ខេត្តប៉ៃលិន ៖ រដូវបុណ្យចូលឆ្នាំចិន-វៀតណាមនេះគេសង្កេតឃើញអាជីវករម្នាក់ៗ ដែលលក់ដូរនំចំណីនៅក្បែរសួនកុមារទល់មុខសាលាខេត្តប៉ៃលិន ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន មមារញឹកគួរឱ្យកត់សម្គាល់ ដោយកន្លែងខ្លះមានភ្ញៀវចូលទៅអង្គុយហូប ខ្លះទៀតទិញច្រកខ្ចប់យកទៅទទួលទានជួបជុំក្រុមគ្រួសារ ។
ប្រភពព័ត៌មានពីស្ត្រីម្នាក់ឈ្មោះ ស្រីលីន រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន បានរៀបរាប់ឱ្យដឹងថា គាត់បានជួលកន្លែងលក់ដូរនៅក្បែរសួនកុមារនេះ លក់ដូរដូចជា ប្រហិត សាច់គោអាំង ស្លាប់មាន់អាំង អស់រយ:ពេលជាយូរមកហើយដោយក្នុង១យប់ៗចាប់ពីម៉ោង៧ រហូតដល់ម៉ោង១០បានប្រាក់ប្រហែល១០ទៅ១៥ម៉ឺនរៀលដែរ ។ គាត់បន្តទៀតថា ប៉ុន្តែនៅរដូវបុណ្យចូលឆ្នាំចិននេះមានអតិថិជនច្រើនចូលមកទិញដែលធ្វើឱ្យគាត់និងប្តីស្ទើរតែលក់មិនទាន់នោះឡើយ ដោយកាលពីប៉ុន្មានថ្ងៃកន្លងទៅនេះបានប្រាក់ក្នុង១យប់ៗ៣០ទៅ៤០ម៉ឺនរៀលផងដែរ ។ ម្យ៉ាងវិញទៀត អ្វីដែលគាត់សង្កេតឃើញនោះគឺចូលឆ្នាំចិន-វៀតណាមនាឆ្នាំ២០១៨នេះមានលក្ខណៈខុសប្លែកពីឆ្នាំមុនៗឆ្ងាយ ដោយឆ្នាំនេះ មានមនុស្សក្មេង ចាស់ដើរលេងច្រើន ហើយការចាយវាយលុយកាក់ក៏ច្រើនជាងឆ្នាំមុនៗដែរ ។
ចំណែកភ្ញៀវទេសចរម្នាក់ឈ្មោះ សីហា បានឱ្យដឹងថា រូបគេសប្បាយរីករាយក្នុងការនាំក្រុមគ្រួសារដើរលេងកំសាន្ត បើទោះបីជាមិនបានដើរទៅលេងនៅតាមខេត្តឆ្ងាយៗ តែនៅពេលយប់រូបគេតែងនាំប្រពន្ធកូនទៅលេងលើសួនកុមារដើម្បីនាំគ្នាទិញនំចំណីហូបឆ្អែតរួចក៏ត្រឡប់ទៅផ្ទះវិញ ។ ការដើរលេងនេះដើម្បីបំបាត់ភាពតានតឹងនៅក្នុងអារម្មណ៍ និងជួយកាត់បន្ថយការព្រួយបារម្ភផ្សេងៗ ដែលតែងតែគិតវែងឆ្ងាយ ។ លើសពីនេះ ការដើរលេងនៅក្នុងខេត្តពិតជាជួយបង្កើតអនុស្សាវរីយ៍ថ្មីៗ ធ្វើឱ្យចេះយល់ចិត្តរវាងប្តីប្រពន្ធ និងកូនហើយថែមទាំងយល់ពីសង្គមខាងក្រៅកាន់តែច្រើនទៀត ៕
ចែករំលែកព័តមាននេះ