ខេត្តប៉ៃលិន ៖ មានករណីគ្រោះថ្នាក់ចរាចរមួយបានកើតឡើងបណ្តាលឱ្យក្មេងប្រុសតូចម្នាក់ស្លាប់នៅនឹងកន្លែង ខណៈរត់លេងនៅក្បែរចិញ្ចើមផ្លូវឃើញរថយន្តចតឈប់នៅក្បែរនោះ លុះអ្នកបើកបរមិនបានមើលមុខក្រោយពេលចេញដំណើរបណ្តាលឱ្យបុក និងកិនស្លាប់តែម្តង ។ ហេតុការណ៍រថយន្តបុក និងកិនក្មេងតូចស្លាប់នេះបានកើតឡើងកាលពីវេលាម៉ោង៨និង១២នាទីព្រឹក ថ្ងៃទី២៤ ខែកុម្ភៈ ឆ្នាំ២០១៨ ត្រង់ចំណុចក្បែរចិញ្ចើមផ្លូវ ក្នុងភូមិអូរសួស្តី សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីនគរបាលបានឱ្យដឹងថា អ្នកបើកបររថយន្តមានឈ្មោះ ហ៊ុន សាខុន ភេទប្រុស អាយុ៣២ឆ្នាំ មុខរបរលក់ទឹកសុទ្ធ រស់នៅភូមិវត្ត សង្កាត់ប៉ៃលិន ក្រុងប៉ៃលិន ដោយបើកបររថយន្តមួយគ្រឿងពណ៌ខ្មៅ ពាក់ផ្លាកលេខ បាត់ដំបង ២A-០២៨៤ មានទឹកសុទ្ធពេញទ្រុង ។ អ្នករួមដំណើរម្នាក់ឈ្មោះ ខេម ភេទប្រុស អាយុ២៥ឆ្នាំ ជាព្រូរថយន្ត រស់នៅភូមិអូរតាប្រាង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ ចំណែកក្មេងប្រុសដែលត្រូវរថយន្តកិនស្លាប់មានឈ្មោះ សៀន គីមឡាង ភេទប្រុស អាយុ១ឆ្នាំ រស់នៅភូមិអូរសួស្តី សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ស្លាប់នៅនឹងកន្លែងកើតហេតុ ។
ប្រភពបន្តទៀតថា មូលហេតុដែលបណ្តាលបុក និងកិនក្មេងស្លាប់នេះមកពីកត្តាអ្នកបើកបររថយន្តខ្វះការប្រុងប្រយ័ត្ន ខណៈដឹកទឹកលក់តាមផ្ទះមុននឹងចេញមិនព្រមចុះទៅមើលខាងមុខ និងខាងក្រោយរថយន្តជាមុនសិន ។ រីឯឪពុកម្តាយកុមាររងគ្រោះក៏មានការបណ្តោយឱ្យក្មេងរត់លេងនៅក្បែរមុខផ្ទះ ដោយមិនចេញមកមើលក្មេងតូចពេលមានរថយន្តតូចធំចូលមកក្បែរ ។ ទោះបីជាយ៉ាងណាក៏ដោយនគរបាលបានចាប់ឃាត់រថយន្តខាងលើរួមទាំងអ្នកបើកបរ និងព្រូយកទៅស្នងការនគរបាលខេត្តដើម្បីចាត់ការតាមនីតិវិធី ៕
ចែករំលែកព័តមាននេះ