ខេត្តប៉ៃលិន ៖ នៅត្រង់ផ្លូវជាតិលេខ១០ចាស់ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ដែលជាកន្លែងធ្លាប់តែត្រូវបានអ្នកស្រុកលួចយកសំរាមទៅបោះចោលយ៉ាងអនាធិបតេយ្យនោះ ពេលនេះ ត្រូវបានអាជ្ញាធរភូមិ រៀបចំសាងសង់ប៉ុស្តិ៍ប្រជាការពារភូមិ ដើម្បីដាក់កម្លាំងឱ្យចាំចាប់អ្នកយកសំរាមទៅបោះចោល ផាកពិន័យតែម្តង ។ បើតាមលោក មាស សាវ៉ាត មេភូមិផ្សារព្រំបានឱ្យដឹងថា នៅត្រង់ចំណុចដែលគេបោះចោលសំរាមយ៉ាងអនាធិបេតយ្យជាយូរមកហើយនោះគឺនៅក្បែរចិញ្ចើមផ្លូវលំមួយស្ថិតក្នុងភូមិផ្សារព្រំ ដែលជាកន្លែងលំបាកក្នុងការធ្វើដំណើរចេញចូលទៅមក ព្រោះតែគំនរសំរាមជាច្រើនដូចជា កាកសំណល់បន្លែ ស្រកាត្រី សំបកកំប៉ុង សំបកដប ដែលបង្កក្លិនស្អុយអសោចិ៍ដល់អ្នករស់នៅក្បែរនោះ ហើយខាងលោកបានរៃអង្គាសថវិកាយកទៅសាងសង់រោងប្រជាការពារភូមិចាំយាមដើម្បីទប់ស្កាត់ការបោះចោលសំរាមបែបអនាធិបតេយ្យបន្តទៀត ។ លោកថា បន្ទាប់ពីសាងសង់ជិតរួចរាល់ មិនសូវមានអ្នកហ៊ានលួចយកសំរាមទៅបោះចោលផ្តេសផ្តាសនោះទេ តែកាលពីពេលប៉ុន្មានថ្ងៃមុនមានអ្នកស្រុក២នាក់បាននាំគ្នាលួចយកសំរាមទៅបោះចោលក្បែរប៉ុស្តិ៍របស់លោកនាពេលយប់ដែរ រួចក៏ចាត់កម្លាំងឱ្យដេញស្ទាក់ចាប់ ប៉ុន្តែដោយសារពេលយប់ងងឹតលំបាកមើល ក៏បណ្តាលឱ្យជនទាំងពីរនាក់នោះគេចខ្លួនបាត់ស្រមោលតែម្តង ។
ភាគច្រើនប្រជាពលរដ្ឋដែលយកសំរាមទៅបោះចោលនៅត្រង់ចំណុចខាងលើនោះ គឺចេញពីចំណុចសំបុកចាប ក្នុងភូមិផ្សារព្រំដដែល បើទោះបីជាខាងអាជ្ញាធរភូមិខិតខំណែនាំយ៉ាងណា ក៏គេមិនស្តាប់តាមដែរ ។ លោកមេភូមិបញ្ជាក់ថា ការសង់ប៉ុស្តិ៍ប្រជាការពារភូមិនេះ ដើម្បីដាក់កម្លាំងឱ្យដេកចាំយាមទប់ស្កាត់កុំឱ្យជនខិលខូចបន្តយកកាកសំណល់ទៅបោះចោលអនាធិបេយ្យបន្តនៅក្បែរចិញ្ចឹមផ្លូវ ហើយការសង់ប៉ុស្តិ៍នេះក៏អាចជាកន្លែងងាយស្រួលក្នុងការជួយដល់ប្រជាពលរដ្ឋ ដែលមានបញ្ហា ហើយទៅរកលោកជួយអន្តរាគមន៍ផងដែរ ៕
ចែករំលែកព័តមាននេះ