ខេត្តប៉ៃលិន ៖ តាមសេចក្តីរាយការណ៍បានឱ្យដឹងថា មានករណីភ្លៀងលាយឡំដោយខ្យល់កន្ត្រាក់បណ្តាលឱ្យបុកប៉ើងដំបូលផ្ទះប្រជាពលរដ្ឋចំនួន៨ខ្នងក្នុងនោះធ្ងន់ធ្ងរចំនួន៣ខ្នង តែមិនមានមនុស្ស ឬសត្វទទួលរងគ្រោះថ្នាក់នោះទេហើយក្រោយមកគេឃើញអាជ្ញាធរមូលដ្ឋានក៏ដូចជាខាងកាកបាទក្រហមសាខាខេត្តប៉ៃលិនចុះទៅត្រួតពិនិត្យមើលដើម្បីយកដំណោយទៅចែកជូនដើម្បីដោះស្រាយបញ្ហាមួយគ្រាផងដែរ ។ ហេតុការណ៍ភ្លៀងលាយខ្យល់កន្ត្រាក់វាយប្រហារទៅលើផ្ទះប្រជាពលរដ្ឋនេះបានកើតឡើងកាលពីវេលាម៉ោង៥និង៣០នាទីល្ងាច ថ្ងៃទី០៥ ខែមីនា ឆ្នាំ២០១៨ ស្ថិតនៅក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ។
ប្រភពព័ត៌មានពីលោក ឡុង បៀរ ចៅសង្កាត់រងទី១បរយ៉ាខាបានឱ្យដឹងថា នៅរសៀលមុនពេលកើតហេតុគេសង្កេតឃើញមេឃមានពណ៌ខ្មៅអួរអាប់លុះមួយសន្ទុះក្រោយមកស្រាប់តែមានខ្យល់បក់បោកយ៉ាងខ្លាំងក្នុងទិសដៅពីត្បូងទៅជើងដោយមានលាយឡំជាមួយនឹងភ្លៀង១មេធំហើយក៏បុកប៉ើងដំបូលផ្ទះរបស់ប្រជាពលរដ្ឋទាំងសង់ទាមជាប់ផ្ទាល់ដី និងផ្ទះមានសរសរក៏ប៉ើងដំបូលដូចគ្នា ។ មិនត្រឹមតែផ្ទះរបស់ប្រជាពលរដ្ឋនៅក្នុងភូមិប៉ុណ្ណោះទេ សូម្បីតែសាលាបឋមសិក្ខា អេ.ជី.អេស ក៏ប៉ើងដំបូលក្បឿងផងដែរ ។
លោកបញ្ជាក់ទៀតថា នៅឆ្នាំ២០១៨នេះទើបតែជាលើកទី១ហើយដែលមានករណីភ្លៀងលាយខ្យល់កន្ត្រាក់ ព្រោះប៉ុន្មានថ្ងៃកន្លងទៅអាកាសធាតុហាក់ដូចជាប្រែប្រួលដោយក្តៅខ្លាំងជាងសព្វមួយដងលុះពេលមានភ្លៀងក៏បង្កទៅជាខ្យល់កន្ត្រាក់បោកបក់ខ្លាំងដូចគ្នាដែរ ៕
ចែករំលែកព័តមាននេះ