ខេត្តកំពង់ឆ្នាំង ៖ យោងតាមសំណូមពរដ៏ទទូចរបស់អាជីវករលក់ដូរក្នុងផ្សារលើក្នុងសង្កាត់ផ្សារឆ្នាំង ក្រុងកំពង់ឆ្នាំង ដែលបានរាយការណ៍ជូនកន្លងមក នៅព្រឹកថ្ងៃទី២២ ខែកុម្ភៈ ឆ្នាំ២០១៨ លោក បេ សារុំ អភិរងបាលក្រុងកំពង់ឆ្នាំង ជាប្រធានក្រុមការងារសាលាក្រុងកំពង់ឆ្នាំង បានដឹកនាំសមត្ថកិច្ចចម្រុះ រួមមាន មន្ត្រីបរិស្ថានខេត្ត មន្ត្រីមន្ទីរពាណិជ្ជកម្មខេត្ត សមត្ថកិច្ចនគរបាលក្រុង និងគណៈកម្មការផ្សារលើ តាមបញ្ជាររបស់ឯកឧត្តមអភិបាលខេត្តកំពង់ឆ្នាំង ដើម្បីត្រួតពិនិត្យ និងដោះស្រាយទៅលើម៉ាស៊ីនអ៊ុត ក្រណាត់ធំៗ២គ្រឿង ដែលកំពុងធ្វើអាជីវកម្មអ៊ុតក្រណាត់កាត់សម្លៀកបំពាក់ បញ្ចេញនូវជាតិពុល និងចំហាយក្តៅ ធ្វើឲ្យប៉ះពាល់ដល់សុខភាពអាជីវករជុំវិញខ្លួន និងភ្ញៀវដែលចូលទិញទំនិញនៅក្នុង ផ្សារលើផងដែរ។
បងប្អូនអាជីវករក្នុងផ្សារលើដែលរងផលប៉ះពាល់ក្នុងរឿងនេះបានអោយដឹងថា៖ រយៈពេលជិត១ឆ្នាំមកហើយដែលអាជីវករ២នាក់បានដាក់ម៉ាស៊ីនអ៊ុតក្រណាត់ប្រភេទធំៗ២គ្រឿង អ៊ុតក្រណាត់ក្នុងតូបកណ្តាលផ្សារលើដោយពុំបានធ្វើឃ្លប់បិទបាំង និងបានបញ្ចេញក្លិនឈ្ងៀមពីក្រណាត់ ព្រុយក្រណាត់ ដែលមានជាតិពុល និងចំហាយក្តៅពីម៉ាស៊ីន ធ្វើឲ្យប៉ះពាល់ដល់សុខភាពរបស់ពួកគាត់ ជារៀងរាល់ថ្ងៃ គឺធ្វើឲ្យពួកគាត់ស្ងួតបំពង់ក ឈឺក្បាល និងវិលមុខរាល់ថ្ងៃ។ ហេតុនេះហើយទើបពួកគាត់ បានសំណូមពរដល់អាជ្ញាធរក្រុងកំពង់ឆ្នាំង និងមន្ត្រីជំនាញចុះមកត្រួតពិនិត្យ និងទប់ស្កាត់ផលប៉ះពាល់នេះ។ ដោយឡែកមន្ត្រីមន្ទីរបរិស្ថានខេត្តបានឲ្យដឹងថា៖ ក្រោយពីបានត្រួតពិនិត្យកន្លងមកឃើញថា ពេលម្ចាស់បើកម៉ាស៊ីនឲ្យក្តៅ១៣០ដឺក្រេ ហើយដាក់ក្រណាត់អ៊ុតមក ម៉ាស៊ីនអ៊ុតក្រណាត់ធុនធំទាំង២គ្រឿងនោះ ពិតជាបានបញ្ចេញក្លិនមិនល្អ មានជាតិគីមីម្យ៉ាងដែលគេដាក់រក្សាក្រណាត់កុំឲ្យខូច និងព្រុយក្រណាត់ បានបញ្ចេញក្លិន និងចំហាយក្តៅ ធំក្លិនមិនល្អនេះធ្វើប៉ះពាល់ដល់សុខភាពទាំងម្ចាស់ម៉ាស៊ីនអ៊ុតក្រណាត់ ទាំងអាជីវករនៅក្នុងផ្សារ និងភ្ញៀវចូលទំនិញផងដែរ។
ទាក់ទងនឹងបញ្ហានេះ លោក បេ សារុំ ប្រធានក្រុមករងារ បានឲ្យដឹងថា៖ ក្រោយពីធ្វើការសម្របសម្រួលភាគីទាំងសងខាងនៅព្រឹកថ្ងៃទី២២ ខែកុម្ភៈ នេះមក គឺម្ចាស់ម៉ាស៊ីនអ៊ុតក្រណាត់ និងអាជីវករដែលនៅជិតខាងនៅក្នុងផ្សារលើ បានឯកភាពគ្នាឲ្យម្ចាស់ម៉ាស៊ីអ៊ុតក្រណាត់ឈ្មោះ ជា សារិ ផ្លាស់ប្តូររំកិលទីតាំងម៉ាស៊ីនទៅដាក់ចំកណ្តាលតូបវិញ និងតម្រូវឲ្យធ្វើឃ្លប់គ្របលើម៉ាស៊ីនឲ្យជិត និងធ្វើបំពង់បង្ហុយទៅ ដើម្បីកុំឲ្យជះក្លិនប៉ះពាល់អាជីវករជិតខាង គឺកំណត់ធ្វើឲ្យរួចរាល់រាល់នៅថ្ងៃទី៩ ខែមីនា ឆ្នាំ២០១៨ គឺមានរយៈពេល១៥ថ្ងៃឲ្យហើយ។
លោក បេ សារុំ បានបញ្ជាក់ទៀតថា៖ ក្រោយពីម្ចាស់ម៉ាស៊ីនអ៊ុតក្រណាត់ធ្វើបានតាមការសម្របសម្រួលនេះហើយ ប្រសិនបើនៅតែមានក្លិនមិនល្អប៉ះពាល់អាជីវករនៅជុំវិញទៀតនោះ អាជីវករក្នុងផ្សារលើត្រូវរាយការណ៍ជូនអាជ្ញាធរក្រុង ដើម្បីចាត់វិធានការបន្ត គឺត្រូវហៅជំនាញពាក់ពន្ធ័មកត្រួតពិនិត្យ និងសិក្សាជាក់ស្តែងពីផលប៉ះពាល់ ដើម្បីរាយការណ៍ដាក់ជូនលោកអភិបាលក្រុង និងលោកអភិបាលខេត្តពិនិត្យសម្រេចចុងក្រោយ តើត្រូវឲ្យម្ចាស់ម៉ាស៊ីនផ្លាស់ប្តូរទីតាំងថ្មីដាក់ម៉ាស៊ីន ឬត្រូវកែលំម្អការដាក់ម៉ាស៊ីនអ៊ុតក្រណាត់នេះបែបណាទៀត។ ចំពោះការដោះស្រាយខាងលើនេះ ភាគីទាំងសងខាងបានទទួលយក និងបានធ្វើកំណត់ហេតុចុះហត្ថលេខាអនុវត្តលើកិច្ចព្រមព្រៀងខាងលើ នេះ ហើយវិវាទនេះក៏ត្រូវបានបញ្ចប់៕
ចែករំលែកព័តមាននេះ