ខេត្តប៉ៃលិន ៖ ចាប់ពីម៉ោង៧ព្រឹក ថ្ងៃអាទិត្យទី២៥ ខែកុម្ភៈ ឆ្នាំ២០១៨ ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ នៅខេត្តប៉ៃលិន ក៏ដូចជាបណ្តាខេត្ត-រាជធានីទូទាំងព្រះរាជាណាចក្រកម្ពុជាដែរ បានចាប់ផ្តើមហើយ បន្ទាប់ពីគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានចំណាយពេល វេលាអស់ជាច្រើនខែ ក្នុងការរៀបចំសម្ភារ និងនីតិវីធី ផ្សេងៗ ដើម្បីធ្វើឱ្យការបោះឆ្នោតនេះ ទទួលបានភាព ជោគជ័យ និងប្រព្រឹត្តទៅដោយរលូនទៅតាមច្បាប់ ។
បើតាមការបញ្ចាក់របស់លោក ប៉ាវ សុមាន ប្រធានលេខាធិការដ្ឋានគណកម្មាធិការរៀបចំការបោះឆ្នោតខេត្តប៉ៃលិនបានឱ្យដឹងថា មណ្ឌលបោះឆ្នោតភូមិភាគទី៤ មានចំនួន ៥ខេត្ត គឺខេត្តបាត់ដំបង ខេត្តប៉ៃលិន ខេត្តបន្ទាយមាជ័យ ខេត្តឧត្តរមានជ័យ និងខេត្តសៀមរាប ដោយមានគណបក្សនយោបាយចំនួន ៣ ឈរឈ្មោះបោះឆ្នោត គឺ១-គណបក្សប្រជាជនកម្ពុជា ទី២ -គណបក្សខ្មែររួបរួមជាតិ និងទី៣ – គណបក្សហ្វុនស៊ីនប៉ិច ។ ដោយឡែកសម្រាប់ខេត្តប៉ៃលិន គឺមានតែ២គណបក្សប៉ុណ្ណោះ ដែលបានឈរឈ្មោះ សម្រាប់ការបោះឆ្នោតជ្រើសតាំងសមាជិកព្រឹទ្ធសភាឆ្នាំ២០១៨ គឺ ១-គណបក្សប្រជាជនកម្ពុជា និងទី២ -គណបក្សរួបរួមជាតិ ។
លោកបានបន្តថា៖ ខេត្តមានការិយាល័យបោះឆ្នោតចំនួន១ គឺការិយាល័យ៤០០៧ នៅក្នុងសាលាវិទ្យាល័យ ហ៊ុន សែន ក្រុងទេពនិម្មិត្ត ដោយចាប់ផ្តើមពីបើកពីម៉ោង ៧និង០០នាទីព្រឹក និងបានបញ្ចប់ ព្រមទាំងរាប់សន្លឹកឆ្នោតរួចរាល់នៅម៉ោង៩ និង០២នាទី ដែលមានអង្គបោះឆ្នោតចំនួន0៥៣នាក់ ក្នុងនោះ អង្គបោះឆ្នោតក្រុមប្រឹក្សាឃុំ- សង្កាត់ក្នុងតំណែងចំនួន ៥២នាក់ និងអ្នកតំណាងរាស្ត្រក្នុងតំណែងចំនួន១រូប គឺលោក ជំទាវ បានស្រីមុំ ។
យោងតាមបទបញ្ជានីតិវិធីនៃការបោះឆ្នោត គឺការិយាល័យត្រូវបើកនៅវេលាម៉ោង៧និង០០នាទីព្រឹក និងបិទនៅម៉ោង៣រសៀល ដោយឡែកសម្រាប់ការិយាលេខ ៤០០៧ ខេត្តប៉ៃលិនបានបញ្ចប់ និងរាប់សន្លឹកឆ្នោតរួចរាល់នៅវេលាម៉ោង ៩និង០២នាទីព្រឹក ដោយសារអង្គបោះឆ្នោតបានអញ្ជើញមកបោះឆ្នោតបានលឿន ហើយដំណើរការបោះឆ្នោតបានបញ្ចប់ទៅដោយរលូន មិនមានបញ្ហោកើតឡើង ក្នុងកំឡុងពេលបោះឆ្នោត និងរាប់សន្លឹកឆ្នោតនោះទេ ហើយភ្នាក់ងារសង្កេតការណ៍គណបក្សនយោបាយ គឺមានតែគណបក្សប្រជាជនកម្ពុជាដែលបានដាក់ភ្នាក់ងារ ។
ចំណែកឯតំណាងអង្គការសង្គមស៊ីវិលមានចំនួន០៣ សម្រាប់សង្កេតការណ៍ក្នុងការបោះឆ្នោត ក្នុងនោះរួមមាន ទី១- សហភាពសហព័ន្ធយុវជនកម្ពុជា ទី២ – សមាគមន៍ សម្ព័ន្ធនិស្សិតបញ្ញាវ័ន្ត ប្រជាធិបតេយ្យកម្ពុជា និងទី៣-សមាគមន៍គ្រឹះស្ថានឧត្តមសិក្សាកម្ពុជា ។
សូមបញ្ចាក់ថា ៖ ក្រោយពីបញ្ចប់ការរាប់សន្លឹកឆ្នោត និងធ្វើការផ្ទៀងផ្ទាត់ឡើងវិញ នៅគណៈកម្មាធិការរៀបចំការបោះឆ្នោតខេត្តប៉ៃលិន ជាលទ្ធផលបឋមគឺ ១-គណបក្សប្រជាជនកម្ពុជាទទួលបាន៥១សម្លេង និងទី២- គណបក្សរួបរួមជាតិទទួលបាន ២សម្លេង ៕
ចែករំលែកព័តមាននេះ