ខេត្តប៉ៃលិន ៖ អ្នកបើកបររថយន្តក្រុងក្នុងល្បឿនលឿនមិនប្រយ័ត្ន បណ្ដាលឱ្យជ្រុលចង្កូតទៅបុក និងកៀរត្រាក់ទ័រ១គ្រឿង ក្នុងទិសដៅស្របគ្នា ធ្វើឱ្យធ្លាក់ក្នុងប្រឡាយអត់ទឹក រងរបួសអ្នកបើកបរធ្ងន់ធ្ងរ ត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត ។ ចំណែកអ្នកបើកបររថយន្តក្រុង បន្ទាប់ពីបង្កហេតុ បានបើកទ្វាររថយន្តរត់គេចខ្លួនបាត់ស្រមោល ។
ហេតុការណ៍នេះបានកើតឡើងកាលពីវេលាម៉ោង០៤និង២០នាទីរសៀល ថ្ងៃទី០៦ ខែមីនា ឆ្នាំ២០១៨ ស្ថិតនៅបណ្ដោយផ្លូវជាតិលេខ៥៩ ត្រង់ចំណុចភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីលោក រី ដារ៉ា អធិការរងស្រុកសាលាក្រៅ បានឱ្យដឹងថា ជនរងគ្រោះមានឈ្មោះ ម៉ង សុធា ភេទប្រុស អាយុ២៨ឆ្នាំ រងរបួសធ្ងន់ បាក់ដៃឆ្វេង រស់នៅភូមិភ្នំស្ពង់ ឃុំសាលាក្រៅ ស្រុកសាលាក្រៅ ដោយបើកបរត្រាក់ទ័រម៉ាកហ្វត ពណ៌ខៀវ ដាច់កង់ឆ្វេងផ្នែកខាងក្រោយ ។ ចំណែកអ្នកបើកបររថយន្តក្រុង និងព្រូម្នាក់ទៀត ពុំទាន់ស្គាល់អត្តសញ្ញាណនៅឡើយ បានរត់គេចខ្លួនក្រោយពេលកើតហេតុ ដោយបើកបររថយន្ត ពណ៌លឿង ពាក់ផ្លាកលេខ សៀមរាប ៣A-២៤០៥ រងការខូចខាតស្រាល ។
ប្រភពបន្តទៀតថា មុនពេលកើហេតុ គេឃើញត្រាក់ទ័រ១គ្រឿង បើកបរក្នុងទិសដៅពីជើងទៅត្បូង លុះដល់ក្បែរកន្លែងកើតហេតុ ស្រាប់តែមានរថយន្តក្រុង១គ្រឿងទៀត បានបើកបរក្នុងល្បឿនលឿន ដោយប្រហែលជាអ្នកបើកបរងងុយដេក ឬរវល់ក្រឡេកមើលទៅកន្លែងណាផ្សេង មិនប្រុងប្រយ័ត្នក៏បណ្ដាលឱ្យជ្រុលចង្កូតទៅបុក និងកៀរត្រាក់ទ័រទម្លាក់ក្នុងប្រឡាយអត់ទឹករងរបួសធ្ងន់តែម្តង ។ ក្រោយពេលកើតហេតុ ខាងភាគីរថយន្តក្រុង ដែលមានគ្នា២នាក់ បានរត់គេចខ្លួនបាត់ស្រមោល ។ ឬឯជនរងគ្រោះ ត្រូវបានខាងនគរបាលហៅរថយន្តឱ្យបញ្ជូនទៅសង្គ្រោះនៅមន្ទីរពេទ្យបង្អេកខេត្ត ។
បច្ចុប្បន្ន វត្ថុតាងត្រូវបានរក្សាទុកនៅអធិការដ្ឋាននគរបាលស្រុកសាលាក្រៅ ដើម្បីរង់ចាំភាគីទាំងសងខាងចូលមកធ្វើការដោះស្រាយ ៕
ចែករំលែកព័តមាននេះ