ខេត្តប៉ៃលិន ៖ ឆ្នាំ២០១៨នេះ ទីផ្សារនិងតម្លៃដំឡូងមី មានភាពប្រសើរជាងឆ្នាំកន្លងទៅ ធ្វើឲ្យប្រជាកសិករមានទឹកចិត្តបង្កបង្កើនផលខុសពីធម្មតា ។ ជាទូទៅ បន្ទាប់ពីប្រមូលផលដំឡូងរួច ពួកគាត់ពុំទាន់ចាប់ផ្តើមដាំឡើងវិញទេ…
ខេត្តប៉ៃលិន ៖ ឆ្នាំ២០១៨នេះ ទីផ្សារនិងតម្លៃដំឡូងមី មានភាពប្រសើរជាងឆ្នាំកន្លងទៅ ធ្វើឲ្យប្រជាកសិករមានទឹកចិត្តបង្កបង្កើនផលខុសពីធម្មតា ។ ជាទូទៅ បន្ទាប់ពីប្រមូលផលដំឡូងរួច ពួកគាត់ពុំទាន់ចាប់ផ្តើមដាំឡើងវិញទេ ប៉ុន្តែនៅឆ្នាំ២០១៨នេះ ហាក់ដូចជាខុសប្លែកពីឆ្នាំមុនៗ ខណៈពេលនេះ អ្នកខ្លះចាប់ផ្តើមកាប់ដើមដំឡូងដាំជាបណ្តើរៗ និងខ្លះទៀតកំពុងតែប្រញឹកជួលកម្មករដក និងកាប់ចិញ្ច្រាំរាល់ថ្ងៃ យ៉ាងមមាញឹក ។ ចំណែកអ្នកមិនទាន់ដក ក៏មានទឹកចិត្តសប្បាយរីករាយដែរ ព្រោះតម្លៃដំឡូងមីឆ្នាំនេះខ្ពស់ជាងឆ្នាំមុនៗ ។
កសិករឈ្មោះ អ៊ុក ទូច រស់នៅក្នុងក្រុងប៉ៃលិន បានឱ្យដឹងថា ចាប់តាំងពីខែធ្នូ ឆ្នាំ២០១៧ រហូតមកដល់ពេលនេះ ប្រជាពលរដ្ឋដែលដាំដំឡូងមីកំពុងនាំគ្នាសម្រុកប្រមូលផល ដោយសារតែនៅចុងឆ្នាំ២០១៧ តម្លៃដំឡូងមីស្រស់ និងស្ងួតឡើងថ្លៃជាងឆ្នាំមុនៗ ។
លោកបន្ដថា ៖« គិតត្រឹមថ្ងៃទី១៤ កុម្ភៈ ដំឡូងមីស្រស់ក្នុង១គីឡូក្រាម ថ្លៃ២,០៥បាត (ប្រាក់ថៃ) ស្មើនឹង២៥០រៀល និងចំណិតដំឡូងមីស្ងួត តម្លៃ៤,៥ទៅ៥បាត ស្មើនឹង៤៥០ទៅជាង៦០០រៀល បើធៀបនឹងឆ្នាំមុន ដំឡូងមីស្រស់១គីឡូក្រាមលក់បាន០,៩ទៅ១បាត ខណៈចំណិតដំឡូងមីស្ងួត តម្លៃត្រឹមតែ៣,៥ទៅ៤បាតប៉ុណ្ណោះ » ។
ឈ្មួញដើរទិញដំឡូងមីក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន បានឱ្យដឹងថា នៅឆ្នាំថ្មីនេះ ការប្រមូលផលមើមដំឡូងមីរបស់លោកនៅតែមានជាបន្តបន្ទាប់ ដោយសារម្ចាស់ចម្ការមួយចំនួនពុំទាន់រួចរាល់ ។ ចំណែកការបញ្ជាទិញពីឈ្មួញ ក៏នៅតែចូលមកទទួលទិញជាហូរហែ ដោយដឹកតាមរថយន្តយីឌុបបន្តទៅលក់នៅប្រទេសថៃទាំងយប់ទាំងថ្ងៃ ។
លោក សេង រដ្ឋ អ្នកប្រមូលទិញដំឡូងរូបនេះបានប្រាប់កោះសន្ដិភាពថា ៖« សព្វថ្ងៃ មិនត្រឹមតែតម្លៃខ្ពស់ជាងឆ្នាំមុនទេ ទីផ្សារក៏សម្បូរដែរ ។ ពេលខ្លះដកភ្លាម លក់ភ្លាម ប៉ុន្តែបើលក់ទាំងមូល អត់សូវបានចំណេញប៉ុន្មានទេ ទើបជួលកម្មករចំណាកស្រុកមកពីខេត្តផ្សេងឱ្យសង់រោងនៅចម្ការនាំគ្នាកាប់ចិញ្ច្រាំតែម្តង ដោយក្នុង១កញ្ឆេ ជួលក្នុងតម្លៃ១ពាន់រៀល ហើយម្នាក់ៗអាចចិញ្ច្រាំបានចាប់ពី៤០ទៅ៥០កញ្ឆេឯណោះ » ។
លោកបញ្ជាក់ថា នៅដើមឆ្នាំ២០១៨ ប្រជាពលរដ្ឋដែលដាំដំឡូងមីមានទឹកចិត្តសប្បាយរីករាយគ្រប់គ្នា ដោយឃើញដំឡូងមីឡើងថ្លៃ ប៉ុន្តែក៏មានអ្នកខ្លះបានយកដីចម្ការទៅដាំពោតក្រហម តាង៉ែន ចេក ស្វាយកែវរមៀត និងដំណាំផ្សេងៗមួយចំនួនដែរ ធ្វើឲ្យការដាំដុះដំឡូងមីបានតិច ដោយសារតែកាលពីឆ្នាំ២០១៦ តម្លៃដំឡូងមីធ្លាក់ចុះខ្លាំងពេក ។
