ខេត្តប៉ៃលិន ៖ កម្មករសំណង់ម្នាក់រងរបួសក្បាល និងខ្នង សន្លប់នៅនឹងកន្លែង ត្រូវបានក្រុមគ្រួសារដឹកតាមម៉ូតូយកទៅព្យាបាលនៅមន្ទីរពេទ្យបង្អែកខេត្ត ខណៈផឹកស៊ីជួបជុំមិត្តភក្តិជាកម្មករសំណង់ដូចគ្នា តាំងពីល្ងាចរហូតដល់យប់ ទាស់ពាក្យសម្តីគ្នាតិចតួចជាមួយមិត្តភក្តិរួមការងារ ក៏ទាញយកដែកបំពង់ទីបវាយរងរបួសតែម្តង ។
ហេតុការណ៍កម្មករសំណង់វាយគ្នារបួសនេះ បានកើតឡើងកាលពីវេលាម៉ោង១០និង៣០នាទីយប់ ថ្ងៃទី០៦ ខែមីនា ឆ្នាំ២០១៨ រហូតដល់វេលាម៉ោង៤និង៣០នាទីទាបភ្លឺ ឈានចូលថ្ងៃទី០៧ ខែមីនា ឆ្នាំ២០១៨ ទើបដឹងដល់ក្រុមគ្រួសារដឹកទៅពេទ្យ ស្ថិតនៅក្នុងការដ្ឋានសំណង់មួយ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានពីលោក រី ដារ៉ា អធិការរងស្រុកសាលាក្រៅ បានឱ្យដឹងថា ជនរងគ្រោះមានឈ្មោះ ទិន រិទ្ធី ភេទប្រុស អាយុ២៦ឆ្នាំ ជាកម្មករសំណង់ រងរបួសក្បាល និងខ្នងសន្លប់នៅនឹងកន្លែងរស់នៅភូមិភ្នំព្រាល ឃុំស្ទឹងត្រង់ ស្រុកសាលាក្រៅ ។ ចំណែកជនដៃដល់ជាបងប្អូននឹងគ្នា ទី១.ឈ្មោះ ផុន វុទ្ធី ភេទប្រុស អាយុ៣២ឆ្នាំ ទី២.ឈ្មោះ ផុន សឿត ភេទប្រុស អាយុ២៥ឆ្នាំ ទាំងពីរនាក់ជាកម្មករសំណង់ស្នាក់នៅធ្វើការជាមួយនឹងជនរងគ្រោះក្នុងភូមិកើតហេតុខាងលើ ។
ប្រភពបន្តទៀតថា មុនពេលកើតហេតុ ជនរងគ្រោះ និងជនសង្ស័យទាំង២នាក់បងប្អូនផឹកស៊ីជួបជុំគ្នា៣ទៅ៤នាក់នៅនឹងកន្លែងកើតហេតុ រហូតដល់យប់ជ្រៅបន្តិច ស្រាប់តែស្រវឹងរៀងៗខ្លួន ហើយជនរងគ្រោះតែងតែនិយាយរករឿងជនដៃដល់ជាប្អូន ដោយប្រាប់ថា ធ្វើការជាមួយគ្នាតែមិនខំប្រឹងប្រែង ដោយចាំតែបើកលុយស្រួលៗ លុះទ្រាំមិនបានក៏ប្រតាយប្រតប់គ្នា លុះជនដៃដល់ជាបងឃើញដូច្នេះក៏ចូលមកជួយប្អូនរបស់ខ្លួន ដោយយកដំបងវាយជនរងគ្រោះ បណ្ដាលឱ្យដួលសន្លប់ នឹងកន្លែងតែម្តង ។
ចំណែកស្ត្រីម្នាក់ ឈ្មោះ ព្រំ សុខុម ជាម្តាយជនរងគ្រោះ បានឱ្យដឹងថា កូនប្រុសរបស់គាត់ធ្វើការជាកម្មករសំណង់នៅភូមិផ្សារព្រំ ជាយូរមកហើយ លុះដល់ថ្ងៃកើតហេតុ ខណៈផឹកស៊ីជួបជុំមិត្តភក្តិ៣ទៅ៤នាក់នៅកន្លែងធ្វើការសំណង់ ស្រាប់តែទាស់ពាក្យសម្តីគ្នា ដោយពេលនោះជនដៃដល់បានហៅកូនគាត់ទៅហូបបាយ តែដោយសារមិនព្រម ក៏ទាញយកដែកបំពង់ទីបវាយទៅលើកូនប្រុសរបស់គាត់ បណ្ដាលឱ្យរងរបួសក្បាល និងរបួសខ្នង សន្លប់នឹងកន្លែង រហូតដល់ម៉ោង០៤និង៣០ទាបភ្លឺ ទើបទូរស័ព្ទទៅមីងរបស់គេនៅឯផ្ទះឱ្យប្រាប់ម្តាយដឹកតាមម៉ូតូយកទៅសង្គ្រោះនៅមន្ទីរពេទ្យបង្អែកខេត្ត ។ គាត់បន្តទៀតថា គាត់ទាមទារថ្លៃរបួសស្នាមចំនួន១,៥០០ដុល្លារ ដើម្បីយកទៅព្យាបាលកូនរបស់គាត់ ។
បច្ចុប្បន្ន ជនសង្ស័យទាំង២នាក់បងប្អូន ត្រូវបាននគរបាលចាប់ឃាត់ខ្លួនរក្សាទុកនៅអធិការស្រុកសាលាក្រៅ រង់ចាំធ្វើការដោះស្រាយ ៕
ចែករំលែកព័តមាននេះ