ខេត្តរតនគិរី ៖ ភ្លើងមិនដឹងមកពីណាទេ បានលេបត្របាក់ស្ពានឈើឆ្លងកាត់ផ្លូវលំមួយកន្លែងអស់ទាំងស្រុង នៅស្រុកកូនមុំ ។ ហេតុការណ៍នេះ បានកើតឡើងនៅវេលាម៉ោង២រំលងអធ្រាត្រថ្ងៃទី៣ ឈានចូលថ្ងៃទី៤ មីនា នៅក្នុងភូមិ៣ ឃុំត្រពាំងក្រហម ត្រង់ចំណុចក្បែរភ្នំទទីង ។ ស្ពានដែលត្រូវភ្លើងឆេះអស់នោះមានប្រវែង៩ម៉ែត្រ ទទឹង៤ម៉ែត្រ ធ្វើអំពីឈើ តែមិនមានបង្កាន់ដៃទេ ។
តាមប្រភពបានឱ្យដឹងថា ដោយសារស្ពាននោះត្រូវភ្លើងឆេះនៅពេលយប់រំលងអធ្រាត្រ ដែលក្រុមពន្លត់អគ្គិភ័យ មិនអាចទទួលបានដំណឹង ទើបត្រូវភ្លើងឆេះស្ពាននោះអស់ទាំងស្រុង ក្លាយជាផេះធ្យូងអស់ទៅហើយ ។ ប្រភពបានឱ្យដឹងបន្តថា ស្ពានដែលភ្លើងឆេះនោះជាស្ពានឆ្លងកាត់កំណាត់ផ្លូវដែលបែកចេញពីផ្លូវជាតិលេខ៧៨ មានចំងាយប្រហែល១៥គីឡូម៉ែត្រ ។ ហេតុនេះហើយ ទើបរថយន្តសំរាប់ពន្លត់អគ្គិភ័យចេញប្រតិបត្តិការមិនទាន់ ហើយក៏ទទួលព័ត៌មានបាន នៅម៉ោង៥ព្រឹកពេលកំពុងក្លាយជាផេះទៅហើយ ។
មិនទាន់មានការសន្និដ្ឋានបែបណាមួយជាផ្លូវការទេជុំវិញភ្លើងឆេះស្ពាននេះ ។ ប៉ុន្តែមានពាក្យលេចឮថា ខ្លះសង្ស័យឈ្មួញឈើដែលកំពុងប្រព្រឹត្តបទល្មើសនៅតំបន់នោះដុតចោល ដើម្បីរារាំងដំណើរសមត្ថកិច្ចកុំឱ្យពូកែទៅពិនិត្យឈើដែលកំពុងកាប់ ។
តាមការពិនិត្យទៀត ក្នុងយប់ដែលស្ពានត្រូវឆេះពុំមានភ្លើងឆេះព្រៃណានៅក្បែរទេ គ្មានឆេះដោយឆ្លងរាលដាលពីទីណាទេ គឺដុតចោលដោយចេតនាណាមួយ ។អ្នកខ្លះថា មិនអីទេចង់ដុត១០ក៏បានដែរ ព្រោះតំបន់នោះជាសម្បុកឈើ ចង់សង់ស្ពានវិញពេលណាក៏បានដែរ ខ្លាចតែរដ្ឋអំណាចខ្ជិល ៕
ចែករំលែកព័តមាននេះ