ខេត្តកណ្តាល ៖ ស្ត្រីជាកម្មករឡឥដ្ឋម្នាក់បានរងគ្រោះដោយសារដៃត្រូវបឺតចូលក្នុងម៉ាស៊ីន ខណៈពេលកំពុងដាក់ដីចូលក្នុងម៉ាស៊ីនសម្រាប់កិនធ្វើឥដ្ឋ បណ្តាលឱ្យរយះដៃស្តាំដល់ឆ្អឹង ។ ហេតុការណ៍នេះកើតឡើងកាលពីវេលាម៉ោង៦និង៥នាទីព្រឹកថ្ងៃទី២៥ ធ្នូ នៅក្នុងឡឥដ្ឋនៅឃុំព្រែកអញ្ចាញ ស្រុកមុខកំពូល ។ នេះជាឧប្បត្តិហេតុដែលតែងតែកើតឡើងជារឿយៗហើយហាក់ដូចជាគ្មានវិធានការរក្សាសុវត្ថិភាពសម្រាប់កម្មករសោះ ។
ស្ត្រីជាកម្មករដែររងគ្រោះដោយចូលដៃក្នុងម៉ាស៊ីននេះឈ្មោះយ៉ន ឃា អាយុ៣៥ឆ្នាំ ស្នាក់នៅក្នុងទីតាំងឡឥដ្ឋខាងលើ មានស្រុកកំណើតនៅឃុំបន្ទាយចក្រី ស្រុកព្រះស្តេច ខេត្តព្រៃវែង ។ ស្ត្រីរងគ្រោះរៀបរាប់ថា គាត់ទើបតែធ្វើការនៅទីនោះបានកន្លះខែប៉ុណ្ណោះ ដោយភារកិច្ចជាអ្នកដាក់ដីចូលក្នុងម៉ាស៊ីនកិនដីឥដ្ឋនោះ។នៅព្រឹកកើតហេតុ ខណៈពេលកំពុងអង្គុយដាក់ដីដូចសព្វដង គាត់លូកដៃជ្រុលចូលក្នុងបន្តិច ស្រាប់តែម៉ាស៊ីនបឺតដៃរបស់គាត់ចូល បណ្តាលឱ្យរយះសាច់ដល់ឆ្អឹងតែម្តង ។
ស្ត្រីរូបនេះបន្តទៀតថា គាត់ធ្វើការនៅក្នុងឡឥដ្ឋនោះមែនតែមិនដឹងថាមានយីហោឈ្មោះអីទេ គ្រាន់តែដឹងថាថៅកែប្រុសឈ្មោះទិត្យ ។ បន្ទាប់ពីរងរបួសក៏ត្រូវបានថៅកែដឹកតាមរថយន្តយកទៅព្យាបាលនៅមន្ទីរពេទ្យព្រះកុសុមៈ ៕
ចែករំលែកព័តមាននេះ