ក្រុមម្ចាស់ផ្ទះតោខៀវ Chelsea បានសំលៀងចង្កូមរួចជាស្រេចត្រៀមស្វាគមន៍សត្រូវចាស់ក្រុមអ្នកមានបុណ្យ Barcelona មកពីអេស្ប៉ាញនៅរាត្រីនេះ ក្នុងការប្រកួតជើងទី១ ពានរង្វាន់យូហ្វាឆេមពានលីគ ។ ក្រុម Chelsea…
ក្រុមម្ចាស់ផ្ទះតោខៀវ Chelsea បានសំលៀងចង្កូមរួចជាស្រេចត្រៀមស្វាគមន៍សត្រូវចាស់ក្រុមអ្នកមានបុណ្យ Barcelona មកពីអេស្ប៉ាញនៅរាត្រីនេះ ក្នុងការប្រកួតជើងទី១ ពានរង្វាន់យូហ្វាឆេមពានលីគ ។ ក្រុម Chelsea ដែលតែងតែធ្វើឱ្យ Barcelona យំលែងចេញច្រើនលើកច្រើនសារក្នុងជំនួបប្រកួតនាពេលកន្លងមក កំពុងមានក្តីសង្ឃឹមខ្ពស់ថានឹងអាចផ្តល់ភាពជូរជត់ម្តងទៀត តាមគន្លងប្រវត្តិសាស្ត្រចាស់ ។ យ៉ាងណាមិញ ចំពោះការប្រកួតក្នុងលីគរបស់ខ្លួន ក្រុមតោខៀវហាក់អស់ឱកាសដណ្តើមពានប្រឺមីញេលីគ ស្របពេលបច្ចុប្បន្នកំពុងឈរនៅចំណាត់ថ្នាក់លេខ៤ ដាច់ឆ្ងាយពីក្រុមលេខ១ Man City រហូតដល់១៩ពិន្ទុ ។
ទន្ទឹមនឹងនេះ ដំណើរឈានមកដល់វគ្គ១៦ក្រុមចុងក្រោយនៅឆេមពានលីគ Chelsea ក៏ជួបបញ្ហាខ្លះផងដែរ និងបានត្រឹមឈរលេខ២ក្នុងពូលប៉ុណ្ណោះ ខណៈ Roma កាន់តំណែងកំពូលតារាង ។ ស្ថានភាពកូនក្រុមរបស់ម្ចាស់ផ្ទះនាពេលនេះ ហាក់កែប្រែច្រើនជាងមុន ស្របពេលដែល ខ្សែប្រយុទ្ធចំណូលថ្មី Giroud កំពុងធ្វើព្យុះភ្លៀងយ៉ាងខ្លាំងបន្ទាប់ពីផ្លាស់មកពីក្លិប Arsenal ។ ជំនួបយប់នេះ មិនមានកីឡាករសំខាន់រូបណាអវត្តមាននោះទេ ។
រីឯក្រុមភ្ញៀវ Barcelona ក្រោមការដឹកនាំគ្រូបង្វឹកថ្មី Ernesto Valverde បាននិងកំពុងបង្ហាញភាពខ្លាំងរបស់ខ្លួនឡើងវិញ ទាំងការប្រកួតនៅឆេមពានលីគ និងក្នុងលីគ ។ រដូវកាលនេះ ក្លិបអ្នកមានបុណ្យទើបតែចាញ់ម្តងប៉ុណ្ណោះពេលប្រកួតប៉ះ Espanyol នៅជើងទី១នៃពានរង្វាន់អេស្ប៉ាញខាប់ ។ ជោគជ័យជាបន្តបន្ទាប់ទាំងអម្បាលម៉ាន ធ្វើឱ្យពួកគេមានទំនុកចិត្តថានឹងអាចបំបែកស្រមោលឈឺចាប់ដែលតែងលងបន្លាចអស់ជាច្រើនឆ្នាំមកនេះ ។
ប្រវត្តិចុកចាប់របស់ Messi ពេលប៉ះក្លិប Chelsea បានធ្វើឱ្យខ្សែប្រយុទ្ធជំនាញជើងឆ្វេងរូបនេះ អន្ទះសារចង់សាងកេរ្ត៍ឈ្មោះឡើងវិញ ព្រោះតែការប្រកួតនាពេលកន្លងមកមិនអាចរកគ្រាប់បាល់បាន សូម្បីតែប៉េណាល់ទីក៏មិនចូល ។ ស្ថានភាពកូនក្រុមរបស់ Barcelona មិនមានកីឡាករសំខាន់រូបណារបួសនោះទេ ។
យ៉ាងណាមិញ Coutinho មិនអាចចូលលេងបានឡើយ ដោយហេតុថា Coutinho ធ្លាប់បានលេងឱ្យ Liverpool រួចហើយក្នុងការប្រកួតឆេមពានលីគនៅរដូវកាលនេះ ។ ម្យ៉ាងទៀត Dembele ទំនងមិនអាចចូលលេងបានទេ ព្រោះរបួសមិនទាន់ជាស្រួលបួល ។ សមរភូមិបៃតងរវាងក្លិបខ្លាំងទាំងពីរខាងលើ គេរំពឹងថាពួកគេនឹងអាចរកគ្រាប់បាល់បានរៀងខ្លួន ប៉ុន្តែអាចនឹងទទួលបានលទ្ធផលស្មើគ្នា បើទោះជាក្រុមម្ចាស់ផ្ទះមានប្រៀបលើទឹកដីក៏ដោយ ៕
ចែករំលែកព័តមាននេះ