ខេត្តមណ្ឌលគិរី ៖ ទីបំផុត ជនដែលបានវាយបំផ្លាញរូបសំណាកអ្នកតាភ្នំដោះក្រមុំ ត្រូវសមត្ថកិច្ចចាប់ខ្លួនបានហើយកាលពីវេលាម៉ោង១០និង៣០នាទីព្រឹកថ្ងៃទី១៦ ខែកុម្ភៈ បន្ទាប់ពីមានការស៊ើបអង្កេតយ៉ាងយកចិត្តទុកដាក់ពីសំណាក់មន្ត្រីជំនាញ ។
លោកឧត្តមសេនីយ៍ត្រីសូ សុវណ្ណ ស្នងការរងនគរបាលខេត្ត បានឲ្យដឹងថា រយៈពេល២៤ម៉ោងក្រោយពេលទទួលបានព័ត៌មានពីប្រជាពលរដ្ឋ ពីករណីជនមិនស្គាល់មុខវាយបំផ្លាញរូបសំណាកអ្នកតាភ្នំដោះក្រមុំកម្លាំងនគរបាលការិយាល័យព្រហ្មទណ្ឌខេត្ត សហការជាមួយនគរបាលក្រុងសែនមនោរម្យ បានចុះកំណត់មុខសញ្ញាជនដៃដល់ដែលវាយបំផ្លាញរូបសំណាកនិងពង្រាយកម្លាំងរុករកគ្រប់ទីកន្លែង។ លោកស្នងការរងបន្តថា បន្ទាប់ពីកំណត់មុខសញ្ញាបានច្បាស់លាស់ហើយ កម្លាំងនគរបាលបានតាមរុករកជនឈ្មោះ ម៉ម សាម៉ុន ហៅ ខៀវ ភេទប្រុស អាយុជាង៣០ឆ្នាំ និងបានឃាត់ខ្លួនយកទៅសាកសួរនៅស្នងការដ្ឋានខេត្ត នាព្រឹកថ្ងៃទី១៦ ខែកុម្ភៈ ដែលជននេះមានបញ្ហា សា្មរតីមិនប្រក្រតី ។
សមត្ថកិច្ចជំនាញបានពិនិត្យទឹកម៉ូត្រជនសង្ស័យដើម្បីរកមើលថា មានប្រើប្រាស់គ្រឿងញៀនដែរឬអត់ ក្នុងនោះជនសង្ស័យឆ្លើយសារភាពថា ខ្លួនបានផឹកស្រាអស់កន្លះលីត្រ និងថែមស្រាបៀរបីកំប៉ុងទៀតហើយដោយស្រវឹងខ្លាំងពេកក៏វាយរូបអ្នកតាស្រុះនោះតែម្តងទៅ មិនមានរឿងខឹងសម្បាពីអ្វីនោះទេ ។
ជនឈ្មោះ ម៉ម សាម៉ុន ហៅខៀវ បាននិយាយដោយមិនប្រក្រតីថា «រាល់ថ្ងៃនេះ គ្មានផ្ទះសម្បែង មានតែម៉ែឪបងប្អូន តែបានទៅនៅលើភ្នំម្នាក់ឯងជាង១៧ឆ្នាំហើយ» ។ ឆ្លើយតបនឹងសំណួរអ្នកយកព័ត៌មានកោះសន្តិភាព ជននេះនិយាយពីមូលហេតុដែលខ្លួនវាយបំផ្លាញរូបអ្នកតាថា «ខ្លួនក៏មិនសូវដឹងដែរ ពេលស្រវឹងទៅឡូឡានាំខ្ញុំទៅវ៉ៃអ្នកតា ។ ពេលវ៉ៃហើយ ខ្ញុំស្រឡះមុខចែស…គឺក៏វាយនឹងញញួរដែលខ្ញុំយកពីផ្ទះបង…ពេលវ៉ៃហើយ ព្រឹកឡើងខ្ញុំភ្លឺភ្នែក តែខ្ញុំសោកស្តាយរូបអ្នកតាដែរ…ព្រោះខ្ញុំនៅជាមួយគាត់ជាង១៧ឆ្នាំហើយ មិនដែលមានរឿងជាមួយគាត់ទេ…ទើបថ្ងៃហ្នឹងជ្រុលដៃ…»។
លោក កាន់ ពេញ អធិការនគរបាលក្រុងសែនមនោរម្យ បានឲ្យដឹងថា ជនសង្ស័យគឺជាមនុស្សមានសតិមិនល្អ និងបានស្នាក់នៅក្នុងព្រៃឫស្សីជិតអាស្រមដែលជាកន្លែងកើតហេតុ ។ជននេះ ត្រូវបានសមត្ថកិច្ចតាមរកពេញមួយយប់លុះព្រឹកឡើងក៏ប្រទះឃើញនៅក្នុងព្រៃ ចម្ងាយពីអាស្រមប្រមាណ៥០ម៉ែត្រប៉ុណ្ណោះ ។
លោកអធិការបញ្ជាក់ថា មូលហេតុគឺជននេះស្រវឹងស្រា ទើបទៅវាយរូបសំណាក មិនមែនជារឿងប្រកាន់ពូជសាសន៍ ឬសាសនាខុសគ្នានោះទេ ដូច្នេះសូមកុំមានការយល់ច្រឡំ។ ទោះជាយ៉ាងណា នៅរសៀលថ្ងៃដដែលសមត្ថកិច្ចបន្តការសាកសួរជនសង្ស័យដើម្បីចាត់ការតាមនិតិវិធីច្បាប់ ។
គួរកត់សម្គាល់ថា រូបសំណាកអ្នកតាភ្នំដោះក្រមុំ ដែលត្រូវបានប្រជាពលរដ្ឋនិងអាជ្ញាធរខេត្តដាក់តាំងនៅចង្កេះភ្នំ គឺដើម្បីគោរពបូជាមិនមែនរូបអ្នកតាដែលតម្កល់លើភ្នំនោះទេ ។ រូបសំណាកអ្នកតាស្រុះនេះត្រូវជនមិនស្គាល់មុខវាយបំផ្លាញកាលពីយប់ថ្ងៃទី១៤ឈានចូលថ្ងៃទី១៥ ខែកុម្ភៈ ស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ ។ គួររំឭកថា ការវាយបំផ្លាញរូបសំណាកអ្នកតាស្រុះលើភ្នំដោះក្រមុំកាលពីលើកមុន ក៏បង្កឡើងដោយជនមានសតិមិនប្រក្រតីដូចគ្នានេះដែរ គឺគ្រូបង្រៀនម្នាក់ដែលបច្ចុប្បន្នត្រូវបាននាំមកគាំពារនៅមជ្ឈមណ្ឌលព្រៃស្ពឺ ជាយរាជធានីភ្នំពេញ ៕
ចែករំលែកព័តមាននេះ