រាជធានីភ្នំពេញ ៖ សាកសពទារកម្នាក់ម្នាក់ត្រូវបានកម្មករប្រទះឃើញនៅក្នុងបន្ទប់ទឹកក្នុងរោងចក្រ យីហោ «ស្កាយហាយ (ខេមបូឌា) ខូអិលធីឌី» ដែលមានទីតាំងស្ថិតនៅក្នុងភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។ និងបានបង្កឲ្យមានការភ្ញាក់ផ្អើលលដល់ កម្លាំងនគរបាលមូលដ្ឋាន និងនគរបាលខណ្ឌពោធិ៍សែនជ័យ ចុះទៅកាន់ទីនោះកាលពីវេលាម៉ោងម៉ោង ជាង២រសៀល ថ្ងៃទី២០ ខែកុម្ភៈ ឆ្នាំ២០១៨។ ប៉ុន្តែមិនទាន់បានដឹងថា ម្ដាយទារកនេះជានរណាទេ ហើយគេសង្ស័យថា អាចជាអ្នកដែលភ្លើតភ្លើនរហូតជ្រុលជ្រួសខ្លួនមានផ្ទៃពោះ ហើយដៃគូស្នេហ៍ មិនទទួលខុសត្រូវដោះដៃ ទើបនៅពេលធ្វើការធ្ងន់ហួសកម្លាំងរហូតរលូតកូនបែបនេះ នាងមិនហ៊ាន ចេញមុខទទួលកាពិតព្រោះខ្លាចខ្មាស់គេ។ តាមប្រភពព័ត៌មានពីកម្មករបានឲ្យដឹងថា នៅមុនពេលមានការភ្ញាក់ផ្អើល មានអ្នកចូលទៅបត់ជើងនៅក្នុងបន្ទប់ទឹកនៅក្នុងរោងចក្រនោះ លុះពេលទៅដល់ស្រាប់តែបានប្រទះឃើញសាកសពទារកត្រូវបានគេរុំដោយក្រណាត់នៅក្នុងបន្ទប់ទឹកខាងលើ។
ពេលនោះអ្នកដែលប្រទះឃើញបាននាំគ្នារត់ទៅប្រាប់មិត្តភក្ថិរួមការងារ បង្កឲ្យមានការភ្ញាក់ផ្អើល ដល់រដ្ឋបាលរោងចក្ររាយការណ៍ឲ្យកម្លាំងនគរបាលចុះទៅពិនិត្យកោសល្យវិច្ច័យ។ ប្រភពដដែលបានបន្ត ឲ្យដឹងទៀតថា ទារកនេះមិនមែនកើតដោយការឈឺពោះគ្រប់ខែនោះឡើយ ប្រហែលទើបតែបាន៦ខែ ប៉ុណ្ណោះ ហើយដោយសារតែស្ត្រីជាម្ដាយធ្វើការធ្ងន់ហួសកម្លាំងពេក។ ទើបបណ្ដាលឲ្យរលូត និងស្លាប់តែម្ដង ចំណែកស្ត្រីជាម្ដាយក៏ប្រហែលជាកម្មការិនីដែលបម្រើការងារនៅក្នុងរោងចក្រនេះដែរ ប៉ុន្តែក្រោយពេលកើតហេតុមិនបានចេញមុខទេ ព្រោះខ្លាចខ្មាស់គេ។ នគរបាលបាននិយាយថា តាមការពិនិត្យឃើញថា ទារកនោះស្លាប់ដោយការរលូត និងត្រូវបានរុំដោយក្រណាត់រួចយកទៅទុកចោល នៅក្នុងបន្ទប់ទឹកនោះ។
ប៉ុន្តែនៅក្នុងខណៈនោះមិនទាន់បានស្គាល់អត្តសញ្ញាណស្ត្រីជាម្ដាយនៅឡើយទេ ពុំដឹងថាស្ត្រីជាម្ដាយរបស់ទារកនេះជានរណាឡើយ តែតាមការសន្និដ្ឋានគឺជាកម្មការិនី ដែលបម្រើការងារ នៅក្នុងរោងចក្រនោះ មិនមែនអ្នកផ្សេងខាងក្រៅណាឡើយ។ នគរបាលបានបន្តទៀតថា បន្ទាប់មកនគរបាលបានធ្វើកំណត់ហេតុ និងកសាងសំណុំរឿងព្រមទាំងបានប្រគល់សាកសពទារក នេះទៅឲ្យខាងរដ្ឋបាលរោងចក្រចាត់ចែងបញ្ចុះ ឬបូជា។ ហើយខាងរោងចក្រក៏កំពុងធ្វើការស្រាវជ្រាវ រកស្ត្រីជាម្ដាយ របស់ទារកនោះហើយដែរ តាមរយៈការធ្វើស្ថិតិកម្មការិនីរោងចក្រដែលមានផ្ទៃពោះ ទាំងអស់ហើយ និងអាចបានដឹងថាជានរណានៅពេលក្រោយមិនខានឡើយ។ ទាក់ទិនទៅនឹងហេតុការណ៍មួយនេះ កោះសន្តិភាព មិនអាចស្វែងរកការផ្ដល់ព័ត៌មានពីខាងរដ្ឋបាល រោងចក្របានទេ៕
ចែករំលែកព័តមាននេះ