រាជធានីភ្នំពេញ ៖ កាលពីថ្ងៃសៅរ៍ ទី២៤ កុម្ភៈ នៅសង្វៀនទូរទស្សន៍ប៉ុស្ដិ៍លេខ៥ ព្រែកកំពិស ស្ថាប័នមួយនេះបានរកឃើញជើងខ្លាំង២រូបទៀតហើយឡើងអង្គុយកៅអី១៦នាក់ បន្ទាប់ពីរកឃើញអ្នកឡើងទៅអង្គុយកៅអី១៦នាក់បានចំនួន៨នាក់រួចមកហើយ ។…
រាជធានីភ្នំពេញ ៖ កាលពីថ្ងៃសៅរ៍ ទី២៤ កុម្ភៈ នៅសង្វៀនទូរទស្សន៍ប៉ុស្ដិ៍លេខ៥ ព្រែកកំពិស ស្ថាប័នមួយនេះបានរកឃើញជើងខ្លាំង២រូបទៀតហើយឡើងអង្គុយកៅអី១៦នាក់ បន្ទាប់ពីរកឃើញអ្នកឡើងទៅអង្គុយកៅអី១៦នាក់បានចំនួន៨នាក់រួចមកហើយ ។ កីឡាករ រឿន ឈី មកពីក្លិបស្វាយរលំឫទ្ធីជ័យ ដែលត្រូវគេស្គាល់ជាកីឡាករថ្មីសន្លាង បានឡើងអង្គុយកៅអីក្នុងវគ្គ១៦នាក់ ក្រោមការចាប់អារម្មណ៍ពីអ្នកទស្សនាខ្លាំងក្លាតែម្ដង ដោយសារតែបានវាយបំបាក់កីឡាករជើងខ្លាំងមួយរូប គឺស៊ឹម ប៊ុនឆៃ ឱ្យធ្លាក់ហាលអាវក្នុងព្រឹត្តិការណ៍ TV5 Knock Out Series K-Cement ក្នុងប្រភេទទម្ងន់៥៧គីឡូក្រាម។
យោងតាមលទ្ធផលដែលបានស្ដែងឡើងគ្មានអ្នកណាមិនភ្ញាក់ផ្អើលនោះទេ ក្នុងពេលដែលកីឡាករស្រករមុន និងជំនាន់ថ្មី២រូបប៉ះគ្នា ហើយកីឡាករវ័យក្មេង រឿន ឈី បង្គោលខៀវ បែរជាអាចទម្លាក់គូប្រកួតឱ្យធ្លាក់ហាលអាវមិនគួរជឿ ក្នុងពេលដែលគូប្រកួតរបស់លោកដែលបានឡើងប្រកួតនោះ គឺជាជើងខ្លាំងម្នាក់ ហើយត្រូវបានគេទទួលស្គាល់កេរ្តិ៍ឈ្មោះជាជើងខ្លាំងយូរមកហើយ ។ មានការកត់សម្គាល់ថា ការបរាជ័យរបស់ស៊ឹម ប៊ុន ឆៃ មកពីក្លិបព្រៃទទឹង ខេត្តបាត់ដំបង ដែលជាកីឡាករល្អម្នាក់ មិនមែនជារឿងស៊យឬភ្លាត់ស្នៀតនោះទេ តែជាការបរាជ័យដោយខ្វះបច្ចេកទេស និងជំហរវាយទប់១០០ភាគរយតែម្ដង ជាពិសេសក្នុងពេលដែលកីឡាករជាគូប្រកួតរបស់លោកហាក់មានបច្ចេកទេសល្អជាងក្នុងការវាយលុកម្ដងៗ។
រឿន ឈី ប្រកួតជាមួយកីឡាករ ស៊ឹម ប៊ុនឆៃ នៅក្នុងថ្ងៃនោះ គ្មានអ្នកណាស្មានថា កីឡាករដែលទើបមានមុខឡើងប្រកួតដណ្ដើមជើងឯករូបនេះ ធ្វើបានល្អដល់ម្ល៉ឹងនោះទេ ប៉ុន្តែអ្វីៗបានកើតមានឡើងបន្ទាប់ពីគេអាចវាយទម្លាក់ជើងខ្លាំងមួយរូបឱ្យធ្លាក់ហាលអាវយ៉ាងអាម៉ាស់ ហើយធ្លាក់ក្នុងស្ថានភាពបោះបង់ការប្រកួតនៅទឹកទី២ទៅទៀត ។ ជាងពាក់កណ្ដាលអ្នកទៅទស្សនាដោយផ្ទាល់សុទ្ធតែមានការភ្ញាក់ផ្អើលដែលអ្នកឆ្លងកាត់ការប្រកួតបានច្រើនរាប់មិនអស់ បែរជាប្រកួតទៅមិនរួចជាមួយ កីឡាករថ្មោងថ្មី ដែលស្ទើរមិនមានអ្នកស្នេហាវិស័យប្រដាល់ណាម្នាក់ស្គាល់ពីមុនទាល់តែសោះ ។ គ្រប់គ្នាសុទ្ធតែមានការលើកឡើងថាកីឡាករ រឿន ឈី នឹងមិនអាចទៅរួចជាមួយកីឡាករជើងចាស់បានទេ ប៉ុន្តែផ្ទុយពីការលើកឡើងគឺគេមានឱកាសបានឈ្នះការប្រកួតទាល់តែបាន ដោយសារតែគេមានបច្ចេកទេស និងកម្លាំងស៊ុហ្វល្អជាងដាច់ឆ្ងាយ ។
កីឡាករវ័យក្មេង រឿន ឈី ក្រោយពីត្រូវប្រកាសថាបានវាយគូប្រកួតឱ្យបោះបង់ការតស៊ូក្នុងទឹកទី២ គេអរស្ទើរហោះ ជាពិសេសក្នុងពេលដែលគេក៏ភ័យបុកពោះថា ការសន្លប់របស់គូប្រកួតគឺជាការចាប់កំហុសក្រែងលោកវាយថែមជ្រុលនោះផង ។ ពេញរយៈពេល២ទឹក គេឃើញកីឡាករស៊ឹម ប៊ុនឆៃ ប្រឹងបញ្ចេញក្បាច់ប្លែកៗដើម្បីវាយសម្លុតគូប្រកួតយ៉ាងខ្លាំង ប៉ុន្តែកម្រិតនៃការវាយចេញរបស់គេ គឺរំពឹងតែលើគូប្រកួត វាយសម្រុក ហើយបាក់ជំហរប៉ុណ្ណោះ បើឱ្យលោកស្ទុះវាយចេញមុនដើម្បីយកតែម គឺមិនសូវមានទេសម្រាប់ការប្រកួតមួយនេះ អ៊ីចឹងហើយទើបឱកាសបានឈ្នះមិនអាចទៅរួច។
ការប្រកួតទាំងមូល កាន់តែឃើញពីចំណុចខ្សោយរបស់គេទ្វេដង នៅពេលដែលកីឡាករវ័យក្មេង រឿន ឈី អាចវាយសម្រុកត្រូវចំគោលដៅ ហើយប្រើកម្លាំង និងបច្ចេកទេសវាយចូលដោយមិនញញើតគូប្រកួត ដែលធ្វើឱ្យអ្នកណាៗ ក៏ញាក់សាច់ និងកោតសរសើរមិនដាច់ ។ មួយដៃៗរបស់កីឡាករស៊ឹម ប៊ុនឆៃ ដែលត្រូវចំគោលដៅម្ដងៗគឺមានទម្ងន់ខ្លាំង ប៉ុន្តែកីឡាកររឿន ឈី នៅតែអាចទប់ជាប់ ហើយវាយសម្រុកបានល្អ ទើបធ្វើឱ្យការប្រកួតទាំងមួលត្រូវអ្នកគាំទ្រពេញចិត្ត ជាពិសេសក្នុងពេលដែលគេស្ទុះចូលវាយប្ដូរ ហើយលទ្ធផលចុងក្រោយអាចឱ្យកីឡាករ ស៊ឹម ប៊ុនឆៃ បោះបង់ការប្រកួតក្នុងទឹកទី២។
លោក សេង កដិកា អ្នករៀបចំការប្រកួតប្រចាំនៅប៉ុស្ដិ៍លេខ៥បានបង្ហាញការភ្ញាក់ផ្អើល នៅពេលបញ្ចប់ការប្រកួតស្រាប់តែកីឡាករវ័យក្មេងមិនសូវមានបទពិសោធន៍ច្រើន រឿន ឈី អាចបំបាក់កីឡាករល្បីឈ្មោះ និងជាជើងខ្លាំងម្នាក់ឱ្យធ្លាក់ហាលអាវមុនចប់ទឹកទី៣។ លោកថា រវាងកីឡាករទាំងពីរបើនិយាយពីបទពិសោធន៍គឺខុសគ្នាជិតមួយជា២ ប៉ុន្តែមកពីកីឡាករខុសជំនាន់ទាំងពីរមានគីឡូប៉ុនគ្នា ហើយហ៊ានប្រកួតគ្នាក្នុងពេលផ្គូផ្គង ទើបខាងគណៈកម្មការសម្រេចចិត្តដាក់ឱ្យប្រកួតដណ្ដើមជើងឯករួមគ្នា ។ លោកថា ការប្រកួតណ្ដើមជើងឯករដូវកាលថ្មីទើបតែបានសប្ដាហ៍ទី៥ប៉ុណ្ណោះ តែមានភាពទាក់ទាញ ដោយសារសមាសភាពកីឡាករខ្លាំងៗ និងល្បីឈ្មោះរហូតដល់ជាងពាក់កណ្ដាល ក៏បានបង្ហាញខ្លួនក្នុងព្រឹត្តិការណ៍នេះ។
ក្នុងចំណោមកីឡាករ៣២រូបដែលខាងគណៈកម្មការទើបតែជម្រើសថ្មី មានលាយឡំទាំងកីឡាករល្បីៗនៅក្នុងពិភពប្រដាល់ និងកីឡាករវ័យក្មេងមួយៗ ដោយសារតែលោកចង់បណ្ដុះអ្នកមានសមត្ថភាពជំនាន់ក្រោយ ។ យ៉ាងណាមិញលោកថា បើទោះជាក្នុងចំណោមសមាសភាពដែលចូលរួមប្រកួតប្រជែង មានកីឡាករមួយចំនួនវ័យក្មេង និងមានបទពិសោធន៍តិចជាងកីឡាករៗជើងចាស់ តែលោកប្រកាសថា គឺសុទ្ធតែជាកីឡាករដែលមានសមត្ថភាពដូចជាករណីកីឡាករ រឿន ឈី ដែលអាចបំបាក់ជើងខ្លាំងបានកាលពីថ្ងៃសៅរ៍ គឺជាភស្តុតាងស្រាប់់ ។ លោកថា កីឡាករល្បីឈ្មោះ ហើយឆ្លងកាត់ការប្រកួតបានច្រើន មិនប្រាកដថា អាចមើលស្រាលកីឡាករវ័យក្មេងដែលទើបឈានឡើងបានទេ ដោយសារតែក្នុងពេលប្រកាសជ្រើសរើសគឺលោក និងគណៈកម្មការសុទ្ធតែបានកត់សម្គាល់ពីបច្ចេកទេស និងភាពក្លាហានរបស់កីឡាករទាំង៣២រូប ។ ខណៈរូបមន្តដែលបានធ្វើឡើងក៏ត្រូវលោកប្រកាសថា មិនមានប៉ុស្ដិ៍ផ្សេងធ្វើបាន ដោយសារតែការប្រកួតម្ដងៗគឺត្រូវការជ្រើសរើសកីឡាករដែលមានសមត្ថភាព និងគីឡូឱ្យត្រូវគ្នារហូតដល់៣២រូបមកពីក្លិបផ្សេងគ្នា ក្រោមរូបមន្តឱ្យប្រកួតចាប់គូគ្នាចាញ់ធ្លាក់ៗ ដែលមិនភ័យរឿងអ្នកណាប្រកួតមិនអស់ដៃ ។
លោកបានហៅរូបមន្តនេះថា ជារូបមន្តធ្វើឱ្យលោក និងអ្នកគាំទ្រពេញចិត្តរាល់លទ្ធផលដែលកើតឡើង ដោយសារតែកីឡាករម្ខាងៗសុទ្ធតែប្រឹងប្រកួតអស់ដៃ ដែលអាចនិយាយបានថា អ្នកចាញ់ធ្លាក់ និងអ្នកបានឡើងសុទ្ធតែធ្វើឱ្យអ្នកគាំទ្រអស់ចិត្តមិន
ខុសគ្នា ។ ឆ្លងផុតការប្រកួតសប្ដាហ៍ទី៥ គឺមានន័យថា សង្វៀនប៉ុស្ដិ៍លេខ៥របស់លោករកឃើញអ្នកឡើងអង្គុយកៅអី១៦នាក់បាន១០រូបហើយ ដោយរង់ចាំតែ៣សប្ដាហ៍បន្ទាប់ត្រូវបញ្ចប់នឹងឈានដល់ការប្រកួតជម្រុះជុំទី២៕
ចែករំលែកព័តមាននេះ