រាជធានីភ្នំពេញ ៖ ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងអន្តរជាតិនៅខេត្តព្រះសីហនុនាថ្ងៃទី១១ មីនា ខាងមុខនេះ អាចនឹងមានអ្នកចូលរួមប្រមាណ២ពាន់នាក់ ធ្វើឱ្យយើងមានកង្វល់ផងដែរដោយសារតែអ្នកចូលរួមមិនសូវមានកំណើន ។ លោក វ៉ាត់…
រាជធានីភ្នំពេញ ៖ ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងអន្តរជាតិនៅខេត្តព្រះសីហនុនាថ្ងៃទី១១ មីនា ខាងមុខនេះ អាចនឹងមានអ្នកចូលរួមប្រមាណ២ពាន់នាក់ ធ្វើឱ្យយើងមានកង្វល់ផងដែរដោយសារតែអ្នកចូលរួមមិនសូវមានកំណើន ។ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាមានប្រសាសន៍បែបនេះនៅក្នុងសន្និសីទសារព័ត៌មានមួយនាទីស្នាក់ការគណៈកម្មាធិការជាតិអូឡាំពិកកម្ពុជា(NOCC) កាលពីថ្ងៃទី២២ កុម្ភៈ កន្លងទៅនេះ ។
លោក វ៉ាត់ ចំរើន មានប្រសាសន៍បន្តថា ព្រឹត្តិការណ៍នេះយើងរៀបចំធ្វើជារៀងរាល់ឆ្នាំ ហើយលើកនេះគឺជាលើកទី៧ ។ រហូតមកទល់ពេលនេះមានអ្នកមកចុះឈ្មោះចូលរួមជាង១០០០នាក់ក្នុងនោះភ្ញៀវបរទេសមានជាង២០០នាក់មកពី២៨សញ្ជាតិទូទាំងសាកលលោក ដែលភាគច្រើនជនជាតិជប៉ុនស្ថិតក្នុងលំដាប់លេខ១ សហរដ្ឋអាមេរិកលេខ២និងចក្រភពអង់គ្លេសលេខ៣ ។ ចំពោះវិញ្ញាសានិងតម្លៃចុះឈ្មោះចូលរួមប្រកួតសម្រាប់វិញ្ញាសា២១គីឡូម៉ែត្រជនបរទេស៤៥ដុល្លារ កម្ពុជា១៥ដុល្លារ វិញ្ញាសា១០គីឡូម៉ែត្រជនបរទេស៣៥ដុល្លារ កម្ពុជា១០ដុល្លារ និងវិញ្ញាសា៣គីឡូម៉ែត្រជនបរទេស២៥ដុល្លារ និងកម្ពុជា៥ដុល្លារ ។ លោកថា សំបុត្រនឹងបន្តដាក់លក់រហូតជិតដល់ថ្ងៃប្រកួត។
លោកបញ្ជាក់ថា គោលបំណងនៃការរៀបចំព្រឹត្តិការណ៍រត់ប្រណាំងអន្តរជាតិពាក់កណ្ដាលម៉ារ៉ាតុងនៅខេត្តព្រះសីហនុនេះ ធ្វើឡើងដើម្បីអភិវឌ្ឍកីឡាតំបន់ឆ្នេរដែលក្នុងនោះក៏មានការរត់ប្រណាំងប្រចាំឆ្នាំដោយមានការចូលរួមសហការពីសំណាក់អាជ្ញាធរខេត្តផងដែរ ។ ឆ្នេរខ្សាច់ខេត្តព្រះសីហនុ ជាទីដែលភ្ញៀវទេសចរទៅកម្សាន្តច្រើនជាងគេគឺឆ្នេរអូឈើទាល ។ ទីតាំងនោះជាចំណុចចាប់ផ្ដើម និងជាទីបញ្ចប់នៃព្រឹត្តិការណ៍ខាងលើ ពោលគឺស្ថិតនៅក្បែររូបសំណាក «ឆ្នេរសមុទ្រកម្ពុជាតារារះនាទិសនិរតី»។ អ្នកចូលរួមទាំងអស់នឹងរត់ចេញពីកណ្ដាលក្រុងតាមផ្លូវឯករាជ្យ ដែលជាផ្លូវតាមបណ្ដោយឆ្នេរសមុទ្រ។
ព្រឹត្តិការណ៍ខាងលើពិតជានាំមកនូវក្ដីសប្បាយរីករាយ ដោយសារអ្នកចូលរួមរត់បានមើលឃើញឆ្នេរសមុទ្រដ៏ស្រស់ត្រកាល និងមើលឃើញភាពទាក់ទាញនៃទីក្រុងដែលមានសក្ដានុពលទេសចរណ៍មួយនេះ ។
ទោះបីយ៉ាងណាលោកវ៉ាត់ ចំរើន បានសម្ដែងក្ដីបារម្ភផងដែរក្នុងការរៀបចំព្រឹត្តិការណ៍នេះ ។ ជាក់ស្ដែងលោកបានមានប្រសាសន៍យ៉ាងដូច្នេះថា អ្វីដែលជាកង្វល់របស់យើងនៅតែមានជារៀងរាល់ឆ្នាំ ដោយសារតែជើងហោះហើរផ្ទាល់មកកាន់ខេត្តព្រះសីហនុ នៅមិនទាន់មានភាពជាក់លាក់នៅឡើយ ពោលគឺមានដែរតែក្នុងមួយអាទិត្យមានតែមួយជើងប៉ុណ្ណោះ ក្នុងនោះភ្ញៀវបរទេសភាគច្រើនជាជនជាតិចិនដែលគេធ្វើដំណើរមកលេងកាស៊ីណូប៉ុណ្ណោះ មិនមែនភ្ញៀវទេសចរទាំងអស់នោះទេ ។ ដូច្នេះលោកគិតថា កង្វះមធ្យោបាយតភ្ជាប់នេះ បានធ្វើឱ្យការរៀបចំរបស់យើងមានបញ្ហា កំណើនអ្នកចូលរួមមិនមែនមិនកើននោះទេ តែវាមានកំណើនតិចតួចពេក ។
សព្វថ្ងៃនេះ គណៈកម្មាធិការជាតិអូឡាំពិកកម្ពុជាកំពុងតែស្វែងរកយុទ្ធសាស្ត្រយ៉ាងណាដើម្បីទាក់ទាញឱ្យគេមកចូលរួមកាន់តែច្រើន។
លោក សែម ផល្លា មន្ត្រីសម្របសម្រួលកម្មវិធីរត់ពាក់កណ្ដាលម៉ារ៉ាតុងប្រចាំគណៈកម្មាធិការជាតិអូឡាំពិកកម្ពុជាមានប្រសាសន៍ថាបើសិនជាយើងចង់ឱ្យគេមកចូលរួមច្រើន យើងត្រូវផ្សព្វផ្សាយឱ្យបានទូលំទូលាយ ដើម្បីឱ្យគេបានយល់ពីគោលដៅនៃកម្មវិធីកីឡាទេសចរណ៍របស់យើង គឺរត់ការពារបរិស្ថានតំបន់ឆ្នេរសមុទ្រដ៏ស្រស់ស្អាតរបស់យើង៕
ចែករំលែកព័តមាននេះ