ខេត្តរតនគិរី ៖ រមណីយដ្ឋាននានាក្នុងខេត្តរតនគិរីនាឱកាសបុណ្យចូលឆ្នាំប្រពៃណីជាតិចិន-វៀតណាម រយៈពេលបីថ្ងែចាប់ពីថ្ងៃព្រហស្បតិ៍.សុក្រ.សៅរ៍ ១កើត ២កើត.៣កើត ខែផល្គុន ឆ្នាំរកា នព្វសក័ ព.ស២៥៦១…
ខេត្តរតនគិរី ៖ រមណីយដ្ឋាននានាក្នុងខេត្តរតនគិរីនាឱកាសបុណ្យចូលឆ្នាំប្រពៃណីជាតិចិន-វៀតណាម រយៈពេលបីថ្ងែចាប់ពីថ្ងៃព្រហស្បតិ៍.សុក្រ.សៅរ៍ ១កើត ២កើត.៣កើត ខែផល្គុន ឆ្នាំរកា នព្វសក័ ព.ស២៥៦១ ត្រូវនឹងថ្ងៃទី១៥.១៦.១៧ ខែកុម្ភៈ គ.ស២០១៨។ មានភ្ញៀវទេសចរណ៍ជាតិ និងអន្តរជាតិ ក៏ដូចជាប្រជាពលរដ្ឋ ដែលអញ្ចើញមកកម្សាន្ដយ៉ាងច្រើនកុះករមានការកើនឡើងជាលំដាប់លើសឆ្នាំមុនៗ។ ដូចជានៅរមណីយដ្ឋាន អូរស៊ិនលែរ(ទឹកធ្លាក់ប្រាំពីរជាន់)ទឹកជ្រោះជួរតាតៃ ទឹកជ្រោះចារអុង ទឹកជ្រោះកាចាញ និងទឹកអូរកាទៀងជាដើម។ល។ ភ្ញៀវទេសចណ៍ជាតិ និងអន្តរជាតិនីមួយៗដែលមានដំណើរកម្សាន្តតាមរមណីយដ្ឋាននានាប្រកបដោយទឹមុខសប្បាយ រីករាយក្រៃលែងជាមួយនឹងទេសភាពធម្មជាតិដ៏ល្អត្រកាលតាមជ្រលងជ្រោះព្រៃភ្នំ លាយឡំនឹងសំឡេងបក្សារបក្សី យំទ្រហឹងអឺងកងរំពងព្រៃ គួបផ្សំមឹងសូរសំឡេងទឹកហូរធ្លាក់ពីលើភ្នំចុះមកក្រោមហាក់កំពុងតែអង្រួនបេះដូង ធ្វើឱ្យអារម្មណ៍ភ្ញៀវទេសចរណ៍ជាតិ និងអន្តរជាតិទាំងឡាយនោះរសាយនៃក្តីកង្វល់ទៅតាមវាយោ និងទឹកជ្រោះហូរនោះ អស់ដែរ។
ក្នុងដំណើរកម្សាន្តនោះដែរ ស្ទើរគ្រប់ភ្ញៀវជាតិ និងអន្តរជាតិក៏បានសម្តែងនូវការសាទរយ៉ាងក្រៃលែង ចំពោះរាជរដ្ឋាភិបាលដែលបាននាំមកនៅសុខសន្តិភាពស្ថិរភាពនយោបាយ សម្រួលដល់ដំណើរកម្សាន្តពួកគាត់ជាភ្ញៀវជាតិ និងអន្តរជាតិក៏ដូចជាជូនប្រទេសជាតិផងដែរ រួមទាំងមានការអភិវឌ្ឍន៍រីកចម្រើនលើគ្រប់វិស័យ ជាពិសេសប្រព័ន្ធ គមនាគមន៍ឆ្លងកាត់គ្រប់តំបន់ទេសចរណ៍នានា និងបានបង្កើតកម្មវិធីសប្បាយៗប្រចាំឆ្នាំជាច្រើនទៀតផង។ ដូចជាការសម្ដែងរបាំប្រជាប្រិយរបស់បងប្អូនជនជាតិដើមភាគតិច។ ការរៀបចំពិធីអបអរចូលឆ្នាំចិនវៀតណាម២០១៨នេះ ដែលបានបង្ហាញដល់ភ្ញៀវទេសចរណ៍ជាតិ អន្តរជាតិ ឱ្យគេបានដឹងកាន់តែច្បាស់ពីកម្ពុជាដែលជាប្រទេសដែលមាន សុខសន្តិភាព ស្ថិរភាព និងការអភិវឌ្ឍន៍យ៉ាងពិតប្រាកដ។ អាជីវករជនជាតិដើមភាគតិចលក់វត្ថុអនុស្សាវរីយ៍រួមមាន ក្រមាជនជាតិ កន្សែងជនជាតិ និងខោអាវ ដែលជាស្នាដៃពិតៗដែលបងប្អូនជនជាតិដើមភាគតិចយើងផលិតបាន។ អាជីវករជនជាតិដើមភាគតិចជាអ្នកលកវត្ថុអនុស្សាវរីយ៍នោះបានឱ្យដឹងថាការលក់ដូររយៈពេលបីថ្ងៃ ក្នុងអំឡុងបុណ្យ ចូលឆ្នាំចិនវៀតណាមនេះមានការលករបស់របវត្ថុអនុស្សាវរីយ៍ផ្សេងៗដាច់អស់បានច្រើនគ្រាន់បើដែរអាចបានជាង៣០.០០០០រៀល(សាមសិបម៉ឺនរៀល)ក្នុងមួយថ្ងៃ។
