ខេត្តស្ទឹងត្រែង ៖ ទាក់ទិនការជួញដូរគ្រឿងញៀនឆ្លងដែនពីប្រទេសឡាវមកកាន់ដែនដីកម្ពុជាខេត្តស្ទឹងត្រែងគេចាត់ទុកថា នេះជាកំណត់ត្រាប្រវត្តិសាស្ត្រមួយដែលបានបង្ក្រាបរឹបអូសគ្រឿងញៀនដ៍ធំបំផុតមិនធ្លាប់មានពីមុនមកលើទឹកដីនៃខេត្តស្ទឹងត្រែងនោះឡើយ។
ការបង្ក្រាបករណីជួញដូរថ្នាំញៀនដ៍ធំនេះ បានប្រព្រឹត្តទៅនៅចំណុចស្ពានទី២ភូមិខាំផាន់ សង្កាត់សាមគ្គី ក្រុងស្ទឹងត្រែង កាលពីវេលាម៉ោង៩និង៤៥នាទីព្រឹកថ្ងៃសៅរិ៍ ២រោច ខែផល្គុន ឆ្នាំរការ នព្វស័ក ព.ស២៥៦១ត្រូវនឹងថ្ងៃទី៣ខែមីនាឆ្នាំ២០១៨ ជាប់ព្រំដែនកម្ពុជា-ឡាវដោយការបង្ក្រាបរឹបអូសចាប់ខ្លួនជនជាតិឡាវនោះដឹកនាំដោយលោកឧត្តមសេនីយ៍ទោ សាន សុទ្ធី នាយករងមន្ទីរប្រឆាំងគ្រឿងញៀនលោកវរៈសេនីយ៍ឯក គឹម តូ នាយការិយាល័យក៥នៃមន្ទីរប្រឆាំងគ្រឿងញៀនក្រសួងមហាផ្ទៃក្រោយការចង្អុលបង្ហាញពីនាយឧត្តមសេនីយ៍អគ្គស្នងការនគរបាលខេត្តដោយបានសហការជាមួយកម្លាំងBLoប្រចាំច្រកទ្វាអន្តរជាតិត្រពាំងគ្រៀលនិងក្រោមការសម្រួលការងាររួមនិងស្នងការដ្ឋាននគរបាលខេត្តស្ទឹងត្រែងផងដែរ។
ប្រភពព័ត៌មានអោយដឹងថា ការបង្ក្រាបខាងលើ ដោយមានវិធានញុះញ៉ុង អោយមានការទិញលក់ទើបកម្លាំងសមត្ថកិច្ចឈានដល់ការបង្ក្រាបចាប់ខ្លួនជនជាតិម្នាក់ បន្ទាប់ប្រើប្រាស់រថយន្តផ្ទាល់ខ្លួនមួយគ្រឿងដឹកនាំគ្រឿងញៀនចេញពីទីក្រុងប៉ាក់សេ ឆ្ពោះមកព្រំដែនកម្ពុជា ដើម្បីធ្វើការជួញដូរ ក៏ត្រូវកម្លាំងមន្ទីរប្រឆាំងគ្រឿងញៀនក្រសួងមហាផ្ទៃចាប់បង្ក្រាបជាមួយវត្ថុតាងជាក់ស្តែងថ្នាំញៀនចំនួន៣០ដុំធំវិចខ្ចប់ក្នុងថងតែពណ៌លឿងបិទស្កុតសពីក្រៅ។ប្រភពដដែលបន្តថាមុនពេលបង្ក្រាបរឹបអូសថ្នាំញៀន ជនជាតិឡាវខាងលើបានធ្វើដំណើរមកដល់ព្រំដែនបានចតរថយន្តរបស់ខ្លួនទុកនៅទឹកដីឡាវរួចបន្តថ្មើជើងដោយស្ពាយគ្រឿងញៀនកាត់ព្រៃចូលមកដីកម្ពុជាលុះមុខសញ្ញាបង្ហាញខ្លួនកម្លាំងមន្ទីរប្រឆាំងគ្រឿងញៀនសម្រេចចាប់ខ្លួនគ្រានោះតែម្តង។
