រាជធានីភ្នំពេញ ៖ ធន់ មករា មកពីសមាគមកីឡាប្រដាល់ក្រសួងការពារជាតិ និង អ៊ុង ភារាក់ មកពីក្លិបទ័ពពិសេសឆត្រយោង៩១១ ត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀនអន្តរជាតិទូរទស្សន៍MyTV…
រាជធានីភ្នំពេញ ៖ ធន់ មករា មកពីសមាគមកីឡាប្រដាល់ក្រសួងការពារជាតិ និង អ៊ុង ភារាក់ មកពីក្លិបទ័ពពិសេសឆត្រយោង៩១១ ត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀនអន្តរជាតិទូរទស្សន៍MyTV នាថ្ងៃសុក្រ ទី២ មីនា សប្ដាហ៍នេះហើយ ។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះមួយណាសម្រេចគោលដៅ ខណៈកីឡាករថៃដែលពួកគេត្រូវជួបហាក់មានសមត្ថភាពពិបាកផ្ដួលបែបហ្នឹងនោះ។
ធន់ មករា ដែលមានប្រវត្តិធ្លាប់ប្រកួត៣៥ដង ឈ្នះ៣១ដង(ផ្ដួលគូប្រកួតឱ្យសន្លប់១៤ដង)ចាញ់២ដង និងស្មើ២ដង ត្រូវជួបប្រកួតជាមួយកីឡាករថៃឈ្មោះ ភូតាក់វ៉ាន់ បេឡេបូរីរ៉ាំក្នុងប្រភេទទម្ងន់៥៧គីឡូក្រាម ។ កីឡាករថៃរូបនេះធ្លាប់ប្រកួត៧០ដង ឈ្នះ៥០ដង(ផ្ដួលគូប្រកួតឱ្យសន្លប់១៥ដង) ចាញ់១៥ដង និងស្មើ៥ដង ។ បើទោះជាធន់ មករា មានបទពិសោធន៍ប្រកួតតិចជាងគូប្រកួតជាងពាក់កណ្ដាលក្ដីក៏អ្នកគាំទ្រនៅតែមានទំនុកចិត្តដដែលដោយសារកីឡាកររូបនេះក្រៅពីមានចិត្តសឿងមិនងាយចុះចាញ់ វិជ្ជាគុនរបស់គេក៏ល្អដែលអាចកំដរកីឡាករជើងខ្លាំងថៃដល់ចប់ទឹកដែរ។ ទោះបីយ៉ាងណា ធន់ មករា ក៏មិនអាចធ្វេសប្រហែសបានដែរពេលជួបកីឡាករថៃ ភូតាក់វ៉ាន់ បេឡេបូរីរ៉ាំ ដែលមិនធ្លាប់ជួបគ្នាពីមុនមកបែបនេះមិនដឹងថាវិជ្ជាគុនរបស់គេខ្លាំងដល់កម្រិតណា។
ចំណែកអ៊ុង ភារាក់ ដែលធ្លាប់ប្រកួត៨៨ដងឈ្នះ៧២ដង(ផ្ដួលគូប្រកួតឱ្យសន្លប់២៨ដង)
ចាញ់១៣ដង និងស្មើ៣ដង ត្រូវជួបជាមួយកីឡាករថៃឈ្មោះវេតាន អាយ៉ុងយីម ក្នុងប្រភេទទម្ងន់៨២គីឡូក្រាម ។ កីឡាករថៃរូបនេះធ្លាប់ប្រកួត១២០ដង ឈ្នះ៩០ដង(ផ្ដួលគូប្រកួតឱ្យសន្លប់២៥ដង)ចាញ់២៥ដង និងស្មើ៥ដង។
អ៊ុង ភារាក់ត្រូវបានចាត់ទុកជាជើងខ្លាំងមួយរូបនៅក្នុងពិភពប្រដាល់ ។ ផ្លែកែង និងជង្គង់របស់កីឡាករកម្ពុជារូបនេះពិតជាល្អខ្លាំងណាស់ពេលវាយចេញម្ដងៗកម្រខុសគោលដៅ និងមានទម្ងន់ធ្ងន់ទៀតផងបើគូប្រកួតរងឬគេចមិនទាន់ទេ ច្បាស់ជាស៊យធំមិនខាន។ រីឯកីឡាករថៃដែលគេត្រូវជួបក៏ខ្លាំងមិនអាចមើលស្រាលបានដែរបើយោងតួលេខប្រកួតដែលបានបង្ហាញ ។ ដូច្នេះបើចង់ដឹងថាអ្នកណាខ្លាំងឬខ្សោយមានតែរង់ចាំមើលការប្រកួតជាក់ស្ដែងនៅលើសង្វៀននាថ្ងៃសុក្រប៉ុណ្ណោះ។
ចំណកគូប្រកួតមិត្តភាពធម្មតាមានកីឡាករពុទ្ធ ព្រហស្បតិ៍ មកពីក្លិបពុទ្ធសេរីវង្សពោធិសែនជ័យ ត្រូវជួបប្រកួតជាមួយកីឡាករ ខាំ វណ្ណៈ មកពីក្លិបរ៉ាហាប់ស្វាយប៉ាក និងកីឡាករ ថាន់ ប៊ុនរ៉ុង មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ សេក គឹមសាន មកពីក្លិបអង្គរមានជ័យខេត្តសៀមរាប៕
ចែករំលែកព័តមាននេះ