ភ្ញៀវទេសចរណ៍ជាតិមកពីខេត្តតាកែវ បានទម្លាយអំពីអារម្មណ៍ក្នុងដំណើរ កម្សាន្តនោះឱ្យដឹងថា ដំណើរកម្សាន្តរបស់ពួកគាត់ជាលក្ខណៈគ្រួសារ បន្ទាប់ពីចូលមកដល់ និងកម្សាន្តតាមរមណីយដ្ឋាន នានាក្នុងខេត្តខេត្តរតនគិរីនេះរួចមកគឺ ពិតជាមានអារម្មណ៍ថាសប្បាយរីករាយក្រៃលែងបំផុត ដោយបានឃើញទេសភាព ល្អៗ និងទាក់ទាញអារម្មណ៍ចង់គយគន់នឹងអាកាសធាតុត្រជាក់ ធ្វើឱ្យរសាយអារម្មណ៍អំពីការនឿយហត់ទាំងឡាយ អស់ចេញរាងកាយទៅតាមទេសភាពធម្មជាតិ។ ជាពិសេសតាមរមណីយដ្ឋានជាច្រើនយ៉ាងសម្បូរបែប មាននៅក្នុងខេត្តរតនគិរី និងទីដាច់ស្រយាល។ លោក វេន ចឹក គណៈកម្មាការរមណីយដ្ឋានបឹងយក្សឡោម បានឲ្យដឹងថា រយៈពេលបីថ្ងៃបុណ្យចូលឆ្នាំចិន វៀតណាម ឆ្នាំនេះ ភ្ញៀវទេសចរណ៍ជាតិ អន្តរជាតិ មានការកើនឡើង លើសឆ្នាំមុនហូតដល់១០ម៉ឺននាក់ បើប្រៀបធៀបឆ្នាំ២០១៧ ការកើនឡើងខុសពីការគ្រោងទុក ដោយសារសន្តិសុខ សណ្តាប់ធ្នាប់ល្អមានការចូលរួមការពារពីសមត្ថកិច្ច ចរាចរណ៍ជើងគោកកម្លាំងប្រជាការពារ សម្រួលចរាចរណ៍ និងសេវាកម្មរហ័សទាន់ចិត្ត បម្រើភ្ញៀវចូលទស្សនាកម្សាន្ត ទីកន្លែងអង្គុយប្រកបដោយផាសុខភាព អនាម័យល្អ។
លោកបន្តថា ការរៀបចំរមណីយដ្ឋានក្នុងឆ្នាំនេះមានសណ្តាប់ធ្នាប់ល្អគឺ មិនឲ្យអាជីវករលក់របស់ហូបចុក ក្បែរមាត់បឹង ឡើយ ដោយឲ្យពួកគាត់មកលក់នៅខាងលើទាំងអស់គ្នា។ លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានឱ្យដឹងថា ភ្ញៀវទេសចរណ៍មកកម្សាន្ដនៅក្នុងខេត្តរតនគិរីក្នុងឱកាសចូលឆ្នាំចិន វៀតណាម ឆ្នាំ២០១៨ នេះ មានចំនួន៩,៧៦៣ នាក់ ក្នុងនោះភ្ញៀវជាតិមានចំនួន៩,៥០៥នាក់ និងភ្ញៀវអន្តរជាតិមានចំនួន ២៥៨នាក់ មានការកើនឡើងសរុប៥៦.៣ភាគរយ ភ្ញៀវជាតិមានការកើនឡើង៥៧,២ ភាគរយ និងភ្ញៀវអន្តរជាតិកើនឡើង៣១,០ ភាគរយ បើប្រៀបធៀបទៅនឹងឆ្នាំ២០១៧កន្លងទៅ។ លោក ង៉ែត ពិទូ បានបន្ដថា ពាក់ព័ន្ធនឹងម្ហូបអាហារតាមរមណីយ ដ្ឋាន សណ្ឋាគារ ផ្ទះសំណាក់ លោកបានចាត់ឲ្យក្រុមការងាររបស់លោក ចុះអប់រំណែនាំអំពីអនាម័យ និងមិនឱ្យមានការដំឡើងថ្លៃម្ហូបអាហារ សណ្ឋាគារ ផ្ទះសំណាក់នានា ឱកាសចូលឆ្នាំចិន វៀតណាមឆ្នាំ២០១៨នេះទេ៕
https://youtu.be/zTo2cYDVd1g
ចែករំលែកព័តមាននេះ