ជា សំនៀង ត្រៀមខ្លួនរួចរាល់បំបាក់ជើងខ្លាំងថៃលើសង្វៀនអន្តរជាតិ
រាជធានីភ្នំពេញ ៖ នៅល្ងាចថ្ងៃសៅរ៍ ទី២៤ កុម្ភៈ ស្អែកនេះ ការប្រកួតប្រដាល់អន្តរជាតិ នៅលើសង្វៀនទូរទស្សន៍ប៉ុស្ដិ៍លេខ៥ ព្រែកកំពិស ម្ដុំព្រែកហូរជាយរាជធានីភ្នំពេញ…
រាជធានីភ្នំពេញ ៖ នៅល្ងាចថ្ងៃសៅរ៍ ទី២៤ កុម្ភៈ ស្អែកនេះ ការប្រកួតប្រដាល់អន្តរជាតិ នៅលើសង្វៀនទូរទស្សន៍ប៉ុស្ដិ៍លេខ៥ ព្រែកកំពិស ម្ដុំព្រែកហូរជាយរាជធានីភ្នំពេញ…
រាជធានីភ្នំពេញ ៖ នៅល្ងាចថ្ងៃសៅរ៍ ទី២៤ កុម្ភៈ ស្អែកនេះ ការប្រកួតប្រដាល់អន្តរជាតិ នៅលើសង្វៀនទូរទស្សន៍ប៉ុស្ដិ៍លេខ៥ ព្រែកកំពិស ម្ដុំព្រែកហូរជាយរាជធានីភ្នំពេញ
នឹងកាន់តែមានការចាប់អារម្មណ៍ថែមទៀតហើយបន្ទាប់ពីបានប្រកាសឱ្យដឹងពីសមាសភាពកីឡាករកម្ពុជា និងថៃ២រូប អមដោយកីឡាករកម្ពុជា៤រូបដែលមានឈ្មោះប្រកួតគ្នាចាញ់ធ្លាក់ៗឆ្ពោះទៅដណ្ដើមជើងឯកនឹងបង្ហាញវត្តមាននៅលើសង្វៀននោះដែរ ។
កីឡាករកម្ពុជជា សំនៀង បានក្លាយជាសមាសភាពរបស់កម្ពុជាតែមួយរូបគត់ ស្វាគមន៍ការប្រកួតអន្តរជាតិជាមួយកីឡាករថៃនៅសប្ដាហ៍នេះ ខណៈដែលការប្រកួតទាំងមូលក៏មានការប្រកួតជម្រុះជើងឯកវគ្គថ្មីរវាងកីឡាករ៤នាក់ដើម្បីស្វែងរកជើងខ្លាំងឱ្យគ្រប់១៦នាក់ក្នុងចំណោម៣២នាក់ផងដែរ។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចតទៅមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅតំបន់ប៉ុស្ដិ៍លេខ៥ក៏មានកំណើនអ្នករស់នៅច្រើនឡើង ក្រោយមានវត្តមានសំណង់បុរីព្រោងព្រាតប្រដេញគ្នា ។ កីឡាករកម្ពុជា និងថៃ២រូប គឺ ជាសំនៀង និងជើងខ្លាំងមកពីប្រទេសថៃឈ្មោះ Sensak Sorakchai នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ ។ អ្នករៀបចំការប្រកួតបានអះអាងថា នៅក្នុងថ្ងៃនោះ កីឡាករកម្ពុជាចំនួន៤រូបក៏ត្រូវប៉ះគ្នាក្នុងលក្ខណៈជម្រុះចាញ់ធ្លាក់ៗផងដែរ ទើបមានអ្នកទស្សនាភាគច្រើនយល់ថា វត្តមានកីឡាករកម្ពុជា និងថៃ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈជម្រុះយកអ្នកខ្លាំងទៅប្រកួតយកជើងឯកទេ ពិតជាធ្វើឱ្យអ្នកស្នេហាវិស័យប្រដាល់ចាប់អារម្មណ៍ ។
