុស អាយុ១៩ឆ្នាំ ជនជាតិខ្មែរ មុខរបរកម្មករ(របួសស្រាល) ជាអ្នករួមដំណើរ អ្នកទាំង៦នាក់រស់នៅភូមិ- ឃុំកើតហេតុខាងលើ ។
ជិះគោយន្តកែច្នៃទៅស៊ីឈ្នួលធ្វើចម្ការដោយសារ បើកបរក្នុងល្បឿនលឿនផ្លូវកោង និងចុះចំណោតទើបបណ្តាលឲ្យក្រឡាប់តែម្តង ។ ក្រោយពេលកើតហេតុសមត្ថកិច្ចនគបាលរដ្ឋបាលប៉ុស្តិ៍កាឡែង សហការជាមួយកម្លាំងជំនាញអធិការដ្ឋាន បានចុះពិនិត្យដល់កន្លែងកើតហេតុ និងបានបញ្ជូនអ្នករងរបួសទៅសង្គ្រោះនៅមណ្ឌលសុខភាពតំបន់អូរស៊ិនលែរ៍ ដោយឃើញសភាពធ្ងន់ធ្ងរពេកក៏បន្តបញ្ជូនទៅសង្គ្រោះនៅមន្ទីរពេទ្យបង្អែកខេត្តរតនគីរី ដោយរថយន្តឯកជន និងដំណើរការធ្វើការប្រគល់សពឱ្យសាច់ញាតិយកធ្វើបុណ្យតាមប្រពៃណីផងដែរ ។
វត្ថុតាងបង្ក(គោយន្តកែច្នៃ)ត្រូវបានដកហូតយកមករក្សាទុកនៅប៉ុស្តិ៍រដ្ឋបាល ឃុំកាឡែងជាបណ្ដោះអាសន្នធ្វើកំណត់ហេតុចាត់ការតាមនីតិវិធីតាមក្រោយ ៕
ចែករំលែកព័តមាននេះ