ខេត្តស្វាយរៀង ៖ មនុស្សប្រុសស្រី២៦នាក់ បានរងរបួសធ្ងន់ស្រាលដួលរណូករណែលពេញផ្លូវ ខណៈដែលជួបករណីគ្រោះថ្នាក់ចរាចរណ៍រវាងរថយន្តដឹកកម្មករ-កម្មការិនីរោងចក្រវ៉ាជែង ខ្វះការប្រុងប្រយ័ត្នបុកអ្នកជិះម៉ូតូ ពីក្រោយយ៉ាងពេញទំហឹង បង្កឲ្យមានការភ្ញាក់ផ្អើលដល់អ្នកភូមិក៏ដូចជាអ្នកធ្វើដំណើរចោមរោមមើលយ៉ាងច្រើនកុះកុញ ។ ករណីនេះកើតឡើងកាលពីវេលាម៉ោង៩និង៣០នាទី ព្រឹកថ្ងៃទី២០ ខែកុម្ភៈ ឆ្នាំ ២០១៨ នៅលើផ្លូវលេខ១ ក្នុងភូមិថ្មី សង្កាត់ព្រៃច្រកម្រេ្ទស ក្រុងបាវិត ខេត្តស្វាយរៀង ។
បើតាមសមត្ថកិច្ចនគរបាលក្រុងបាវិតបានឲ្យដឹងថា មានរថយន្ត០១គ្រឿង ពណ៌ស ពាក់ស្លាកលេខកំពង់ចាម៣A-៦៥១៣ បើកបរដោយឈ្មោះ ចាប វុទ្ធី ភេទប្រុស អាយុ៣៦ឆ្នាំ ជនជាតិខ្មែរ មុខរបរបើករថយន្តដឹកកម្មករ មានទីលំនៅភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង បានដឹកកម្មករ-កម្មការិនីរោងចក្រប្រុសស្រី២២នាក់ ដោយធ្វើដំណើរពីលិចទៅកើត លើកំណាត់ផ្លូវជាតិលេខ១ លុះបើកមកដល់ចំណុចកើតហេតុខាងលើ ក៏បានវ៉ាជែង ហើយស្រាប់តែទៅបុកម៉ូតូ C125 ពីក្រោយ ដែលបើកដោយឈ្មោះ កែវ រីគោ ភេទប្រុស អាយុ៥១ឆ្នាំ ជនជាតិខ្មែរ មុខរបរធ្វើស្រែ មានទីលំនៅភូមិអង្គសាលា សង្កាត់ព្រៃអង្គុញ ក្រុងបាវិត និងអ្នករួមដំណើរចំនួន០៣នាក់ មានឈ្មោះ ណាក់ គោរីណា ភេទប្រុស អាយុ០៩ឆ្នាំ ជនជាតិខ្មែរមុខរបរសិស្សឈ្មោះ ណាក់ គោអាលី សាប៉ែត ភេទប្រុស អាយុ០៦ឆ្នាំ ជនជាតិខ្មែរ មុខរបរសិស្ស និងឈ្មោះ គោ តាម៉ា ភេទស្រី អាយុ០៦ឆ្នាំ ជនជាតិខ្មែរ មុខរបរសិស្ស បណ្ដាលឲ្យរងរបួសធ្ងន់ស្រាល ។
ក្រោយកើតហេតុសមត្ថកិច្ចមូលដ្ឋានបានមកដល់ធ្វើអន្តរាគមន៍និងយកជនរងគ្រោះទាំង៤នាក់ដែលជិះម៉ូតូ ទៅព្យាបាលនៅមន្ទីពេទ្យ ប៉ុន្តែដោយក្មេងៗ រងរបួសធ្ងន់ទាំង០៣នាក់ត្រូវបានក្រុមគ្រួសារបញ្ចួនបន្តទៅព្យាបាលនៅប្រទេសវៀតណាម ។ ចំណែកអ្នកបើករថយន្តក្រោយកើតហេតុដោយមើលឃើញសភាពការណ៍មិនស្រួលក៏រត់គេចខ្លួនភ្លាមៗ បន្សល់កម្មករ-កម្មការិនីរងរបួសស្រាល២២នាក់នៅនឹងកន្លែង ។
ចំពោះវត្ថុតាងទាំង០២គ្រឿង ត្រូវបានសមត្ថកិច្ចនគរបាលអូសយកមករក្សាទុកនៅអធិការដ្ឋាននគរបាលក្រុងបាវិត ដើម្បីបំពេញសុំណុំរឿងចាត់ការតាមច្បាប់ ។ សមត្ថកិច្ចបានបញ្ជាក់ថា មូលហេតុដោយ អ្នកបើកបររថយន្តដឹកកម្មករវ៉ាជែងខ្វះការប្រុងប្រយ័ត្នទើបមានករណីគួរឲ្យរន្ធត់នេះកើតឡើង ៕
ចែករំលែកព័តមាននេះ