ខេត្តប៉ៃលិន ៖ រហូតមកដល់បច្ចុប្បន្ន គេសង្កេតឃើញប្រជាពលរដ្ឋបាននាំគ្នាកែច្នៃមាត់ស្ទឹងបរយ៉ាខា ដោយឈូសឆាយ ហើយសង់រោង និងខ្យុសលក់ដូរឱ្យភ្ញៀវទេសចរ និងអ្នកដែលធ្វើដំណើរកម្សាន្ត ជាពិសេសពេលចុងសប្តាហ៍ និងថ្ងៃបុណ្យទានផ្សេងៗ ។ ម្យ៉ាងវិញទៀត នៅតាមមាត់ស្ទឹងមានទេសភាពល្អស្រស់ ដោយមានទឹកហូររេញៗ និងមានឮសម្លេងសត្វរៃកណ្ដឹងយំ ធ្វើឱ្យម្នាក់ៗចូលចិត្តទៅអង្គុយលេងតាមរោងក្បែរមាត់ទឹក ។
ប្រភពព័ត៌មានពីស្ត្រីម្នាក់ឈ្មោះ យ៉ាន ជាអាជីវករលក់គ្រឿងហូបនៅត្រង់ចំណុចក្បែរស្ពានតារៀប ក្នុងភូមិស្ទឹងកាច់ ឃុំស្ទឹងកាច់ ស្រុកសាលាក្រៅ បានឱ្យដឹងថា គាត់ទើបតែចាប់ផ្តើមសង់រោង និងខ្យុសលក់ដូរគ្រឿងហូបដូចជា បុកល្ហុង ប្រហិតចៀន ទឹកក្រូចកំប៉ុង និងស្រាបៀរជាដើម ។
គាត់បន្តទៀតថា មូលហេតុដែលគាត់លក់ដូរត្រង់ក្បែរកន្លែងមាត់ស្ទឹងនេះ ដោយសារឃើញមានគេលក់ដូរដាច់ ហើយម្យ៉ាងវិញទៀត មានភ្ញៀវចូលចិត្តនាំគ្នាទៅអង្គុយហូបអាហារ និងអង្គុយកម្សាន្តលេងក្បែរមាត់ទឹក ។ ការសាងសង់រោងលក់ដូរនេះ គឺធ្វើនៅជាប់នឹងកន្ទុយដីរបស់ខ្លួនក្បែរមាត់ស្ទឹង ដោយមិនមានការប៉ះពាល់អ្វីដល់បរិស្ថាននោះទេ ។ ក្នុង១ថ្ងៃៗ បើប៉ះចំចុងសប្តាហ៍ ឬថ្ងៃបុណ្យ ដូចជាចូលឆ្នាំចិន ចូលឆ្នាំខ្មែរ និងរដូវភ្ជុំបិណ្យ មានភ្ញៀវទេសចរចូលទៅអង្គុយលេងច្រើន ដោយអ្នកខ្លះនាំក្រុមគ្រួសារប្រពន្ធកូនទៅអង្គុយលំហែកម្សាន្ត រួចដល់ពេលល្ងាចទើបត្រលប់ទៅផ្ទះវិញ ។
ប្រភពព័ត៌មានពីស្ត្រីម្នាក់ ឈ្មោះ ស្រីណុច បានឱ្យដឹងដែរថា ការលក់ដូរនៅក្បែរមាត់ស្ទឹងនេះ កំពុងតែពេញនិយម ដោយអ្នកមានកន្ទុយដីនៅជាប់នឹងមាត់ស្ទឹង ចាប់ផ្តើមនាំគ្នាទៅធ្វើខ្យុសដាក់លក់ដូរជាហូរហែ ដោយរហូតមកដល់ពេលនេះ មានគ្មានច្រើនគួរឱ្យកត់សម្គាល់ ។ លើសពីនេះ បន្ទាប់ពីគេនាំគ្នាហូបអាហាររួច ក៏នាំប្រពន្ធកូនហែលទឹកស្ទឹងលេង និងជួនកាលទៀត គេថតរូបប្រពន្ធកូនបង្ហោះហ្វេសប៊ុកលេងសប្បាយផងដែរ ។
ចំណែកភ្ញៀវទេសចរមួយចំនួនបានឱ្យដឹងថា រហូតមកដល់បច្ចុប្បន្ននេះ ពួកគាត់ចូលចិត្តដើរលេងកម្សាន្តលំហែកាយ នៅតាមរមណីយដ្ឋាននានា ជាពិសេសមាត់ស្ទឹង ព្រោះត្រជាក់ ហើយមានខ្យល់អាកាសបរិសុទ្ធ បំបាត់ភាពនឿយហត់ និងធ្វើឱ្យអារម្មណ៍រីករាយស្រស់ថ្លា ។ ម្យ៉ាងទៀត ការដើរលេងកំសាន្តធ្វើឱ្យសតិអារម្មណ៍នឹងនរ នឹកឃើញគំនិតថ្មីៗថែមទៀត ដើម្បីបន្តការងារនៅថ្ងៃខាងមុខ ។
សូមបញ្ជាក់ថា រហូតមកដល់សព្វថ្ងៃនេះ នៅតាមដឹងស្ទឹងបរយ៉ាខា មានប្រជាពលរដ្ឋនាំគ្នា សាងសង់ខ្យុសជាហូរហែ តាំងពីដើមស្ទឹងរហូតដល់ចុង ក៏មានការពង្រីកបន្ថែមទៀត ដោយម្នាក់ៗចាប់ពី២០ទៅ៣០ខ្យុសឯណោះ ហើយការលក់ដូរក៏ដាច់គួរឱ្យកត់សម្គាល់ ៕
ចែករំលែកព័តមាននេះ