ប្រចៀវមួយប្រភេទថ្មីត្រូវបានគេដាក់ឈ្មោះដោយផ្អែកលើរូបរាងអាក្រក់ស្រដៀងនឹងបិសាចរបស់វា ត្រីគ្មានភ្នែក ហើយរស់នៅក្នុងដីភក់ សត្វពស់មួយប្រភេទដែលមានភ្នែកពណ៌ក្រហមចាស់ និងសត្វកញ្ចាញ់ចេកមួយប្រភេទដែលយំឮសូរដូចសត្វបក្សី ស្ថិតនៅក្នុងចំណោមសត្វ និងរុក្ខជាតិចំនួន១២៦ប្រភេទថ្មីៗដែលត្រូវបានអ្នកវិទ្យាសាស្ត្ររកឃើញនៅក្នុងមហាតំបន់មេគង្គក្នុងឆ្នាំ២០១១ ដែលត្រូវបានពិពណ៌នានៅក្នុងរបាយការណ៍ថ្មីមួយរបស់អង្គការ WWF មានចំណងជើងថា Extra Terrestrial។
ក្នុងចំណោមសត្វ និងរុក្ខជាតិចំនួន១០ប្រភេទ ដែលរបាយការណ៍បានពិពណ៌នាមានសត្វប្រចៀវមួយប្រភេទដែលត្រូវបានគេដាក់ឈ្មោះថាប្រចៀវច្រមុះបំពង់ ។ វាមានមាឌតូច ប៉ុន្តែវាមានមុខមាត់អាក្រក់ស្រដៀងនឹងបិសាច ត្រូវបានគេរកឃើញនៅប្រទេសវៀតណាម ។ សត្វប្រចៀវនេះដូចគ្នានឹងប្រចៀវច្រមុះបំពង់ពីរផ្សេងទៀតដែលត្រូវបានគេរកឃើញនៅក្នុងឆ្នាំ២០១១ រស់នៅក្នុងតំបន់ព្រៃត្រូពិច ហើយងាយទទួលរងគ្រោះពីការកាប់បំផ្លាញព្រៃឈើ។ ក្នុងរយៈពេលត្រឹមតែ៤ទស្សវត្ស ព្រៃឈើនៅក្នុងមហាតំបន់មេគង្គចំនួន៣០ភាគរយបានបាត់ បង់ ។
លោកនីក ខកស៍ ប្រធានកម្មវិធីអភិរក្សសត្វ និងរុក្ខជាតិនៃអង្គការ WWF មហាតំបន់មេគង្គបាននិយាយថា ៖ «ស្របពេលនឹងរបកគំហើញថ្មីៗក្នុងឆ្នាំ២០១១ បញ្ជាក់អំពីសារសំខាន់នៃតំបន់មេគង្គថាមានតម្លៃផ្នែកជីវចម្រុះដ៏សម្បើមនឹកស្មានមិនដល់នោះ មានសត្វ និងរុក្ខជាតិថ្មីៗជាច្រើនប្រភេទកំពុងទទួលរងនូវការគំរាមកំហែងយ៉ាងធ្ងន់ដោយសារទីជម្រករបស់វារួមតូចទៅៗ ។ មានតែការវិនិយោគផ្នែកអភិរក្សធម្មជាតិប៉ុណ្ណោះ ជាពិសេសក្នុងកិច្ចការពារ និងគ្រប់គ្រងតំបន់ការពារធម្មជាតិ និងការអភិវឌ្ឍសេដ្ឋកិច្ចបៃតង ទើបសត្វ និងរុក្ខជាតិថ្មីៗទាំងនេះត្រូវបានការពារ ហើយធ្វើឱ្យគេនៅមានសង្ឃឹមក្នុងការរកឃើញនូវសត្វ និងរុក្ខជាតិថ្មីៗទៀតក្នុងពេលអនាគត» ។
