ខេត្តប៉ៃលិន ៖ អ្នកធ្វើដំណើរចេញពីទីរួមខេត្តប៉ៃលិនឆ្ពោះទៅទិសខាងលិចចម្ងាយប្រមាណជា២០គីឡូម៉ែត្រ ដល់ភូមិផ្សារព្រំ ឃុំស្ទឹងកាច់ ស្រុកសាលាក្រៅ នោះនឹងឃើញមានការអភិវឌ្ឍគួរឱ្យកត់សម្គាល់ ហើយអ្វីដែលគេសង្កេតឃើញមានភាពលេចធ្លោជាងគេនោះ គឺមានក្រុមហ៊ុនរៀបចំពុះដីឡូតិ៍ អង្កន់ដាក់លក់ និងបង់រំលោះជូនប្រជាពលរដ្ឋដែលមានតម្រូវការ និងការសាងសង់សំណង់ផ្សេងៗ ពិសេស គឺអគារកាស៊ីណូថ្មីៗ ដែលកំពុងចាប់ផ្តើមសាងសង់ជាបណ្តើរៗ ធ្វើឱ្យរីកស្គុះស្គាយព្រោងព្រាត នៅក្បែរព្រំដែនកម្ពុជា-ថៃ ខេត្តប៉ៃលិនតែម្តង ។
ព័ត៌មានពីលោកមាស សាវ៉ាត មេភូមិផ្សារព្រំបានឱ្យដឹងថា រហូតមកដល់ពេលនេះកំពុងតែមានការអភិវឌ្ឍន៍ជាបណ្តើរៗ នៅក្នុងទឹកដីភូមិផ្សារព្រំ ដោយខាងឈ្មួញមានការពុះដីឡូតិ៍លក់ជាបណ្តើរៗ ហើយនៅជាប់នឹងអូរព្រំដែន ក៏មានការឈូសឆាយដី អភិវឌ្ឍន៍ថ្មីៗទៀត គួរឱ្យកត់សម្គាល់ផងដែរ ។ លោកបន្តទៀតថា មានការសាងសង់ផ្ទះល្វែង ការសាងសង់ផ្ទះវីឡា និងធ្វើអគារកាស៊ីណូថ្មីៗ ថែមទៀត ក្នុងនោះគេក៏ឃើញមានប្រជាពលរដ្ឋធ្វើចំណាកស្រុកមកពីតាមបណ្តាខេត្តនានាចូលមកស្នាក់នៅធ្វើការកាស៊ីណូ ។
ម្យ៉ាងវិញទៀតការប្រកបរបរទទួលទានរបស់អ្នកភូមិរស់នៅក្នុងតំបន់នោះ មានការលក់ដាច់ច្រើនជាងមុន ព្រោះមានម៉ូយចូលទិញទាំងយប់ ទាំងថ្ងៃ ហើយមានជនជាតិប្លែកៗដូចជា ជនជាតិចិនជាដើម ។
ចំណែកអ្នកប្រកបរបររត់ម៉ូតូឌុបក៏រកបានម៉ូយច្រើនដឹកចេញពីកាស៊ីណូទៅផ្ទះជួល និងផ្ទះសំណាក់ដោយក្នុង១ថ្ងៃៗ បានប្រាក់សម្រាប់យកទៅផ្គត់ផ្គង់ជីវភាពគ្រួសារផងដែរ ។
ដោយឡែកគេមិនសូវឃើញអ្នករស់នៅក្បែរព្រំដែននេះធ្វើចំណាកស្រុកទៅធ្វើការងារនៅប្រទេសថៃប៉ុន្មាននោះទេ ព្រោះម្នាក់ៗមានការងារធ្វើរៀងៗខ្លួន បើមានអ្នកទៅធ្វើការងារនៅទឹកដីថៃ មានត្រឹមតែពេលទំនេរពីការងារប៉ុណ្ណោះ លុះដល់រដូវប្រមូលផលពោតក្រហម និងដំឡូងមីក៏នាំគ្នាត្រឡប់មកវិញ ៕
ចែករំលែកព័តមាននេះ