ខេត្តកំពង់ចាម ៖ កោះដាច់ស្ថិតនៅកណ្តាលទន្លេមេគង្គ ក្នុងឃុំកោះសំរោង ស្រុកកំពង់សៀម គឺជាតំបន់ដែលសម្បូរផ្ទៃដីមានជីជាតិងាយស្រួលដល់ពលរដ្ឋប្រកបរបរដាំដុះបន្លែផ្សេងៗដូចជា តាសក់ ននោង ត្រប់ និងត្រឡាច ដើម្បីផ្គត់ផ្គង់ជីវភាពគ្រួសារបានសមរម្យផងដែរ ។
អ្នកស្រី សួន ចាន់នី អាយុ៤៦ឆ្នាំ រស់នៅភូមិចុងថ្នល់ទី២ សង្កាត់បឹងកុក ក្រុងកំពង់ចាម ប្រាប់ថា គាត់និងប្តីបាននាំគ្នាដាំបន្លែជាច្រើនមុខនៅលើកោះដាច់នេះ ។ ពីដំបូង គាត់ដាំតិចតួចទេ ប៉ុន្តែក្រោយមក គាត់ក៏បានទិញដីបន្ថែមទៀតដើម្បីពង្រីកការដាំដុះ ។ នៅក្នុងរដូវទឹកស្រក ការដាំដុះរបស់គាត់ទទួលបានផលច្រើនគួរសម ហើយពេលគេមកទិញម្តងៗ គាត់អាចរកកម្រៃបានពី២០ម៉ឺន ទៅ៣០ម៉ឺនរៀលដែរ ។
សព្វថ្ងៃ គ្រួសាររបស់គាត់ពឹងផ្អែកលើការដាំដុះបន្លែនេះ និងអាចលក់ដោះស្រាយជីវភាពបានសមរម្យ ព្រមបានឲ្យកូនប្រុសស្រី២នាក់ទៅរៀនជំនាញជួសជុលរថយន្ត និងអ៊ុតសក់ ។
លោក ម៉ៅ ឈា អាយុ៤៣ឆ្នាំ អ្នកប្រមូលទិញបន្លែទៅបោះឲ្យម៉ូយតាមទីផ្សារ ជាង១០ឆ្នាំមកហើយ បានឲ្យដឹងកាលពីព្រឹកថ្ងៃទី១៣ កុម្ភៈ ថា ៖« រាល់ថ្ងៃនេះ ខ្ញុំមានរថយន្តទ្រុង១គ្រឿងទុកដើរទិញបន្លែនៅតាមស្រុក ដូចជា ស្រុកក្រូចឆ្មារ ពាមជីលាំង ពាមជាំង ស្រុកអូររាំងឪ ខេត្តត្បូងឃ្មុំ និងមួយផ្នែកទៀតនៅត្រើយខាងលិចទន្លេមេគង្គមាន ស្រុកចំការលើ កងមាស និងកោះដាច់ជាដើម ព្រមទាំងតំបន់ឆ្ងាយៗជាច្រើនទៀត ។ នៅពេលទិញដាក់ពេញរថយន្តហើយនោះ ខ្ញុំត្រូវដឹកដើរបោះឲ្យម៉ូយនៅតាមផ្សារនានាក្នុងក្រុងកំពង់ចាម » ។
លោកបន្តថា ៖« ជាក់ស្តែង បន្លែដែលទិញនៅព្រឹកនេះ (ថ្ងៃទី១៣ កុម្ភៈ) មានដូចជា ននោង និងត្រប់ គឺខ្ញុំបានចុះប្រមូលទិញពីកសិករនៅកោះដាច់ ។ ខ្ញុំនឹងដឹកយកទៅបោះឲ្យម៉ូយតាមផ្សារជាច្រើននៅក្នុងខេត្តត្បូងឃ្មុំ ព្រៃវែង ហើយពេលខ្លះ បានដឹកដល់ទៅខេត្តស្វាយរៀងក៏មានដែរ » ។
សម្រាប់ខែប្រាំងវិញ គាត់បានដើរទិញបន្លែនៅស្រុកជាប់ទន្លេមេគង្គ និងនៅតាមស្រុកគ្មានទឹកលិច ដូចជា ស្រុកចំការលើ កងមាស និងស្រុកមេមត់ជាដើម ។
ក្រោយពីផាត់ចំណាយលើប្រេង និងកម្មករលើកដាក់ហើយនោះ អ្នកប្រមូលទិញបន្លែរូបនេះអាចសល់ប្រាក់ជាង១០ម៉ឺនរៀលក្នុង១ជើង។ ទោះជាមិនបានចំណេញច្រើនក៏ពិតមែន ប៉ុន្តែគាត់និងប្រពន្ធនៅតែប្រកបរបរនេះបន្តទៀតដើម្បីដោះស្រាយជីវភាពគ្រួសារ ។
ជាមួយគ្នានេះ គាត់សូមសំណូមពរដល់ពលរដ្ឋទាំងឡាយនាំគ្នាជួយលើកតម្កើងផលិតផលខ្មែរកាន់តែច្រើនឡើងបន្ថែមទៀត ដើម្បីឲ្យកសិករមានកម្លាំងចិត្តដាំដុះ ៕
ចែករំលែកព័តមាននេះ