លោកអះអាងថា បើទោះជាការប្រកួតជ្រើសរើសជើងឯកមានការចាប់អារម្មណ៍រួចជាស្រេច ក៏ប៉ុស្តិ៍លេខ៥នៅតែបានបញ្ចូលការប្រកួតជាលក្ខណៈអន្តរជាតិមួយគូៗនៅក្នុងការប្រកួតនោះដើម្បីឱ្យរឹតតែទាក់ទាញដែរ ។ វត្តមានសមាសភាពគូអន្តរជាតិ ក៏ត្រូវបានសម្រាំងយ៉ាងពិសេសដើម្បីឱ្យអ្នកទស្សនាកាន់តែកន្ត្រាក់អារម្មណ៍នៅពេលកីឡាករប្រកួតគ្នា។
លោក សេង កដិកា អ្នករៀបចំកម្មវិធីប្រកួតប្រដាល់ប្រចាំសង្វៀនទូរទស្សន៍ប៉ុស្តិ៍លេខ៥បញ្ជាក់ថា សមាសភាពខាងកម្ពុជាសម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ ជា សំនៀង ដោយសារតែកីឡាកររូបនេះធ្លាប់បានឡើងប្រកួតនៅលើសង្វៀនអន្តរជាតិរបស់ប៉ុស្តិ៍លេខ៥ច្រើនលើកមកហើយ តែងតែធ្វើឱ្យរញ្ជួយ និងទាក់ទាញដល់អ្នកទស្សនា ។ លោកប្រកាសថា វត្តមានចុះមករបស់កីឡាករថៃ Sensak Sorakchai មានតែជា សំនៀង ម្នាក់ប៉ុណ្ណោះ ដែលលោកសម្លឹងឃើញថាមានបទពិសោធន៍ និងមានសមត្ថភាពគ្រប់គ្រាន់អាចឱ្យប្រកួតជាមួយបាន ។
លោកក៏បានកំណត់ឱ្យកីឡាករកម្ពុជារូបនេះ ហ្វឹកហាត់ជាប់លាប់មិនតិចជាង១សប្ដាហ៍ផងដែរ មុនពេលផ្គូផ្គង ទើបលោកយល់សមាសភាពរបស់កីឡាករកម្ពុជាមួយនេះ គ្រប់គ្រាន់សម្រាប់ឱ្យប៉ុស្តិ៍លេខ៥ដាក់ឱ្យប្រកួតជាលក្ខណៈអន្តរជាតិ នៅថ្ងៃសៅរ៍នេះបាន។ លោកថា កីឡាករកម្ពុជា និងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ មួយគូនេះ មានការចាប់អារម្មណ៍ភាគច្រើនថានឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករ ជា សំនៀង មិនសូវមានទម្លាប់ឡើងវ៉ៃលាក់ដៃស្រាប់ទៅហើយ។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាង ជា សំនៀង និងកីឡាករថៃ Sensak Sorakchai គឺលោកជឿជាក់ ដោយសារកីឡាករថៃលោកស្គាល់ថ្វីដៃច្បាស់ ហើយកីឡាករកម្ពុជា ក៏ល្អស្ថិតក្នុងទំនុកចិត្តលោកតាំងពីមុនផ្គូផ្គង ។ បើទោះជាកីឡាករកម្ពុជាត្រូវប្រឈមនឹងកីឡាករថៃដែលជាកីឡាករល្អ ក៏លោកនៅតែប្រកាសថា ជា សំនៀង មានសមត្ថភាពគ្រប់គ្រាន់ក្នុងការតតាំង និងមានសង្ឃឹមឈ្នះច្រើន ។ ជំនួបរវាងពួកគេលោកនៅតែថាមិនមែនជារឿងចៃដន្យ និងមិនមែនជារឿងធម្មតា ដោយសារមានការព្រាងទុកពីសំណាក់រូបលោកដែលជាអ្នកផ្គូផ្គងនៅប៉ុស្តិ៍លេខ៥ និងការរៀបចំទុកពីសំណាក់អ្នកដឹកនាំកីឡាករថៃមកតែម្ដង ។