ទោះជាយ៉ាងនេះក្ដី ពួកគាត់ក៏ថ្លែងអំណរគុណដល់រាជរដ្ឋាភិបាលកម្ពុជា ដែលបានយកចិត្តទុកដាក់ជួយដោះស្រាយរកទីផ្សារជូនប្រជាពលរដ្ឋ ។ ម្យ៉ាងវិញទៀត ពួកគាត់ក៏បានអរគុណដល់អាជ្ញាធរខេត្តប៉ៃលិន ដែលតែងមានទំនាក់ទំនងល្អជាមួយប្រទេសជិតខាង ជាពិសេសប្រទេសថៃ ក្នុងការបើកឱ្យមានក្រុមឈ្មួញចូលមកទិញដំឡូងមីដោយរលូន។
ទីផ្សារដំឡូងមីចាប់ផ្ដើមប្រសើរឡើង បន្ទាប់ពីរាជរដ្ឋាភិបាលកម្ពុជា ពិសេសរដ្ឋមន្ត្រី
ក្រសួងពាណិជ្ជកម្ម និងក្រសួងកសិកម្ម បានខិតខំជំរុញវិស័យនេះតាមរយៈការរៀបចំវេទិកាដំឡូងមី ដើម្បីទាក់ទាញការវិនិយោគ និងបើករបាំងទីផ្សារ ព្រមទាំងលើកទឹកចិត្តដល់កសិករក្នុងការដាំដុះផងដែរ ។
ថ្លែងក្នុងទិវាដំឡូងមីលើកទី២ ដែលប្រារព្ធធ្វើនៅខេត្តប៉ៃលិន កាលពីអំឡុងខែវិច្ឆិកា ឆ្នាំ២០១៧ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា និន្នាការ និងការរំពឹងទុកនៃតម្រូវការដំឡូងមីសម្រាប់ទីផ្សារក្នុងតំបន់ និងពិភពលោក នឹងមានកំណើនកាន់តែខ្ពស់ ដែលនេះគឺជាកាលានុវត្តភាពថ្មីសម្រាប់កម្ពុជា ដើម្បីអភិវឌ្ឍន៍សង្វាក់តម្លៃដំឡូងមី តាមរយៈការពង្រឹង និងពង្រីកផលិតកម្ម ការកែច្នៃចំណិតដំឡូងមី និងសមត្ថភាពនាំចេញ សំដៅឆ្លើយតបនឹងតម្រូវការទីផ្សារនាពេលអនាគត ។
លោកថ្លែងថា ៖« ដើម្បីចាប់យកកាលានុវត្តភាពនេះ កម្ពុជាចាំបាច់ត្រូវវិនិយោគបន្ថែម និងការឯកភាពជាធ្លុងមួយរវាងរដ្ឋាភិបាល និងភាគីពាក់ព័ន្ធ ដើម្បីដោះស្រាយបញ្ហាប្រឈម និងហានិភ័យនានាដូចជា ភាពទន់ខ្សោយនៃខ្សែសង្វាក់តម្លៃ កង្វះព័ត៌មានទីផ្សារ ការផ្គត់ផ្គង់មិនទៀងទាត់ និងគុណភាពប្រែប្រួលនៃដំឡូងមី ដែលជាកត្តារាំងស្ទះដល់ការលូតលាស់នៃឧស្សាហកម្មដំឡូងមីនៅកម្ពុជា » ។
ស្របគ្នានោះដែរ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានថ្លែងថា ៖« កម្ពុជា គឺជាប្រទេសផលិតដំឡូងមីលំដាប់ទី៨លើពិភពលោក និងលំដាប់ទី៤នៅក្នុងតំបន់ ។ ការអនុវត្តគោលនយោបាយយុទ្ធសាស្ត្រ និងកម្មវិធីពាក់ព័ន្ធតាមវិស័យនានា តម្រង់ឆ្ពោះទៅរកទីផ្សារក្នុងបណ្តាឆ្នាំកន្លងមក បានជួយជំរុញកំណើននាំចេញកសិផលកម្ពុជាទៅកាន់ទីផ្សារក្នុងតំបន់ និងពិភពលោក ក្នុងល្បឿនមួយគួរជាទីមោទនៈ » ។
យោងតាមទិន្នន័យក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ការនាំចេញផលិតផលដំឡូងមីកម្ពុជា ត្រូវបានពង្រីកទីផ្សារពី៤ប្រទេសក្នុងឆ្នាំ២០១៤ ទៅ១៦ប្រទេសក្នុងឆ្នាំ២០១៦ ។
ទិន្នន័យដដែលបញ្ជាក់ថា ការនាំចេញផលិតផលដំឡូងមី (ដំឡូងមីស្រស់, ចំណិតដំឡូងមីក្រៀម និងម្សៅដំឡូងមី) បានកើនឡើងពី០,២២លានតោនក្នុងឆ្នាំ២០១២ ដល់ជាង៣,៦លានតោនក្នុងឆ្នាំ២០១៦ ។ ចំណែកនៅក្នុងរយៈពេល៩ខែដើមឆ្នាំ២០១៧ ការនាំចេញដំឡូងមី សម្រេចបានជាង១,៨លានតោន ៕
ចែករំលែកព័តមាននេះ