ត្រីទឹកសាបមួយប្រភេទស្ថិតក្នុងអំបូរអត់ស្រកា (Clarias grcilentus) ត្រូវបានគេរកឃើញនៅកោះ Phu Quoc នៃប្រទេសវៀតណាម ហើយអាចធ្វើចរាចរឆ្លងកាត់លើផ្ទៃដីដោយប្រើប្រាស់ព្រុយនៅជាប់ពោះរបស់វាដើម្បីឱ្យខ្លួនវាហើបពីដី ហើយចលនារំកិលទៅមុខរបស់វាស្រដៀងទៅនឹងចលនាសត្វពស់លូន។ ត្រីមានទំហំតូចខុសប្រក្រតី (Boraras naevus) មានប្រវែងត្រឹម២សង្ទីម៉ែត្រ ត្រូវបានគេរកឃើញនៅប៉ែកខាងត្បូងប្រទេសថៃ ហើយត្រូវបានគេដាក់ឈ្មោះវាផ្អែកលើស្នាមក្រឡេក្រឡាចាស់មួយដុំធំនៅលើខ្លួនពណ៌មាសរបស់វា។
ត្រីមួយប្រភេទមានពណ៌ស៊ីជម្ពូប្រឿងៗដែលស្ថិតនៅក្នុងអំបូរត្រីមានស្រកា ត្រូវបានគេរកឃើញក្នុងផ្ទៃទន្លេ Xe Bangfai ជាដៃទន្លេមេគង្គមួយស្ថិតនៅផ្នែកកណ្តាលប្រទេសឡាវ ។ ត្រីនេះ (Bangana musaie) ពុំមានភ្នែកទេ ហើយវាជាប្រភេទងាយរងគ្រោះដោយសារប្រភេទទីជម្រករបស់វាមានតិច ។
ទន្លេមេគង្គជាទីជម្រកសម្រាប់ត្រីចំនួនប្រមាណ៨៥០ប្រភេទ ហើយវាជាប្រភពធនធានជលផលដ៏សម្បូរបែបបំផុតនៅលើពិភពលោក ។ ការសាងសង់ទំនប់សាយ៉ាបូរីនៅក្នុងប្រទេសឡាវនៅលើដងទន្លេមេគង្គ គឺជាកត្តាគំរាមកំហែងមួយដ៏ធ្ងន់ដល់ធនធានជីវចម្រុះនៃតំបន់នេះ និងផលិតភាពដែលគាំទ្រដល់ការចឹញ្ចឹមជីវិតរបស់ប្រជាជនជាង៦០លាននាក់ ។
លោកនីក ខកស៍ បាននិយាយថា ៖ «ទន្លេមេគង្គមានធនធានជីវចម្រុះក្នុងទឹកដ៏សម្បូរបែបលំដាប់ទីពីរ បន្ទាប់ពីទន្លេអាម៉ាហ្សូន» ។ លោកបានបន្តថា ៖ «ទំនប់វារីអគ្គិសនីសាយ៉ាបូរីអាចបង្កជាឧបសគ្គដ៏ចម្បងមួយសម្រាប់ត្រីច្រើនប្រភេទ ហើយវាជាសញ្ញាបង្ហាញពីទីអវសានសម្រាប់ប្រភេទសត្វដែលគេស្គាល់ហើយ និងប្រភេទសត្វដែលគេពុំទាន់បានស្រាវជ្រាវរកឃើញ» ។
កញ្ចាញ់ចេកមួយប្រភេទ ត្រូវបានគេរកឃើញនៅក្នុងតំបន់ព្រៃដែលមានរយៈកម្ពស់ខ្ពស់នៅក្នុងប្រទេសវៀតណាមប៉ែកខាងជើង ។ សត្វនេះយំឮសំឡេងដូចសត្វបក្សីច្រើនជាងដូចសត្វកញ្ចាញ់ចេកទូទៅ ។ ជាទូទៅសត្វកញ្ចាញ់ចេកឈ្មោលចែចង់កញ្ចាញ់ចេកញីដោយធ្វើសំឡេង«-ក្រោកៗ»ជាប់គ្នា ប៉ុន្តែកញ្ចាញ់ចេកថ្មីមួយនេះបញ្ចេញសំឡេងផ្សេងៗគ្នា ពោលគឺវាពុំដែលបន្លឺសំឡេងដូចគ្នាពីរដងឡើយ ។
ឧរង្គសត្វចំនួន២១ប្រភេទ ក៏ត្រូវបានគេរកឃើញនៅក្នុងឆ្នាំ២០១១ដែរ រាប់បញ្ចូលទាំងសត្វពស់បៃតងមួយប្រភេទដែលមានភ្នែកពណ៌ក្រហមចាស់ (Trimeresurus rubeus) រស់នៅក្នុងព្រៃជិតទីក្រុងហូជីមិញ ។ តំបន់ព្រៃនោះលាតសន្ធឹងតាមបណ្តោយកូនភ្នំតូចៗនៃប្រទេសវៀតណាមប៉ែកខាងត្បូងរហូតដល់ខ្ពង់រាបកម្ពុជាភាគខាងកើត ។
