ខេត្តបន្ទាយមានជ័យ ៖ មនុស្ស២នាក់រងរបួសធ្ងន់ ដោយសាររថយន្តស៊េរីទំនើបបុកក្នុងដំណើរបញ្ច្រាសទិសគ្នា និងបន្តទៅបុកបង្គោលភ្លើងព្រមទាំងសំយ៉ាបផ្ទះហាងលក់គុយទាវរបស់គ្រួសារមួយជានាយករងសាលា ធ្វើឲ្យម្នាក់ៗព្រលឹងហោះចុងសក់គ្រប់គ្នា ។ ហេតុការខាងលើកើតឡើងកាលពីវេលាម៉ោងជាង០១ទាបភ្លឺឈានចូលព្រឹកថ្ងៃទី២១ខែកុម្ភៈនេះ នៅចំណុចផ្លូវបំបែក ក្នុងភូមិក្បាលស្ពាន២…
ខេត្តបន្ទាយមានជ័យ ៖ មនុស្ស២នាក់រងរបួសធ្ងន់ ដោយសាររថយន្តស៊េរីទំនើបបុកក្នុងដំណើរបញ្ច្រាសទិសគ្នា និងបន្តទៅបុកបង្គោលភ្លើងព្រមទាំងសំយ៉ាបផ្ទះហាងលក់គុយទាវរបស់គ្រួសារមួយជានាយករងសាលា ធ្វើឲ្យម្នាក់ៗព្រលឹងហោះចុងសក់គ្រប់គ្នា ។ ហេតុការខាងលើកើតឡើងកាលពីវេលាម៉ោងជាង០១ទាបភ្លឺឈានចូលព្រឹកថ្ងៃទី២១ខែកុម្ភៈនេះ នៅចំណុចផ្លូវបំបែក ក្នុងភូមិក្បាលស្ពាន២ សង្កាត់និងក្រុងប៉ោយប៉ែត ។
ជនរងគ្រោះម្នាក់ឈ្មោះ ឡុច វត្តី ភេទស្រី អាយុ១៩ឆ្នាំ ជាបុគ្គលិកកាស៊ីណូ និងម្នាក់ឈ្មោះឆាយ ស្រីស្តើង ហៅសោ ភេទស្រី អាយុ២២ឆ្នាំ ជាកម្មករលក់បាយឲ្យជនជាតិឥណ្ឌូនេស៊ី ក្នុងប្លុកកាស៊ីណូ ហើយអ្នកទាំង២ ស្នាក់នៅក្នុងភូមិកើតហេតុខាងលើ ។ ម្នាក់ឈ្មោះឡុច វត្តីរងរបួសបាក់ប្រអប់ជើងខាងឆ្វេង និងដងខ្លួនដោយអន្លើៗ ។ ដោយឡែកឈ្មោះ ឆាយស្រីស្តើងហៅសោ រងរបួសធ្ងន់ ចំណុចក្បាល និងដងខ្លួនដោយអន្លើៗដែរ ។
ប្រភពពីកន្លែងកើតហេតុប្រាប់ថា មុនហេតុការណ៍កើតឡើងជនរងគ្រោះទាំង២ជិៈម៉ូតូកូនទា ពាក់ស្លាកលេខកំពង់ចាម២Q-២៦៦៧ បើកដោយឈ្មោះ ឡុច វត្តី ពីត្បូងទៅជើង លុះដល់ចំណុចកើតហេតុមានរថយន្ត ពណ៌ស គ្មានស្លាកលេខ បើកបរពីទិសខាងជើង សង្ស័យអ្នកបើកបរធ្លាក់ភ្នែកខ្លាំងហើយទើបបោះពួយលឿនរួចរ៉េចង្កូតទៅបុកម៉ូតូជនរងគ្រោះបណ្តាលឲ្យរងរបួសធ្ងន់ ។
ប្រភពថា ក្រោយបុកម៉ូតូរថយន្តពណ៌ស គ្មានស្លាកលេខក៏ជ្រុលទៅបុកបង្គោលភ្លើង ហើយជ្រុលទៅបុកសំយ៉ាបផ្ទះ និងជាហាងលក់គុយទាវរបស់គ្រួសារជានាយករងសាលាធ្វើឲ្យគ្រប់គ្នាព្រលឹងចុងសក់តែម្តង ។ ក្រោយកើតហេតុប្រភពថា អ្នកបើកបររថយន្ត និងអ្នករួមដំណើរសរុប៣នាក់ ចតរថយន្តចោលនាំគ្នាគេចខ្លួនបាត់ ។
ចំណែកជនរងគ្រោះទាំង២ដំបូងគេ បញ្ចូនទៅមន្ទីរពេទ្យបង្អែកក្រុងប៉ោយប៉ែត ដោយសភាពធ្ងន់ធ្ងរក្រុមគ្រូពេទ្យក៏បញ្ជូនបន្តទៅមន្ទីរពេទ្យមិត្តភាពកម្ពុជាជប៉ុនមង្គលបូរី ។ ចំណែកយានយន្តពាក់ព័ន្ធត្រូវបានសមត្ថកិច្ចជំនាញយកទៅរក្សាទុកនៅអធិការនគរបាលក្រុង ដើម្បីបន្តនីតិវិធី ។
ករណីគ្រោះថ្នាក់ចរាចរណ៍ខាងលើ ថ្វីត្បិតសមត្ថកិច្ចមិនទាន់បញ្ជាក់ពីមូលហេតុ ប៉ុន្តែប្រភពនានាជាច្រើនដាក់ការសង្ស័យថា អ្នកបើកបរអាចស្រវឹងខ្លាំង ព្រោះសូម្បីតែក្នុងរថយន្តក៏មានកំអួតដែរ ។ សមត្ថកិច្ចបញ្ជាក់តាមទូរស័ព្ទថា អ្នកបើកបរជាខ្មែរមិនមែនជនជាតិចិនទេហើយដឹងតម្រុយខ្លះៗដែរ និងកំពុងតាមរក ៕
ចែករំលែកព័តមាននេះ