ខេត្តបន្ទាយមានជ័យ ៖ បន្ទាប់ពីគេហទំព័រ និងកាសែតកោះសន្តិភាព បានចេញផ្សាយករណីជនរងគ្រោះម្នាក់ចោទប្រកាន់អាវុធហត្ថមួយក្រុមព្រួតវាយធ្វើបាបរហូតដាច់ពោះវៀន កាលពីយប់ថ្ងៃទី២១ ខែមករា ឆ្នាំ២០១៨ ក្នុងកម្មវិធីប្រគុំតន្ត្រីមួយនៅភូមិគីឡូម៉ែត្រលេខ៤ សង្កាត់ផ្សារកណ្តាល…
ខេត្តបន្ទាយមានជ័យ ៖ បន្ទាប់ពីគេហទំព័រ និងកាសែតកោះសន្តិភាព បានចេញផ្សាយករណីជនរងគ្រោះម្នាក់ចោទប្រកាន់អាវុធហត្ថមួយក្រុមព្រួតវាយធ្វើបាបរហូតដាច់ពោះវៀន កាលពីយប់ថ្ងៃទី២១ ខែមករា ឆ្នាំ២០១៨ ក្នុងកម្មវិធីប្រគុំតន្ត្រីមួយនៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត មេបញ្ជាការអាវុធហត្ថខេត្តបន្ទាយមានជ័យ លោកឧត្តមសេនីយ៍ត្រី បោន ប៊ិន បានធ្វើការបដិសេធតាមទូរស័ព្ទ ដោយច្រានចោលការចោទប្រកាន់នេះ ហើយអះអាងថា កម្លាំងក្រោមឱវាទរបស់លោក មិនបានប្រព្រឹត្តដូចដែលព័ត៌មានក្នុងស្រុកបានលើកយកទៅសសេរនោះទេ ។
បើទៅជាមានការបដិសេធយ៉ាងដាច់អហង្ការពីលោកមេបញ្ជាការអាវុធហត្ថខេត្តយ៉ាងណាក៏ដោយ គ្រួសាររងគ្រោះទាំងម្តាយឪពុក និងបងប្អូននៅតែចោទប្រកាន់ខាងអាវុធហត្ថក្រុងប៉ោយប៉ែតមួយក្រុមវាយធ្វើបាបជនរងគ្រោះម្នាក់ក្នុងគ្រួសារមួយនេះ គឺឈ្មោះ សាន គឹមសេង ភេទប្រុស អាយុ២៤ឆ្នាំ របួសរហូតដាច់ពោះវៀន ។
ជួបជាមួយក្រុមអ្នកយកព័ត៌មានទូរទស្សន៍ និងកាសែតក្នុងស្រុកដើម្បីសួរបញ្ជាក់ករណីខាងលើ ក្រែងជនរងគ្រោះច្រឡំអ្នកផ្សេងហើយចោទលើអាវុធហត្ថពួកគេទាំង៣បងប្អូន ដែលស្ថិតនៅកន្លែងកើតហេតុនៅតែអះអាង ចោទប្រកាន់អាវុធហត្ថមួយក្រុមជាអ្នកបង្កដដែល ។
មិនតែប៉ុណ្ណោះ ឈ្មោះ សាន គឹមសែន អាយុ២៨ឆ្នាំ បងប្រុសបង្កើតជនរងគ្រោះនិយាយថា ខ្លួន និងប្អូនប្រុសឈ្មោះ សាន គឹមស៊ីម អាយុ២៣ឆ្នាំ ត្រូវបានអាវុធហត្ថចាប់ឃុំខ្លួនអស់១យប់នៅមូលដ្ឋានអាវុធហត្ថក្រុងប៉ោយប៉ែត ។ ហើយខ្លួនត្រូវអាវុធហត្ថយកប្រាក់អស់១៥០ដុល្លារ ទើបធ្វើការដោះលែងវិញ ខណៈប្អូនប្រុសឈ្មោះ សាន គឹមស៊ីម ទាល់តែសាច់ញាតិទាក់ទងសុំយកទៅបូមឈាមជួយបងប្រុសដែលត្រូវវះកាត់ពោះវៀន ទើបគេព្រមដោះលែង ។
លោក នួន នីណារ៉ូ មេបញ្ជាការអាវុធហត្ថក្រុងប៉ោយប៉ែត ទើបឡើងថ្មីមិនអាចទាក់ទងសុំការបំភ្លឺបានទេ ដោយលេខទូរស័ព្ទរបស់លោកលេខ ០១៧៥៥៥៥៩៩ ចុចមិនចូល ។ យ៉ាងណាក៏ដោយជុំវិញករណីនេះអាវុធក្រុងប៉ោយប៉ែតម្នាក់ប្រាប់តាមប្រព័ន្ធមីសិនជ័រថា ថ្ងៃកើតហេតុ ជនរងគ្រោះបានផ្ទុះជម្លោះជាមួយក្រុមផ្សេងជាមុន ហើយសមត្ថកិច្ចទើបចូលទៅកន្លែងកើតហេតុជាក្រោយ មិនបានបង្ករបួសស្នាមដល់ជនរងគ្រោះឡើយ ។ មិនតែប៉ុណ្ណោះ អាវុធហត្ថដដែលនេះអះអាងថា ពេលដែលសមត្ថកិច្ចចុះដល់កន្លែងកើតហេតុ បែរជាជនរងគ្រោះប្រតាយប្រតប់វាយអាវុធហត្ថឲ្យរបួសម្នាក់ថែមទៀត ។
អាវុធហត្ថខាងលើអះអាងថា ពិតជាបានយកប្រាក់១៥០ដុល្លារពីជនសង្ស័យឈ្មោះ សាន គឹមសែន ភេទប្រុស អាយុ២៨ឆ្នាំ មែន មុនការដោះលែង ប៉ុន្តែលោកថា ប្រាក់១៥០ដុល្លារនោះ មិនមែនជាប្រាក់ថ្នូរ និងការដោះលែងទេ គឺប្រាក់បង់ឲ្យអាវុធហត្ថយកទៅព្យាបាលរបួស ៕
ចែករំលែកព័តមាននេះ