ខេត្តបន្ទាយមានជ័យ ៖ ជម្លោះរវាងស្រី និងស្រី នៅគ្លីនិកមួយបានកើតឡើងឈានដល់ការ ប្រវាយប្រតប់គ្នាបង្កការភ្ញាក់ផ្អើលកាលពីវេលាម៉ោងជាង៤ល្ងាច ថ្ងៃទី២៣ កុម្ភៈ ២០១៨ ក្នុងភូមិក្បាលស្ពាន១ សង្កាត់ និងក្រុងប៉ោយប៉ែត។ អ្នកឃើញហេតុការណ៍សង្ស័យថា ជារឿងស្នេហាត្រីកោណ។ ប្រភពពីកន្លែងកើតហេតុនិយាយថា ដំបូងឡើយនៅម៉ោងប្រហែល៤ល្ងាច ថ្ងៃកើតហេតុ មានបុរសម្នាក់បានចូលទៅគ្លីនិកនគររាជ ដោយឲ្យគ្រូពេទ្យនៅទីនោះ បន្តោកសេរ៉ូមកម្លាំងឲ្យស្ត្រីម្នាក់ លុះបានមួយសន្ទុះស្រាប់តែ លេចមុខស្ត្រីម្នាក់ទៀតគេសង្ស័យថា ជាប្រពន្ធចូលទៅតាមក្រោយ ខណៈបុរសខាងលើកំពុងអង្គុយនិយាយសាសង ជាមួយនាង ដែលគ្រូពេទ្យដាក់សារ៉ូមឲ្យក៏ផ្ទុះជាជម្លោះប្រតាយប្រតប់គ្នា។ ខណៈភាគីម្ខាងដៃកំពុងជាប់សារ៉ូម និងឈានដល់គប់ខ្នើយដាក់គ្នាតែត្រូវបុរសនោះ ក៏ដូចជាក្រុមគ្រូពេទ្យឃាត់ទាន់ពេល ហើយបុរសនោះព្យាយាមឃាត់នាងប្រពន្ធអូសចេញទៅក្រៅដឹកតាមម៉ូតូចេញទៅបាត់។
ប្រភពថា បុរសនោះជានគរបាលអន្តោប្រវេសន៍ច្រកទ្វារអន្តរជាតិប៉ោយប៉ែតឈ្មោះហួង។ ប្រភពបន្តថា ក្រោយពីបុរសខាងលើដឹកប្រពន្ធទៅបាត់មួយសន្ទុះស្រាប់តែនាងជាប្រពន្ធជិះរថយន្តមកជាមួយឪពុកម្តាយទៅកាន់គ្លីនិកខាងលើម្តងទៀត សង្ស័យចង់ជួបប្រកួតដណ្តើមឈ្នះចាញ់គ្នា ដើម្បីទាមទារអ្វីមួយ។ ប៉ុន្តែស្ត្រីម្នាក់ដែលចូលទៅគ្លីនិកឲ្យគ្រូពេទ្យដាក់សារ៉ូមនោះបានចេញទៅបាត់មុនបន្តិចធ្វើឲ្យ៣នាក់ឪពុកកូនខឹងសម្បារករឿងម្ចាស់គ្លីនិក និងផ្ទុះជម្លោះជាថ្មីជាមួយក្រុមគ្រូពេទ្យ។ តាមវីដេអូឃ្លីបក្នុងគ្លីនិក បានឲ្យដឹងថា ៣នាក់ឪពុកម្តាយ និងកូនខាងលើ បានចូលទៅក្នុងគ្លីនិករករឿងគ្រូពេទ្យ ដោយសុំឆែកផ្ទះដើម្បីរកស្ត្រីដែលគ្រូពេទ្យបន្តោកសេរ៉ូមឲ្យ ហើយព្យាយាមចោទថាគ្លីនិកនេះលាក់មនុស្ស ធ្វើឲ្យម្ចាស់គ្លីនិកខឹងសម្បាយ៉ាងខ្លាំង ដោយសារការចូលទៅគ្លីនិកនោះ គ្មានការអនុញ្ញាត ម្យ៉ាងករណីសុំឆែកឆេរនោះគ្មានដីការបស់តុលាការ។
ម្ចាស់គ្លីនិកបន្តថា ដោយសារទ្រាំមិនបាន នឹងសម្ដីគ្រួសារមួយនេះ គាត់ក៏ទាក់ទងហៅអាវុធហត្ថឲ្យទៅកន្លែងកើតហេតុ ដើម្បីជួយអន្តរាគមន៍ ទើបគ្រួសារមួយនេះព្រមចាកចេញទៅវិញ ខណៈឃើញកម្លាំងអាវុធហត្ថទៅដល់។ បុរសម្នាក់ក្នុងគ្រួសារខាងលើត្រូវគេស្គាល់ថា ជានាយរងប៉ុស្តិ៍នគរបាលអន្តោប្រវេសន៍ច្រកទ្វារ អន្តរជាតិប៉ោយប៉ែត គឺលោកវរៈសេនីយ៍ទោ នួន ច័ន្ទសុភ័ក្រ និងជាឪពុកក្មេកបុរសម្នាក់ដែលប្រពន្ធតាមទៅរករឿងក្នុងគ្លីនិកខាងលើ។ ជុំវិញករណីខាងលើភាគីពាក់ព័ន្ធទាំងអស់មិនអាចទាក់ទងសុំការបំភ្លឺបានទេ ព្រោះបានចាកចេញទៅអស់ ម្យ៉ាងមិនស្គាល់លេខទូរស័ព្ទ៕
https://youtu.be/WcB1ijHNRUU
ចែករំលែកព័តមាននេះ