សត្វពស់កន្ទុយខ្លីមួយប្រភេទ ត្រូវបានគេរកឃើញនៅក្នុងដែនជម្រកសត្វព្រៃ Kyaiktiyo ក្នុងប្រទេសមីយ៉ាន់ម៉ា ។ សត្វពស់នេះ (Python Kyaiktiyo) មិនត្រូវបានគេរកឃើញទៀតឡើយ បើទោះបីជាគេបានចុះស្រាវជ្រាវច្រើនដងក៏ដោយ ហើយអ្នកវិទ្យាសាស្ត្រមានព័ត៌មានតិចតួចអំពីជីវសាស្ត្រ របាយ និងកត្តាគំរាមកំហែងចំពោះសត្វនេះ ។ ទោះជាយ៉ាងណាក៏ដោយ សត្វពស់ដែលមានប្រវែង១,៥ម៉ែត្រនេះកំពុងប្រឈមនឹងកត្តាគំរាមកំហែងផ្សេងៗដែលបង្កដល់សត្វពស់ផ្សេងទៀតក្នុងនោះរួមមាន ការបាត់បង់ទីជម្រក ការបរបាញ់ខុសច្បាប់សម្រាប់យកសាច់ ស្បែក និងការជួញដូរសម្រាប់ធ្វើជាសត្វចិញ្ចឹម ។
លោកនីក ខកស៍ បាននិយាយថា ៖ «ការបរបាញ់សម្រាប់ពាណិជ្ជកម្មសត្វព្រៃខុសច្បាប់ជាការគំរាមកំហែងចម្បងមួយដល់ការរស់រានរបស់សត្វជាច្រើនប្រភេទនៅតំបន់អាស៊ីអាគ្នេយ៍ ។ ដើម្បីដោះស្រាយបញ្ហានេះ អង្គការ WWF និងអង្គការ TRAFFIC បាននិងកំពុងអនុវត្តយុទ្ធនាការមួយជាសាកលក្នុងឆ្នាំនេះក្នុងគោលដៅបង្កើនប្រសិទ្ធភាពនៃការអនុវត្តច្បាប់ បង្អាក់សកម្មភាពជួញដូរសត្វព្រៃខុសច្បាប់ និងកាត់បន្ថយតម្រូវការផលិតផលនៃប្រភេទសត្វរងគ្រោះថ្នាក់ជិតផុតពូជ» ។
របាយការណ៍ Extra Terrestrial ពិពណ៌នាអំពីប្រភេទសត្វ និងរុក្ខជាតិថ្មីៗចំនួន១០ប្រភេទនៅក្នុងឆ្នាំ២០១១ក្នុងនោះអ្នកវិទ្យាសាស្ត្របានកត់ត្រាទុកនូវរុក្ខជាតិចំនួន៨២ប្រភេទ ត្រីចំនួន១៣ប្រភេទ ឧរង្គសត្វចំនួន២១ប្រភេទ ថលជលិកសត្វ (សត្ថដែលអាចរស់នៅលើគោកក៏បានក្នុងទឹកក៏បាន)ចំនួន៥ប្រភេទ និងថនិកសត្វចំនួន៥ប្រភេទ នៅក្នុងមហាតំបន់មេគង្គនៃតំបន់អាស៊ីអាគ្នេយ៍រួមមាន ប្រទេសកម្ពុជា ឡាវ មីយ៉ាន់ម៉ា ថៃ វៀតណាម និងខេត្តយូណាននៃប្រទេសចិនប៉ែកនិរតី ។ ចាប់តាំងពីឆ្នាំ១៩៩៧ មក មានសត្វ និងរុក្ខជាតិប្រភេទថ្មីៗចំនួន១.៧១០ប្រភេទ ហើយត្រូវបានអ្នកវិទ្យាសាស្ត្ររកឃើញនៅក្នុងមហាតំបន់មេគង្គ ៕
ចែករំលែកព័តមាននេះ