កាកបាទក្រហមកម្ពុជាចែកអំណោយជាថ្មីម្ដងទៀតដល់ជនរងគ្រោះនៅផ្សារសែនមនោរម្យ
- មណ្ឌលគិរី
ខេត្តមណ្ឌលគិរី ៖ កាកបាទក្រហមកម្ពុជាដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន បានផ្តល់អំណោយមនុស្សធម៌…
ខេត្តមណ្ឌលគិរី ៖ កាកបាទក្រហមកម្ពុជាដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន បានផ្តល់អំណោយមនុស្សធម៌ ជូនប្រជាពលរដ្ឋជាអាជីវករផ្សារសែនមនោរម្យ សរុបចំនួន២១១គ្រួសារ នៅថ្ងៃទី១៧ ខែកុម្ភៈ ឆ្នាំ២០១៨ ក្នុងនោះមានអ្នករងរបួសសម្រាកនៅមន្ទីរពេទ្យបង្អែកខេត្តចំនួន៣នាក់ អ្នកស្លាប់ក្នុងអគ្គិភ័យចំនួន២នាក់ និងយុវជនកាកបាទក្រហមកម្ពុជាចំនួន៨នាក់ ហើយព្រឹត្តិការណ៍ឆេះផ្សារនេះកើតឡើងកាលពីវេលាម៉ោង០១និង៣០នាទី រំលងអធ្រាត្រ ថ្ងៃទី១០ ខែកុម្ភៈ ឆ្នាំ២០១៨ ស្ថិតនៅភូមិចំបក់ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ។
លោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ក្តីអាណិតអាសូរ និងការសោកស្តាយ ចំពោះឧបទ្ទវហេតុដែលបានបំផ្លាញទ្រព្យសម្បត្តិរបស់អាជីវករ ។ ជាមួយគ្នានេះ លោកស្រីក៏បានអំពាវនាវដល់ប្រជាជនទាំងអស់ សូមមានការប្រុងប្រយ័ត្នចំពោះការប្រើប្រាស់ភ្លើង និងចរន្តអគ្គិសនី ដែលជាប្រភពនៃគ្រោះថ្នាក់ និងបានលើកទឹកចិត្តសូមកុំអស់សង្ឃឹម ហើយប្រឹងប្រែងប្រកបរបរចិញ្ចឹមជីវិត ដើម្បីស្តារសេដ្ឋកិច្ចគ្រួសារឡើងវិញ ព្រោះអំណោយដែលបានផ្តល់ជូនពេលនេះ អាចជួយសម្រាលការលំបាកបានមួយគ្រាប៉ុណ្ណោះ ។
លោកស្រីបានបញ្ជាក់ថា គ្រួសាររងគ្រោះរងដោយអគ្គិភ័យឆេះផ្សារសែនមនោរម្យ ចំនួន២១១គ្រួសារ គ្រួសារនីមួយៗ ទទួលបាន អង្ករ៣០គីឡូក្រាម មី១កេស ត្រីខ១០កំប៉ុង មុង១ សារុង១ ក្រមា១ ភួយ១ តង់១ និងថវិកា១០០.០០០រៀល ។ អាជីវកររងរបួសសម្រាកនៅមន្ទីរពេទ្យបង្អែកខេត្តចំនួន៣នាក់ ក្នុងម្នាក់ៗទទួលបានថវិកា១លានរៀល យុវជនកាកបាទក្រហមកម្ពុជារងគ្រោះក្នុងអគ្គិភ័យចំនួន៨នាក់ ក្នុងម្នាក់ៗទទួលថវិកាចំនួន២៦ម៉ឺនរៀល ដោយមានការចូលរួមថវិកាផ្ទាល់ខ្លួនពីលោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា និងយុវជនស្ម័គ្រចិត្តសាខា អនុសាខា និងសប្បុរសជនផងដែរ ។
គ្រួសាររងគ្រោះទាំងអស់បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ដែលបានគិតគូរ មានក្តីមេត្តា ករុណា និងទឹកចិត្តជ្រះថ្លា ជួយដោះស្រាយទុក្ខលំបាកដល់ប្រជាជនរងគ្រោះជួបការលំបាកបានទាន់ពេលវេលា ។ ម្យ៉ាងទៀតសាខាកាកបាទក្រហមកម្ពុជាខេត្តមណ្ឌលគិរី បានចុះសួរសុខទុក្ខ និងចែកអំណោយមនុស្សធម៌១លើករួចមកហើយ កាលពីព្រឹកថ្ងៃទី១០ ខែកុម្ភៈ ឆ្នាំ២០១៨ នេះ ៕
សូមបញ្ជាក់ផងដែរ ផ្សារសែនមនោរម្យ ខេត្តមណ្ឌលគិរី ត្រូវបានអគ្គិភ័យឆាបឆេះស្ទើរទាំងស្រុង ដោយអគ្គិភ័យមួយនេះ បានបង្កជាអណ្ដាតភ្លើងឡើងនៅចន្លោះម៉ោង០១និង៣០នាទីរំលងអធ្រាត្រ ថ្ងៃទី១០ ខែកុម្ភៈ ឆ្នាំ២០១៨ បណ្ដាលឲ្យឆេះតូបអស់ចំនួន២១០តូប ខូចខាតទ្រព្យសម្បត្តិមួយចំនួនធំ មនុស្សរងរបួសចំនួន៣នាក់ និងមនុស្សស្លាប់ចំនួន២នាក់ ទី១.ឈ្មោះ សេង ប៉ូ ភេទប្រុស អាយុ២៤ឆ្នាំ (ស្លាប់) និងទី២.ឈ្មោះ ទូច ណាវីត ភេទប្រុស អាយុ១៣ឆ្នាំ (ស្លាប់) ៕
ចែករំលែកព័តមាននេះ