បន្ទាប់ការបង្ក្រាបរឹបអូសវត្ថុតាងលោកឧត្តមសេនីយ៍ទោ សាន សុទ្ធី នាយករងមន្ទីរប្រឆាំងគ្រឿងញៀនក្រសួងមហាផ្ទៃរួមកម្លាំងរបស់លោកបានបញ្ជូនជនសង្ស័យរួមវត្ថុតាងមកកាន់ស្នងការដ្ឋាននគរបាលខេត្តស្ទឹងត្រែងដើម្បីហែកកញ្ចប់ធ្វើតេស្តរកសារធាតុញៀនក្រោមការសម្របសម្រួលដោយលោក វង្ស សាវ៉ាត ព្រះរាជអាជ្ញារងអមសាលាដំបូងខេត្តស្ទឹងត្រែងរួមក្រឡាបញ្ជីនៅចំពោះមុខជនសង្ស័យផងដែរ។
លោកឧត្តមសេនីយ៍ទោ សាន សុទ្ធី នាយករងមន្ទីរប្រឆាំងគ្រឿងញៀនក្រសួងមហាផ្ទៃអោយដឹងថាជនជាតិឡាវដែលត្រូវចាប់ខ្លួនរួមវត្ថុតាងខាងលើនេះឈ្មោះ អាំណយស័ក្ក សីរីស័ក្ក ហៅក្រៅឈ្មោះ កុបសីរីស័ក្ក ភេទប្រុសអាយុ៤៣ឆ្នាំ មានស្រុកកំណើតភូមិថាងខុប ស្រុកចំប៉ាសាក់ ខេត្តចំប៉ាសាក់ បច្ចុប្បន្នរស់នៅភូមិវៀងសៃ ស្រុកហ្លូងផាបាង ខេត្តហ្លូងផាបាង ប្រទេសឡាវ។
លោកបន្តថាបន្ទាប់ពីកម្លាំងមន្ទីរប្រឆាំងគ្រឿងញៀនចាប់ខ្លួនរួមវត្ថុតាងមានថ្នាំញៀនចំនួន៣០ដុំធំទម្ងន់សរុបចំនួន៣១.៤៧៦គីឡូក្រាមទាំងសំបកដោយមិនទាន់ហែកកញ្ចប់ថ្លឹងរកទម្ងន់ពិតនៅឡើយទេ លុះវត្តមានលោកព្រះរាជអាជ្ញារងរួមនិងក្រឡាបញ្ជីមកដល់ទើបហែកកញ្ចប់ថ្លឹងរកទម្ងន់ពិតជាក់ស្តែងសរុបចំនួន២៩៨៨៥.១ក្រាម(ជិត៣០គីឡូក្រាម)ជាប្រភេទមេតំហ្វេតាមីនម្សៅក្រាមពណ៌សថ្លា។
ក្រោយការធ្វើតេស្តនិងថ្លឹងរកទម្ងន់ពិតកម្លាំងមន្ទីរប្រឆាំងគ្រឿងញៀនបានធ្វើកំណត់ហេតុចាប់យករួមកម្លាំងសហការនិងកសាងសំណុំរឿងបញ្ជូនទៅសាលាដំបូងដើម្បីចាត់ការតាមនីតិវិធីច្បាប់។ បច្ចុប្បន្ន ជនសង្ស័យ កំពុងស្ថិតក្រោមការសាកសួរបន្ថែមពីកម្លាំងនគរបាលនៅស្នងការដ្ឋាននគរបាលខេត្តស្ទឹងត្រែង រង់ចាំបញ្ចប់នីតិវិធីនិងត្រូវបញ្ជូនទៅតុលាការបន្ត៕
ចែករំលែកព័តមាននេះ