លោកថាមួយគូនេះ អ្នកណាឈ្នះក្រៅពីទទួលបានទឹកប្រាក់ច្រើនជាង ក៏ទទួលបានទំនុកចិត្តពីអ្នកគាំទ្រកាន់តែខ្លាំងផងដែរ ។ ផ្ទុយទៅវិញ បើចាញ់ការប្រកួតហើយជាកីឡាករកម្ពុជាទៅទៀត គឺមិនត្រឹមតែអាម៉ាស់ប៉ុណ្ណោះទេក៏នឹងមានការរិះគន់ធ្ងន់ធ្ងរនៅក្នុងស្រទាប់អ្នកចូលចិត្តកីឡា ព្រោះតែថាប្រកួតលែងកើត ឬធ្លាក់ដៃ។ យ៉ាងណាមិញ លោកថា កីឡាករកម្ពុជាដ្បិតថារូបលោក និងអ្នកគាំទ្រទុកចិត្តពីសមត្ថភាពយ៉ាងហ្នឹង តែបើគេប្រកួតមិនល្អ ឬមិនអស់ពីសមត្ថភាព ក៏ពិតជារងការរិះគន់មិនតិចដែរ។
លោកថា ជំនួបរបស់ពួកគេត្រូវបានដាក់យ៉ាងពិសេសសម្រាប់ថ្ងៃសៅរ៍សប្ដាហ៍នេះ តែក៏ទាមទារឱ្យប្រឹងប្រែងណាស់ដែរ គឺមិនអាចសំអាងត្រឹមថាជាកីឡាករល្បីស្រាប់ មានការគាំទ្រស្រាប់ ហើយក៏ខ្វះការប្រឹងប្រឹងនោះទេ ។ លោកនៅតែចាត់ទុកថា ជា សំនៀង នៅល្អ និងមានការគាំទ្រនៅលើសង្វៀនប្រដាល់អន្តរជាតិ ទើបលោកជឿលើសមត្ថភាពខាងពូកែគេច និងពូកែវាយសន្ធាប់របស់គេហើយឈានដល់ការផ្គូផ្គងឱ្យប៉ះ Sensak Sorakchai ក្នុងសប្ដាហ៍នេះ។
សម្រាប់ការប្រកួតជាលក្ខណៈជម្រុះជើងឯកវគ្គថ្មីនៅសប្ដាហ៍ទី៤នេះវិញ លោកថានឹងមានវត្តមានសុទ្ធសឹងតែជាកីឡាករល្អៗនៅក្នុងពិភពប្រដាល់តែម្ដងប៉ះគ្នា ដោយសារក្នុងចំណោមសមាសភាពថ្មីទាំង៣២នាក់ គឺលោកបានដាក់ចម្រុះកីឡាករជើងចាស់ និងកីឡាករល្អៗដែលធានានឹងទាក់ទាញមិនចាញ់ការប្រកួតអន្តរជាតិដែលបានសម្រិតសម្រាំងឡើយ ។ លោក សេង កដិកា បញ្ជាក់ថា ការប្រកួតលើកនេះ ក៏មិនខុសពីរូបមន្តដែលធ្លាប់បានធ្វើនោះទេ គឺអ្នកឈ្នះបានឡើងវគ្គបន្ត ហើយសម្រាប់អ្នកចាញ់គឺធ្លាក់ហាលអាវ ។
លោកអះអាងថា ការប្រកួតរបស់លោក គឺមិនមានអ្នកឈ្នះក្នុងវគ្គណាមួយមិនឈ្នះដោយការប្រឹងប្រែងនោះទេ ដោយលោកបញ្ជាក់ថា អ្នកបានឡើងអង្គុយកៅអី៤នាក់បើកឆាកក្នុងវគ្គ១៦នាក់កាលពី៤សប្ដាហ៍កន្លងទៅ បានឡើងទាំងវេទនានោះផង។ លោកថា ការប្រកួតចាញ់ធ្លាក់ៗសុទ្ធតែទាមទារឱ្យកីឡាករម្នាក់ៗត្រៀមខ្លួនខុសពីការប្រកួតតាមរបៀបសន្សំពិន្ទុ ដោយសារតែអ្នកមិនខំប្រឹងប្រែង គឺដឹងតែធ្លាក់ហើយបាត់ឱកាស ដែលតម្រូវឱ្យអ្នកមានមុខឡើងប្រកួតត្រូវតែប្រកួតប្ដូរ មិនខ្វល់ពីគ្រោះថ្នាក់ និងលាក់ថ្វីដៃ ពោលគឺធ្វើយ៉ាងម៉េចឱ្យតែឈ្នះ ៕
ចែករំលែកព័តមាននេះ